ଅକ୍ଲାଣ୍ଡ, ୧୮।୧୨- ସ୍ଥାନୀୟ ଇଡେନ ପାର୍କଠାରେ ଅନୁଷ୍ଠିତ ପାକିସ୍ତାନ ବିପକ୍ଷ ପ୍ରଥମ ଟି୨୦ ମ୍ୟାଚ୍କୁ ଅତି ସହଜରେ ୫ ଉଇକେଟରେ ଜିତି ନେଇଛି ନ୍ୟୁଜିଲାଣ୍ଡ। ଏହି ବିଜୟ ସହ ଘରୋଇ ଦଳ ୩ ମ୍ୟାଚ୍ ବିଶିଷ୍ଟ ସିରିଜ୍ରେ ୧-୦ର ଅଗ୍ରଣୀ ହାସଲ କରିଛି। ମ୍ୟାଚ୍ରେ ସର୍ବାଧିକ ଉଇକେଟ ନେଇଥିବା ଘରୋଇ ବୋଲର ଜ୍ୟାକବ ଡଫି ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି।
ପ୍ରଥମ ବ୍ୟାଟିଂ କରିଥିବା ପାକିସ୍ତାନ ପାଇଁ ଘାତକ ସାବ୍ୟସ୍ତ ହୋଇଥିଲେ ନ୍ୟୁଜିଲାଣ୍ଡର ଯୁବ ପେସର ଜ୍ୟାକବ ଡଫି। ସେ ପ୍ରାରମ୍ଭିକ ୪ ଉଇକେଟ ନେଇ ପାକିସ୍ତାନ ଦଳକୁ ବ୍ୟାକ୍ ଫୁଟକୁ ଠେଲି ଦେଇଥିଲେ। ଏହାପରେ ଅଧିନାୟକ ଶାଦବ ଖାନ (୪୨) ଓ ଫହିମ ଅଶ୍ରଫ (୩୧)ଙ୍କ ଯୋଗୁ ସମ୍ମାନଜନକ ସ୍କୋର ଛିଡ଼ା କରିପାରିଥିଲା ଭ୍ରମଣକାରୀ ଦଳ। ପାକିସ୍ତାନ ପୂରା ୨୦ ଓଭରରେ ୯ ଉଇକେଟ ହରାଇ ୧୫୩ ରନ୍ କରିବାକୁ ସକ୍ଷମ ହୋଇଥିଲା। ସ୍କଟ୍ କୁଗ୍ଲେଜିନ୍ ୩ ଓ ଇଶ ସୋଧି ଗୋଟିଏ ଉଇକେଟ ହାତେଇଥିଲେ। ଜବାବରେ ଟିମ ସେଫର୍ଟ (୫୭ ରନ୍, ୬ ଚୌକା ଓ୧ ଛକା)ଙ୍କ ଅର୍ଦ୍ଧଶତକ ଓ ମାର୍କ ଚାମ୍ପମ୍ୟାନ (୩୪)ଙ୍କ ପାଳି ବଳରେ ନ୍ୟୁଜିଲାଣ୍ଡ ୧୮.୫ ଓଭରରେ ୫ ଉଇକେଟ ବିଜୟ ଲକ୍ଷ୍ୟ ହାସଲ କରିଥିଲା। ପାକିସ୍ତାନ ପକ୍ଷରୁ ହାରିସ ରଫ ୩ ଓ ଶାହିନ ଆଫ୍ରିଦୀ ୨ ଉଇକେଟ ଅକ୍ତିଆର କରିଥିଲେ।
