ଢେଙ୍କାନାଳ ଅଫିସ, ୯।୧୨: ଆସନ୍ତା ବର୍ଷ ଢେଙ୍କାନାଳ ଜିଲାର ସଂରକ୍ଷିତ ଜଙ୍ଗଲରେ ହେବ ବାଘଗଣନା। ଏଥିଲାଗି ପ୍ରସ୍ତୁତି ଆରମ୍ଭ କରିଛି ବନ ବିଭାଗ। ବାଘଗଣନା ଲାଗି ପ୍ରାଥମିକ ପର୍ଯ୍ୟାୟରେ ୮ ରେଞ୍ଜ୍ର ୨ ଜଣ ଲେଖାଏ ଦକ୍ଷ କର୍ମଚାରୀଙ୍କୁ ଅନୁଗୋଳରେ ପ୍ରଶିକ୍ଷଣ ଦିଆଯାଉଛି। ତାଲିମପ୍ରାପ୍ତ କର୍ମଚାରୀମାନେ ବନଖଣ୍ଡ ଅଧୀନ ବିଭିନ୍ନ ରେଞ୍ଜ୍ର କର୍ମଚାରୀଙ୍କୁ ପ୍ରଶିକ୍ଷଣ ଦେବେ। ସବୁକିଛି ଠିକ୍ଠାକ ରହିଲେ ଆସନ୍ତା ଜାନୁୟାରୀ କିମ୍ବା ଫେବୃୟାରୀରେ ବାଘଗଣନା ଆରମ୍ଭ ହେବ ବୋଲି ବିଭାଗ ପକ୍ଷରୁ ସୂଚନା ଦିଆଯାଇଛି।
ଢେଙ୍କାନାଳର ବିଭିନ୍ନ ସଂରକ୍ଷିତ ଜଙ୍ଗଲରେ କଲରାପତରିଆ ପ୍ରଜାତିର ବାଘବଂଶ ବୃଦ୍ଧି ଘଟିଛି। ଜିଲାରେ ବର୍ତ୍ତମାନ ଲିଓପାର୍ଡ ପ୍ରଜାତିର ୭ ବାଘ ଥିବା ଜଣାପଡ଼ିଛି। ଏମାନଙ୍କ ଚିତ୍ର ଟ୍ରାପ୍ କ୍ୟାମେରାରେ ଏକଦ ହୋଇଛି। ହେଲେ ପ୍ରକୃତରେ ବାଘସଂଖ୍ୟା କେତେ ତାହା ସ୍ପଷ୍ଟ ହୋଇପାରିନାହିଁ। ତେଣୁ ବିଧିବଦ୍ଧ ଭାବେ ବାଘଗଣନା କରିବାକୁ ଅଣ୍ଟା ଭିଡ଼ିଛି ବନ ବିଭାଗ। ସଂରକ୍ଷିତ ଜଙ୍ଗଲରେ ଲାଗିଥିବା ଟ୍ରାପ୍ କ୍ୟାମେରା, ଜଙ୍ଗଲ ମଧ୍ୟରେ ଥିବା ଜଳାଶୟରେ ପାଦଚିହ୍ନ ଆଦିକୁ ଅନୁଧ୍ୟାନ କରି ବାଘ ଗଣନା ହେବ।
କାର୍ଯ୍ୟକ୍ରମ ସମ୍ପର୍କରେ ସହକାରୀ ବନ ସଂରକ୍ଷକ ରଶ୍ମିରଞ୍ଜନ ସ୍ବାଇଁ କୁହନ୍ତି, ଢେଙ୍କାନାଳ ଜିଲାରେ ବାଘଗଣନା ପାଇଁ ପ୍ରସ୍ତୁତି ଆରମ୍ଭ ହୋଇଛି। ପ୍ରଥମ ପର୍ଯ୍ୟାୟରେ ପ୍ରତି ରେଞ୍ଜର ୨ଜଣ ଲେଖାଏ କର୍ମଚାରୀଙ୍କୁ ତାଲିମ ଦିଆଯିବ। ପରେ ସେମାନେ ଅନ୍ୟମାନଙ୍କୁ ତାଲିମ ଦେବେ। ପ୍ରଶିକ୍ଷଣ ଶେଷ ହେବା ପରେ ବାଘ ଗଣନା ଆରମ୍ଭ ହେବ। ଜିଲା ବନଖଣ୍ଡ ଅଧିକାରୀ ଡା. ପ୍ରକାଶଚାନ୍ଦ ଗୋଗିନେନି କୁହନ୍ତି, ବିଭିନ୍ନ ସଂରକ୍ଷିତ ଜଙ୍ଗଲରେ ଲାଗିଥିବା ଟ୍ରାପ୍ କ୍ୟାମରାରେ ଉତ୍ତୋଳନ ହୋଇଥିବା ଫଟୋରୁ ଜିଲାର ବିଭିନ୍ନ ଜଙ୍ଗଲରେ ୭ଟି କଲରାପତରିଆ ବାଘ ରହିଥିବା ଜଣାପଡ଼ିଛି। ବାଘ ସଂଖ୍ୟା ବଢ଼ିବା ଶୁଭସଙ୍କେତ। ନନ୍ଦିନିଆ ଏବଂ କନ୍ଧରା ସଂରକ୍ଷିତ ଜଙ୍ଗଲକୁ ସାତକୋଶିଆ ବ୍ୟାଘ୍ର କରିଡରରେ ଅନ୍ତର୍ଭୁକ୍ତ କରିବାକୁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯାଇଛି। ପ୍ରସ୍ତାବ ଅନୁମୋଦନ ହେଲେ ଏହି ୨ଜଙ୍ଗଲ ସାତକୋଶିଆ ବନଖଣ୍ଡ ଅଧୀନରେ ରହିବ। ଜଙ୍ଗଲ ସୁରକ୍ଷିତ ରହିଲେ ଏବଂ ତୃଣଭୋଜୀଙ୍କ ସଂଖ୍ୟା ବଢ଼ିଲେ ବାଘଙ୍କ ସଂଖ୍ୟା ବଢ଼ିବ। ଏଥିଲାଗି ବହୁବିଧ ପଦକ୍ଷେପ ହାତକୁ ନିଆଯାଇଛି ବୋଲି ଜିଲା ବନଖଣ୍ଡ ଅଧିକାରୀ ସୂଚନା ଦେଇଛନ୍ତି।
