ଖ୍ରୀଷ୍ଟଚର୍ଚ୍ଚ,୨୩।୧୨: ବାଂଲାଦେଶ ବିପକ୍ଷ ଘରୋଇ ଟେଷ୍ଟ ସିରିଜ ପାଇଁ ନ୍ୟୁଜିଲାଣ୍ଡ ୧୩ ଜଣିଆ ଦଳ ଘୋଷଣା କରିଛି। ହେଲେ ଆଶ୍ଚର୍ଯ୍ୟନକ ଭାବେ ସ୍ପିନର ଏଜାଜ ପଟେଲ ଏହି ଦଳରେ ସ୍ଥାନ ପାଇ ନାହାନ୍ତି। ଭାରତ ଗସ୍ତରେ ଏକ ଟେଷ୍ଟର ଗୋଟିଏ ଇନିଂସରେ ସେ ସବୁ ୧୦ଟି ଯାକ ଉଇକେଟ ହାସଲ କରି ରେକର୍ଡ ବୁକ୍ରେ ସ୍ଥାନ ପାଇଥିଲେ ମଧ୍ୟ ତାଙ୍କୁ ଦଳରେ ସାମିଲ କରାଯାଇ ନାହିଁ।
ଇଂଲଣ୍ଡର ଜିମ ଲେକର ଓ ଭାରତର ଅନିଲ କୁମ୍ବଲେଙ୍କ ପରେ ଏଜାତ ତୃତୀୟ ବୋଲର ଭାବେ ଟେଷ୍ଟ ଇତିହାସରେ ଗୋଟିଏ ଇନିଂସରେ ସବୁ ୧୦ଟି ଯାକ ଉଇକେଟ ଅକ୍ତିଆର କରିଥିଲେ। ଚଳିତ ମାସ ପ୍ରାରମ୍ଭରେ ଅନୁଷ୍ଠିତ ଭାରତ ବିପକ୍ଷ ଦ୍ୱିତୀୟ ଟେଷ୍ଟରେ ସେ ୧୧୯ ରନ ଦେଇ ୧୦ ଉଇକେଟ ଅକ୍ତିଆର କରିଥିଲେ। ବାଂଲାଦେଶ ବିପକ୍ଷରେ ନ୍ୟୁଜିଲାଣ୍ଡ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳିବ। ଜାନୁୟାରୀ ୧ ତାରଖରୁ ପ୍ରଥମ ଟେଷ୍ଟ ଆରମ୍ଭ ହେବ। ଏହି ଦଳରେ ଦ୍ରୁତ ବୋଲର ଟ୍ରେଣ୍ଟ ବୋଲ୍ଟ, ଟିମ୍ ସୌଦି, କାଏଲ ଜେମିସନ, ନିଲ ଓ୍ବାଗନର ଓ ମ୍ୟାଟ ହେନରୀଙ୍କ ସମେତ ମିଡିୟମ ପେସର ଅଲରାଉଣ୍ଡର ଡାରିଲ ମିଚେଲ ଏବଂ ସ୍ପିନ ଅଲରାଉଣ୍ଡର ରଚିନ ରବୀନ୍ଦ୍ର ସ୍ଥାନ ପାଇଛନ୍ତି। ପ୍ରଥମ ଟେଷ୍ଟ ମାଉଣ୍ଟ ମାଉନଗାନୁଇ ଓ ଖ୍ରୀଷ୍ଟଚର୍ଚ୍ଚର ହଗଲି ଓଭାଲ ଗ୍ରାଉଣ୍ଡରେ ଖେଳାଯିବ।
ସ୍ଥିତିକୁ ଦୃଷ୍ଟିରେ ରଖି ଏକ ଶ୍ରେଷ୍ଠ ଦଳ ଚୟନ କରିବା ଆମର ଲକ୍ଷ୍ୟ। ତେଣୁ ରେକର୍ଡ ବ୍ରେକିଂ ପ୍ରଦର୍ଶନ ସତ୍ତ୍ୱେ ଏଜାଜଙ୍କୁ ଏହି ଦଳରେ ସ୍ଥାନ ମିଳିନାହିଁ ବୋଲି ନ୍ୟୁଜିଲାଣ୍ଡ କୋଚ୍ ଗ୍ୟାରୀ ଷ୍ଟେଡ କହିଛନ୍ତି। ଡାରିଲ ଓ ରଚିନ ସାମିଲ ହୋଇଥିବାରୁ ଦଳର ସନ୍ତୁଳନରେ ଉନ୍ନତି ଆସିବ ବୋଲି ସେ କହିଛନ୍ତି। କେନ୍ ଓ୍ବିଲିୟମସନଙ୍କ ଅନୁପସ୍ଥିତିରେ ଟିମ୍ ଲାଥମ ଦଳର ନେତୃତ୍ୱ ନେବେ। ଏଲବୋ ଇଞ୍ଜୁରି କାରଣରୁ ଓ୍ବିଲିୟମସନ ସିରିଜ ବାଦ୍ ପଡିଛନ୍ତି। ବ୍ୟାଟ୍ସମ୍ୟାନ ଡେଭନ କନଓ୍ବେ ପ୍ରତ୍ୟାବର୍ତ୍ତନ କରିଛନ୍ତି। ଗତମାସରେ ଅନୁଷ୍ଠିତ ଟି୨୦ ବିଶ୍ୱକପ୍ ଖେଳିବା ଅବସରରେ ତାଙ୍କ ହାତ ଭାଙ୍ଗି ଯାଇଥିଲା। ଓ୍ବିଲିୟମସନଙ୍କ ଅନୁପସ୍ଥିତିରେ ଲାଥମ ଦଳରେ ନେତୃତ୍ୱ ନେବାରେ ସଫଳ ହେବେ ବୋଲି ଷ୍ଟେଡ୍ ଆଶା ପ୍ରକାଶ କରିଛନ୍ତି।
ନ୍ୟୁଜିଲାଣ୍ଡ ଦଳ: ଟମ୍ ଲାଥମ (ଅଧିନାୟକ), ଟମ୍ ବ୍ଲଣ୍ଡେଲ, ଟ୍ରେଣ୍ଟ ବୋଲ୍ଟ, ଡେଭନ କନଓ୍ବେ, ମ୍ୟାଟ୍ ହେନେରୀ, କାଲଏ ଜେମିସନ, ଡାରିଲ ମିଚେଲ, ହେନେରୀ ନିକୋଲ୍ସ, ରଚିନ ରବୀନ୍ଦ୍ର, ଟିମ ସୌଦି, ରସ ଟେଲର, ନିଲ ଓ୍ବାଗନର ଓ ଓ୍ବିଲ ୟଙ୍ଗ୍।
