ବ୍ରହ୍ମପୁର,୮ା୬(ସୁବାସ ଚନ୍ଦ୍ର ପାଢ଼ୀ): ବ୍ରହ୍ମପୁର ଟାଉନ ଥାନା ଅଧୀନ ବିଜିପୁର ସୁନ୍ଦରନଗର ପୋଲିସ କଲୋନିରେ କନ୍ଷ୍ଟେବଲ ଆଶୁତୋଷ ମୃଦଙ୍ଗିଆ ପୋଡ଼ି ହେବା ଘଟଣାରେ ତାଙ୍କ କନ୍ଷ୍ଟେବଲ ସ୍ତ୍ରୀ ଓ ଶାଳକଙ୍କ ନାଁରେ ହତ୍ୟା ଉଦ୍ୟମ ମାମଲା ରୁଜୁ ହୋଇଛି।
ଗତ ୫ ତାରିଖ ରାତି ସାଢ଼େ ୯ଟାରେ କ୍ୱାର୍ଟର୍ସ ଆଗରେ ଆଶୁତୋଷଙ୍କ ଦେହରେ ନିଆଁ ଲାଗିଥିବା ଦେଖାଯାଇଥିଲା। ଭାଇଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇ ହତ୍ୟା ଉଦ୍ୟମ କରାଯାଇଛି ବୋଲି ଆଶୁତୋଷଙ୍କ ଭଉଣୀ ନିବେଦିତା ଟାଉନ ଥାନାରେ ଅଭିଯୋଗ କରିଥିଲେ।
ଅଭିଯୋଗକୁ ଭିତ୍ତିକରି ପୋଲିସ ଏକ ହତ୍ୟା ଉଦ୍ୟମ ମାମଲା ମାମଲା(ନଂ.୨୪୭/୨୬) ରୁଜୁ କରି ତଦନ୍ତ ଆରମ୍ଭ କରିଛି। ମାଜିଷ୍ଟ୍ରେଟ ଓ ଡାକ୍ତରଙ୍କ ଉପସ୍ଥିତିରେ ମୃତ୍ୟୁ ସହ ସଂଘର୍ଷ କରୁଥିବା ଆଶୁତୋଷଙ୍କ ବୟାନ ପୋଲିସ ରେକର୍ଡ କରିଛି। ଘଟଣାର ସମସ୍ତ ପାରିପାର୍ଶ୍ୱିକ ଦିଗକୁ ନେଇ ସାଇଣ୍ଟିଫିକ ପଦ୍ଧତିରେ ତଦନ୍ତ ଜାରି ରହଥିବା ବ୍ରହ୍ମପୁର ଏସ୍ପି ଡା. ସର୍ବଣା ବିବେକ ଏମ୍. ପୋଲିସ ମୁଖ୍ୟାଳୟରେ ଅନୁଷ୍ଠିତ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
ବ୍ରହ୍ମପୁର ଏସ୍ଡିପିଓ ଘଟଣାର ସୁପରଭିଜନ କରୁଛନ୍ତି। ପୋଲିସ ଓ ସାଇଣ୍ଟିଫିକ ଟିମ ଘଟଣାସ୍ଥଳରୁ ଦରପୋଡ଼ା ବୋତଲ, ଦିଆସିଲ, ଆଶୁତୋଷଙ୍କ ମୋବାଇଲ ଫୋନ୍ ଓ ବାଇକ ଜବତ କରି ସେ ଦିଗରେ ତଦନ୍ତ କରୁଛି। ସେଠାରୁ ଫିଙ୍ଗରପ୍ରିଣ୍ଟ ମଧ୍ୟ ସଂଗ୍ରହ କରାଯାଇଛି। ପେଟ୍ରୋଲ କିଏ ନେଇଥିଲା, କନ୍ଷ୍ଟେବଲଙ୍କ ଦେହରେ ନିଆଁ କିପରି ଲାଗିଥିଲା ତାହା ଜାଣିବା ପାଇଁ ସିସିଟିଭି ଯାଞ୍ଚ କରାଯାଉଛି।
ସନ୍ଧ୍ୟା ନାୟକ ରହୁଥିବା ଘରର ପଡ଼ୋଶୀ ଓ ଉକ୍ତ କଲୋନିରେ ରହୁଥିବା ପୋଲିସ କର୍ମଚାରୀ ଓ ତାଙ୍କ ପରିବାର ଲୋକଙ୍କ ପୃଥକ ଭାବେ ବୟାନ ରେକର୍ଡ କରାଯାଇଛି। ସନ୍ଧ୍ୟା ନାୟକ ଓ ତାଙ୍କ ଭାଇ ଟାଉନ ଥାନାରେ ହାଜର ହୋଇ ନିଜର ବୟାନ ଦେଇଛନ୍ତି। ବୟାନର ସତ୍ୟତାକୁ ତଦନ୍ତ କରାଯାଉଛି। ଆବଶ୍ୟକ ପଡ଼ିଲେ କ୍ରାଇମବ୍ରାଞ୍ଚର ସହାୟତା ନିଆଯିବ ବୋଲି ଏସ୍ପି କହିଛନ୍ତି।
