ବେଙ୍ଗାଲୁରୁ,୧୨।୩ : ସୋସିଆଲ ମିଡିଆରେ ଭିଡିଓରେ ଜମାଟୋ ଡେଲିଭରି ବୟଙ୍କ ଦ୍ୱାରା ଆକ୍ରମଣର ଶୀକାର ହୋଇଥିବା ବେଙ୍ଗାଲୁରୁର ଜଣେ ମହିଳା ଅଭିଯୋଗ ଆଣିବାର ଦୁଇ ଦିନ ପରେ ନିଜ ପକ୍ଷ ରଖିଛନ୍ତି କାମରାଜ ( ଡେଲିଭରି ବୟ)। ଏହି ଘଟଣାର ତଦନ୍ତ ଜାରି ରହିଥିବାବେଳେ ଦୁଇ ଭାଗରେ ବିଭକ୍ତ ହୋଇଯାଇଛନ୍ତି ସୋସିଆଲ ମିଡିଆ ୟୁଜର୍ସ। ଅଭିଯୁକ୍ତ କାମରାଜ କହିଛନ୍ତି, ମହିଳା ଜଣଙ୍କ ପ୍ରଥମେ ଗାଳି କରିବା ସହ ଚପଲରେ ମାରିଥିଲେ। ଆଉ ଏହା ସମ୍ପୂର୍ଣ୍ଣ ମିଛ ବୋଲି କହିଛନ୍ତି କଥାକଥିତ ପୀଡ଼ିତା ହିତେଶ ଚନ୍ଦ୍ରାଣି। ଏହି ଘଟଣାରେ ଜମାଟୋ ଉଭୟଙ୍କୁ ସମର୍ଥନ କରୁଛି।
କଣ୍ଟେଣ୍ଟ ରାଇଟର ଭାବେ ବେଙ୍ଗାଲୁରୁରେ କାର୍ଯ୍ୟ କରୁଥିବା ଚନ୍ଦ୍ରାଣୀ ଗତ ବୁଧବାର ନାକରୁ ରକ୍ତ ବାହାରୁ ଥିବା ଏକ ଭିଡିଓ ଟୁଇଟରରେ ଶେୟାର କରିଥିଲେ। ଆଉ ଜମାଟୋର ଡେଲିଭରି ବୟ କାମରାଜଙ୍କ ଆକ୍ରମଣରେ ସେ ଲହୁଲୁହାଣ ହୋଇଥିବା କରିଥିଲେ ଅଭିଯୋଗ।
ମହିଳାଙ୍କ ଅଭିଯୋଗକୁ ଖଣ୍ଡନ କରିବା ସହ ପ୍ରଥମେ ଗାଳି ଦେଇ ନ ଥିବା କହିଛନ୍ତି କାମରାଜ। ଡେଲିଭରିରେ ବିଳମ୍ବ ହେବାରୁ ପ୍ରଥମେ ଗାଳି ଦେଇଥିଲେ ମହିଳା। ଆଉ ଅର୍ଡର କରିଥିବା ଖାଦ୍ୟ ନେଲା ପରେ ମଧ୍ୟ ପେମେଣ୍ଟ କରି ନ ଥିଲେ। ମୁଁ ଖାଦ୍ୟ ଫେରାଇ ଦେବାକୁ କହିବାରୁ ମୋତେ ପିଟିଲେ ଚପଲରେ। ଦୁର୍ଘଟଣାବଶତଃ ତଥାକଥିତ ପୀଡ଼ିତାଙ୍କ ନାକ ଫାଟି ଯାଇଥିଲା। ଏହାପରେ ମୁଁ କ୍ଷମା ପ୍ରାର୍ଥନା ମଧ୍ୟ କରିଥିଲି। ବାଧ୍ୟହୋଇ ମୁଁ ତାଙ୍କ ଟେବୁଲରୁ ଖାଦ୍ୟ ଉଠାଇ ଆଣିଥିଲି। ମୋତେ ସେ ଆକ୍ରମଣ କରିଥିଲେ। ଏଥି ଯୋଗୁ ଲିପ୍ଟ ବଦଳରେ ସିଡିରେ ମୁଁ ତଳକୁ ଆସିଥିଲି ବୋଲି କାନ୍ଦି କାନ୍ଦି କହିଛନ୍ତି ଡେଲିଭରୀ ବୟ କାମରାଜ। ତେବେ ଏହି ଘଟଣା ପରେ ଜମାଟୋ ତାଙ୍କୁ ନିଲମ୍ବିତ କରି ଦେଇଛି। କିନ୍ତୁ ତାଙ୍କ ଦରମା ବନ୍ଦ କରାଯାଇ ନାହିଁ । ଆଉ ଆଇନଗତ ଲଢ଼େଇରେ ସାଥିରେ ଛିଡ଼ା ହୋଇଛି ଜମାଟୋ। କାମରାଜ ଏପର୍ଯ୍ୟନ୍ତ ୫ ହଜାର ଡେଲିଭରି କରି ସାରିଛନ୍ତି ଓ ତାଙ୍କୁ ୫ରୁ ୪.୭୫ ରେଟିଂ ମିଳିଥିବା କମ୍ପାନୀ ପକ୍ଷରୁ କୁହାଯାଇଛି।
