ନୂଆଦିଲ୍ଲୀ,୭।୪: ଆଇପିଏଲ୍ ୨୦୨୧ ପାଇଁ ଖେଳାଳି ନିଲାମ ପ୍ରକ୍ରିୟାରେ ୨୦ ଲକ୍ଷ ଟଙ୍କା ଦେଇ ଭେଙ୍କଟେଶ ଅୟରଙ୍କୁ କିଣିଛି କୋଲକାତା ନାଇଟ୍ ରାଇଡର୍ସ। ୨୬ ବର୍ଷୀୟ ଏହି ଖେଳାଳି ମଧ୍ୟପ୍ରଦେଶର ଇନ୍ଦୋରରେ ଜନ୍ମ ନେଇଥିଲେ। ଆସନ୍ତା ଆଇପିଏଲ୍ରେ ପ୍ରଥମ ଥର ପାଇଁ ଖେଳିବାକୁ ଯାଉଥିବାରୁ ବେଶ ଉତ୍ସାହିତ ଅଛନ୍ତି ଭେଙ୍କଟେଶ। ନିକଟରେ ଅଭ୍ୟାସ ମ୍ୟାଚ୍ ସମୟରେ ସେ ଭଲ ଖେଳିବା ସହ ୩ ଉଇକେଟ ନେଇଥିଲେ।
ତେବେ ଭେଙ୍କଟେଶଙ୍କ ପିଲାଦିନ ଇନ୍ଦୋରର ଏକ ସାଧାରଣ ପରିବାରରେ ବିତିଛି। ପିଲାଟିବେଳୁ ସେ କ୍ରିକେଟ ଖେଳିବାକୁ ଭଲ ପାଉଥିଲେ। ସାତ-ଆଠ ବର୍ଷ ପରେ ସେ ଏହାକୁ ବୃତ୍ତିଗତ ଭାବେ ଖେଳିବାକୁ ଆଗ୍ରହ ପ୍ରକାଶ କରିଥିଲେ। ୧୦ ବର୍ଷ ବୟସରେ ସେ କ୍ରିକେଟ କ୍ଲବରେ ଯୋଗ ଦେଇଥିଲେ। ଧିରେ ଧିରେ କ୍ରିକେଟ ପ୍ରେମରେ ସେ ପଡ଼ିଯାଇଥିଲେ। ଖେଳିବା ବେଳେ ମଜା ଲାଗିବା କାରଣରୁ ସେ କ୍ୟାରିୟର କରିବାକୁ ନିଶ୍ଚିତ କରିଥିଲେ ବୋଲି ଭେଙ୍କଟେଶ କୁହନ୍ତି। ଭେଙ୍କଟେଶ ପୂର୍ବ ଅଧିନାୟକ ତଥା ଅଭିଜ୍ଞ ବ୍ୟାଟ୍ସମ୍ୟାନ ସୌରଭ ଗାଙ୍ଗୁଲି ଏବଂ ଇଂଲଣ୍ଡର ପୂର୍ବ ଅଧିନାୟକ ଏଲେଷ୍ଟର କୁକଙ୍କୁ ନିଜର ପ୍ରେରଣା ବୋଲି ଭାବନ୍ତି।
ଅଣ୍ଡର-୧୯ ଦଳ ପାଇଁ ସେ ଉଇକେଟକିପର ଭାବେ କାମ କରୁଥିଲେ। ଏଣୁ ସେ ଜଣେ ଉଇକେଟକିପର ବ୍ୟାଟ୍ସମ୍ୟାନ ହେବାକୁ ଚାହୁଁଥିଲେ। ହେଲେ ଏକଦା ମ୍ୟାଚ୍ରେ ସେ ବୋଲିଂ କରିଥିଲେ। ପରେ ସେ ଅଭ୍ୟାସ କରି ସଫଳ ବୋଲର ପାଲଟିଥିଲେ। ଉକ୍ତ ମ୍ୟାଚ୍ ହିଁ ତାଙ୍କ ଜୀବନର ଗତିପଥ ବଦଳାଇ ଦେଇଥିଲା ବୋଲି ସେ କୁହନ୍ତି। ଏବେ ସେ ଅଲରାଉଣ୍ଡର ପାଲଟିଛନ୍ତି। ପଡ଼ିଆରେ ତାଙ୍କର ଫାଇଦା କେକେଆର୍ ଉଠାଇବ ବୋଲି ଆଶା କରାଯାଉଛି।
