ଖୋର୍ଦ୍ଧା ଅଫିସ,୧୬ା୩: ଖୋର୍ଦ୍ଧା ଗୁରୁଜଙ୍ଗର ଗଣେଶ ପାଟଶାଣୀ। ବୟସ ୬୫ ଟପିଲାଣି। ତେବେ ଏ ବୟସରେ ବି ସେ ବେଶ ଚଳଚଞ୍ଚଳ। ଦୀର୍ଘ ୨୮ବର୍ଷ ଧରି ଖୋର୍ଦ୍ଧା ସହରରେ ଖବରକାଗଜ ବିତରଣ କରୁଛନ୍ତି। ସକାଳ ପାଇଲେ ପେପର ପଏଣ୍ଟରେ ପହଞ୍ଚି ସମସ୍ତଙ୍କଠାରୁ ଖବରକାଗଜ ସଂଗ୍ରହ କରି ବାଣ୍ଟିବା ପାଇଁ ଚାଲି ଯାଇଥାନ୍ତି। କରୋନା ଭଳି ମହାମାରୀ ସମୟରେ ଲୋକେ ଘରକୁ ବାହାରକୁ ଆସିବାକୁ ଭୟ କରୁଥିବା ବେଳେ ସେ କିନ୍ତୁ ଲୋକଙ୍କ ନିକଟରେ ଖବରକାଗଜ ପହଞ୍ଚାଇବା ପାଇଁ ସେ ସାଇକେଲରେ ଭୋରରୁ ଚାଲି ଆସୁଥିଲେ। ସକାଳ ପାଇଲେ ଲୋକଙ୍କ ନିକଟରେ ଖବରକାଗଜ ପହଞ୍ଚାଇବାର ନିଶା ଖୋର୍ଦ୍ଧାରେ ତାଙ୍କ ସ୍ବତନ୍ତ୍ର ପରିଚୟ ସୃଷ୍ଟି କରିଛି। ବୟସ ହୋଇଯାଇଥିଲେ ମଧ୍ୟ ତାଙ୍କ କାର୍ଯ୍ୟ ଜାରି ରଖୁଥିବାରୁ ସମସ୍ତେ ପ୍ରଶଂସା କରୁଛନ୍ତି।
୬ଟାଠାରୁ ତାଙ୍କ ଯାତ୍ରା ଆରମ୍ଭ ହୋଇ ୯ଟା ସୁଦ୍ଧା ଘରକୁ ଫେରିଥାନ୍ତି। ବୟସାଧିକ କାରଣରୁ ଏବେ ତାଙ୍କ ସାନ ପୁଅ ତାଙ୍କୁ ଏହି କାମରେ ସହଯୋଗ କରୁଛନ୍ତି। ବାପାଙ୍କ ଅନୁପସ୍ଥିତିରେ ସେ ଖବରକାଗଜ ବାଣ୍ଟିଥାନ୍ତି। ଗଣେଶ କୁହନ୍ତି ଖବରକାଗଜ ବିତରଣ ଦିନଠାରୁ ଲୋକଙ୍କ ସହ ସମ୍ପର୍କ ଯୋଡି ହୋଇଯାଇଛି। ପ୍ରତିଦିନ ପିଲାଠାରୁ ବୟସ୍କ ସମସ୍ତଙ୍କ ସହ ଦେଖା ହୋଇ ଖବରକାଗଜ ଦେବା ସମୟରେ ଦୁଇ ପଦ କଥା ହୋଇ କାମ ଚାଲିଥାଏ। ଏହାରି ମଧ୍ୟରେ ଅନେକ ପରିବର୍ତ୍ତନ ଆସିଲାଣି। ପୂର୍ବରୁ ଲୋକେ ଖବରକାଗଜକୁ ଚାହିଁ ରହୁଥିଲେ। ବିଳମ୍ବ ହେଲେ କେତେବେଳେ ଆସିବ ବୋଲି ଫୋନ ଯୋଗେ ପଚାରୁଥିଲେ। କରୋନା ମହାମାରୀ ପରଠାରୁ ଖବରକାଗଜ ଚାହିଦା କିଛିଟା କମିଥିଲା। ଏବେ ସାମାନ୍ୟ ସୁଧାର ଆସିଥିବା ବେଳେ ଲୋକେ ଖବରକାଗଜ ପାଇଁ ଅପେକ୍ଷା କରିରହୁଛନ୍ତି।
ସୂଚନାଯୋଗ୍ୟ, ଯୁବବସ୍ଥାରେ ଗଣେଶ କୋଲକତା ଚାଲିଯାଇଥିଲେ। ସେଠାରେ ଝୋଟ କଳରେ କାମ କରୁଥିଲେ। ପରେ ତାହା ବନ୍ଦ ହୋଇଯିବାରୁ ଖୋର୍ଦ୍ଧାକୁ ଚାଲି ଆସିଥିଲେ। କିଛିଦିନ ଖୋର୍ଦ୍ଧା ସ୍ପିନିଙ୍ଗ ମିଲରେ କାମ କରିଥିଲେ। ପରେ ନୟାଗଡରୁ ଆସି ଖବରକାଗଜ ବିତରଣ କରୁଥିବା ବିତରକ ବୈକୁଣ୍ଠଙ୍କ ସହ ସାକ୍ଷାତ ହୋଇ ପରବର୍ତ୍ତୀ ମୁହୂର୍ତ୍ତରେ ଗଣେଶ ମଧ୍ୟ ଖବରକାଗଜ ବାଣ୍ଟିବା କାର୍ଯ୍ୟ କରିଥିଲେ। ଧୀରେ ଧୀରେ ଏହି କାର୍ଯ୍ୟକୁ ନିଜର ପେସା ଭାବେ ଗ୍ରହଣ କରିନେଇଥିଲି। ଏହି ପେସା ଜୀବନର ଏକ ଅଙ୍ଗ ପାଲଟି ଯାଇଛି ବୋଲି ଗଣେଶ କୁହନ୍ତି।
