ଭୁବନେଶ୍ୱର, ୧୨।୧୦(ବ୍ୟୁରୋ): ଆଜିର ସମୟରେ ଗଣମାଧ୍ୟମର ଗୁରୁତ୍ୱ ବଢିଛି। ହେଲେ ଖବରକାଗଜ ଚଳାଇବା ଏକ କଠିନ କାମ ପାଲଟିଛି। ଯେଉଁ ଗଣମାଧ୍ୟମ ବିଭିନ୍ନ ପରିସ୍ଥିତି ଦେଇ ନିଜକୁ ପ୍ରତିଷ୍ଠିତ କରିପାରିବ, ତା’ର ବିଶ୍ବସନୀୟତା ବଢିବ। ଯଦି ଗଣମାଧ୍ୟମ କୌଣସି ବ୍ୟବସାୟିକ ମଡେଲ ଭିତରେ ନିଜକୁ ସୀମିତ ରଖିବ, ତେବେ ଆଜି ନ ହେଲେ କାଲି କେହି ତାହାକୁ କିଣିବା ଲାଗି ଚାଲିଆସିବେ ବୋଲି ବରିଷ୍ଠ ସାମ୍ବାଦିକ ତଥା ରାଜନେତିକ ସମୀକ୍ଷକ ପୁଣ୍ୟ ପ୍ରସୂନ ବାଜପେୟୀ କହିଛନ୍ତି। ମଙ୍ଗଳବାର ରେଳ ଅଡିଟୋରିୟମ୍ଠାରେ ସମ୍ବାଦର ୩୮ତମ ଓ କନକ ନ୍ୟୁଜ୍ର ତ୍ରୟୋଦଶ ବାର୍ଷିକୋତ୍ସବ ଅନୁଷ୍ଠିତ ହୋଇଥିଲା। ମୁଖ୍ୟ ଅତିଥିଭାବେ ଯୋଗଦେଇ ବାଜପେୟୀ କହିଲେ, ଟେଲିଭିଜନ ଆପଣଙ୍କ ମସ୍ତିଷ୍କକୁ ପ୍ରଭାବିତ କରିଥାଏ। ମାତ୍ର ଖବରକାଗଜରେ ପ୍ରକାଶିତ ହେଉଥିବା ଶବ୍ଦ ଜଣେ ବ୍ୟକ୍ତିକୁ ସୃଜନଶୀଳ କରିଥାଏ। କଂଗ୍ରେସ ସମୟରେ ଗଣମାଧ୍ୟମକୁ ଉପଦେଶାବଳୀ ଆସୁଥିଲା, ଏବେ ସଂମ୍ପାଦକ ହିଁ ନିଜେ ସରକାର ହୋଇଯାଇଛନ୍ତି। ୨୦୧୪ରେ ପ୍ରଧାନମନ୍ତ୍ରୀ ମୋଦୀ କେନ୍ଦ୍ରୀୟ ହଲ୍ରେ ଛିଡା ହୋଇ ସଂସଦରେ ଯେତେ ଦାଗୀ ସାଂସଦ ଓ ନେତା ରହିଛନ୍ତି ସେମାନଙ୍କ ମାମଲା ଶେଷ କରିବା ଲାଗି ସୁପ୍ରିମକୋର୍ଟଙ୍କୁ ନିବେଦନ କରିଥିଲେ। ମାତ୍ର ୨୦୧୯ରେ ନିର୍ବାଚିତ ଦାଗୀ ନେତାଙ୍କ ସଂଖ୍ୟା ୨୦୧୪ ତୁଳନାରେ ବଢିଗଲାଣି। ସେହିଭଳି ପ୍ରଧାନମନ୍ତ୍ରୀଙ୍କ ଭାଷଣ ବି ମଜାରେ ପରିଣତ ହୋଇଗଲାଣି। ଏଭଳି ପରିସ୍ଥିତିରେ ଖବରକାଗରେ ପ୍ରକାଶିତ ହେଉଥିବା ସମ୍ପାଦକୀୟ, ସିବିଆଇ, ଇଡିରେ ରେଡ୍କୁ ଲୋକେ ମଜାରେ ନେବା ଆରମ୍ଭ କରିଦେବେ ବୋଲି ବାଜପେୟୀ କହିଛନ୍ତି। ଉତ୍ସବରେ ସଭାପତିତ୍ୱ କରି ସମ୍ବାଦ ସମ୍ପାଦକ ସୌମ୍ୟରଞ୍ଜନ ପଟ୍ଟନାୟକ କହିଲେ, ବିଜ୍ଞାପନଦାତା ଖବରକାଗଜର ନିୟନ୍ତ୍ରକ ହେବା ଉଚିତ୍ ନୁହେଁ, ଗ୍ରାହକମାନେ ଖବରକାଗଜର ମାଲିକ ହେବା ଦରକାର। କାର୍ଯ୍ୟକ୍ରମରେ ନିର୍ବାହୀ ନିର୍ଦ୍ଦେଶକ ତନୟା ପଟ୍ଟନାୟକ, ପରିଚାଳନା ନିର୍ଦ୍ଦେଶିକା ମୋନିକା ନାୟାର ପଟ୍ଟନାୟକ ଉପସ୍ଥିତ ଥିଲେ। ଫିଚର ସମ୍ପାଦକ ଗୌରହରି ଦାସ ସ୍ବାଗତ ଭାଷଣ ଓ ଅତିଥି ପରିଚୟ ପ୍ରଦାନ କରିଥିଲେ।
