ନୂଆଦିଲ୍ଲୀ,୩୦।୬: ହ୍ୱାଟ୍ସଆପ୍ ବ୍ୟବହାରକାରୀଙ୍କ ପାଇଁ ଏକ ବହୁତ ବଡ଼ ଖବର ସାମ୍ନାକୁ ଆସିଛି! ଏଣିକି କାହା ସହିତ ଚାଟ୍ କରିବା ପାଇଁ ଆପଣଙ୍କୁ ନିଜର ବ୍ୟକ୍ତିଗତ ମୋବାଇଲ୍ ନମ୍ବର ସେୟାର କରିବାକୁ ପଡ଼ିବ ନାହିଁ। ଆଜ୍ଞା ହଁ, ହ୍ୱାଟ୍ସଆପ୍ ଏଭଳି ଏକ ନୂଆ ଫିଚର୍ ରୋଲ୍ ଆଉଟ୍ କରିବା ଆରମ୍ଭ କରିଦେଇଛି, ଯାହା ଆପଣଙ୍କ ପ୍ରାଇଭେସି (ଗୋପନୀୟତା)କୁ ସମ୍ପୂର୍ଣ୍ଣ ଭାବେ ବଦଳାଇ ଦେବ।
ବାସ୍ତବରେ, ହ୍ୱାଟ୍ସଆପ୍ ଆନୁଷ୍ଠାନିକ ଭାବେ ଏହି ନୂଆ ଫିଚର୍ର ସୁଭାରମ୍ଭ କରିଦେଇଛି। ଏବେ ଆପଣ ନିଜ ନମ୍ବର ସେୟାର ନକରି, କେବଳ ଏକ ‘ୟୁଜରନେମ୍’ (Username) ଜରିଆରେ ଯେକୌଣସି ବ୍ୟକ୍ତିଙ୍କ ସହ ଚାଟ୍ ଆରମ୍ଭ କରିପାରିବେ।
ଏହି ଫିଚର୍ଟି ମୂଳତଃ ୟୁଜର୍ସଙ୍କ ପ୍ରାଇଭେସିକୁ ବଢ଼ାଇବା ପାଇଁ ଅଣାଯାଇଛି। ଏହା ଅଧୀନରେ, ପ୍ରତ୍ୟେକ ୟୁଜର୍ ନିଜ ପାଇଁ ଏକ ସ୍ୱତନ୍ତ୍ର (Unique) ୟୁଜରନେମ୍ ସଂରକ୍ଷିତ କରିପାରିବେ ଠିକ୍ ଯେମିତି ଆପଣ ଇନଷ୍ଟାଗ୍ରାମ କିମ୍ବା ଟ୍ୱିଟରରେ କରନ୍ତି। କେବଳ ସେତିକି ନୁହେଁ, ଅଧିକ ସୁରକ୍ଷା ପାଇଁ ଆପଣଙ୍କୁ ଏକ ‘Username Key’ ଅର୍ଥାତ୍ ପିନ୍ (PIN) ର ବିକଳ୍ପ ମଧ୍ୟ ମିଳିବ। ଏହାର ଫାଇଦା ଏହା ହେବ ଯେ, କୌଣସି ଅଜଣା ବ୍ୟକ୍ତି କେବଳ ଆପଣଙ୍କ ୟୁଜରନେମ୍ ଜାଣି ଆପଣଙ୍କୁ ସିଧାସଳଖ ହଇରାଣ କରିପାରିବେ ନାହିଁ କିମ୍ବା ଯୋଗାଯୋଗ କରିପାରିବେ ନାହିଁ।
ଅନେକ ଲୋକଙ୍କ ମନରେ ଏହି ପ୍ରଶ୍ନ ଥିବ ଯେ, କଣ କେହି ବି ଆମ ୟୁଜରନେମ୍ ସର୍ଚ୍ଚ କରି ଆମକୁ ଖୋଜି ପାଇବେ? ତେବେ ଏହାର ଉତ୍ତର ହେଉଛି — ନା। ହ୍ୱାଟ୍ସଆପ୍ରେ କୌଣସି ପବ୍ଲିକ୍ ୟୁଜରନେମ୍ ସର୍ଚ୍ଚ ଡାଇରେକ୍ଟ୍ରି ରହିବ ନାହିଁ। ଅର୍ଥାତ୍, ଯଦି କାହାକୁ ଆପଣଙ୍କ ସହ ସଂଯୁକ୍ତ ହେବାକୁ ଅଛି, ତେବେ ତାଙ୍କୁ ଆପଣଙ୍କର ସମ୍ପୂର୍ଣ୍ଣ ସଠିକ୍ ୟୁଜରନେମ୍ ଜାଣିବା ଜରୁରୀ ଅଟେ।ଏଠାରେ ମନେ ରଖିବାକୁ ହେବ ଯେ, ଆକାଉଣ୍ଟ ତିଆରି କରିବା ଏବଂ ଭେରିଫିକେସନ୍ ପାଇଁ ମୋବାଇଲ୍ ନମ୍ବର ପୂର୍ବଭଳି ହିଁ ଜରୁରୀ ରହିବ। ୟୁଜରନେମ୍ର ବ୍ୟବହାର କେବଳ ଯୋଗାଯୋଗ କରିବା ଏବଂ ଚାଟ୍ କରିବା ପାଇଁ ହେବ। ଆପଣଙ୍କୁ ଜଣାଇ ଦେଉଛୁ ଯେ, ଟେଲିଗ୍ରାମ୍ ଭଳି ଆପ୍ସ ପୂର୍ବରୁ ହିଁ ଏହିଭଳି ସୁବିଧା ଦେଉଛନ୍ତି, ଏବଂ ଏବେ ହ୍ୱାଟ୍ସଆପ୍ ମଧ୍ୟ ସେହି ବାଟରେ ଚାଲିଛି।
ଯଦିଓ ପ୍ରଥମ ଦେଖାରେ ଏହି ଫିଚର୍ ପ୍ରାଇଭେସି ପାଇଁ ଚମତ୍କାର ମନେ ହୋଇପାରେ, କିନ୍ତୁ ଟେକ୍ ବିଶେଷଜ୍ଞ ଏବଂ ସୁରକ୍ଷା ଏଜେନ୍ସିଗୁଡ଼ିକ ଏହାକୁ ନେଇ ଏକ ବଡ଼ ଆଲର୍ଟ ଜାରି କରିଛନ୍ତି। ବିଶେଷଜ୍ଞଙ୍କ ଅନୁଯାୟୀ, ଏହି ଫିଚର୍ ଦ୍ୱାରା ସାଇବର ସ୍କାମ୍ (ଠକେଇ)କୁ ବହୁତ ବଡ଼ ପ୍ରୋତ୍ସାହନ ମିଳିପାରେ।
