ନୂଆଦିଲ୍ଲୀ: ଚଳିତ ଆର୍ଥତ୍କ ବର୍ଷ ଏପ୍ରିଲରୁ ଅଗଷ୍ଟ ମାସ ମଧ୍ୟରେ ନେଟ୍ ପ୍ରତ୍ୟକ୍ଷ ଟିକସ ସଂଗ୍ରହ ୩୧.୧% ହ୍ରାସ ଘଟିଛି। ଏହି ଅବଧିରେ ୧.୯୨ ଲକ୍ଷ କୋଟି ଟଙ୍କାର ଟିକସ ଆଦାୟ କରିବାକୁ ସରକାର ସକ୍ଷମ ହୋଇଥିବା ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ଠାକୁର ଲୋକ ସଭାକୁ ସୂଚନା ଦେଇଛନ୍ତି। ୨୦୧୮-୧୯ ଆର୍ଥତ୍କ ବର୍ଷର ଏହି ସମୟ ମଧ୍ୟରେ ୨.୭୯ ଲକ୍ଷ କୋଟି ଟଙ୍କାର ପ୍ରତ୍ୟକ୍ଷ ଟିକସ ସଂଗ୍ରହ ହୋଇଥିଲା। ସେହିଭଳି ଚଳିତ ଆର୍ଥତ୍କ ବର୍ଷ ଏପ୍ରିଲ-ଅଗଷ୍ଟ ସମୟରେ ପରୋକ୍ଷ ଟିକସ ସଂଗ୍ରହ ୧୧.୨୩% ହ୍ରାସ ଘଟି ୩.୪୨ ଲକ୍ଷ କୋଟି ଟଙ୍କା ରହିଛି। ଗତ ବର୍ଷ ସମାନ ସମୟ ଅବଧିରେ ୩.୮୬ ଲକ୍ଷ କୋଟି ଟଙ୍କାର ଟିକସ ପରୋକ୍ଷ ସଂଗ୍ରହ ହୋଇଥିଲା।
ଲୋକ ସଭାରେ ଲିଖିତ ଉତ୍ତରରେ ଠାକୁର କହିଛନ୍ତି ଯେ, ଚଳିତ ଆର୍ଥତ୍କ ବର୍ଷରେ ହାରାହାରି ଜିଏସ୍ଟି ସଂଗ୍ରହରେ କ୍ରମାଗତ ଭାବେ ହ୍ରାସ ଘଟି ଚାଲିଛି। ଗତ ବର୍ଷ ତୁଳନାରେ ଜିଏସ୍ଟି ସଂଗ୍ରହ ଆଖିଦୃଶିଆ ହୋଇ ପାରୁନାହିଁ। କୋଭିଡ ଲାଗି ବଜାର କ୍ଷତିଗ୍ରସ୍ତ ହୋଇଥିବାରୁ ଲକ୍ଡାଉନରେ ଟିକସଦାତା ବିଭିନ୍ନ ସମସ୍ୟା ସାମ୍ନା କରୁଥିବାରୁ ସରକାର ଟିକସ କ୍ଷେତ୍ରରେ ବିଭିନ୍ନ ପଦକ୍ଷେପ ଗ୍ରହଣ କରିଛନ୍ତି। ସୁଧଛାଡ, ବିଳମ୍ବ ଦେୟ ଏବଂ ରିଟର୍ନ ଫାଇଲିଂ ସୀମାକୁ ବଢାଯାଇଥିବା ସେ ସ୍ପଷ୍ଟ କରିଛନ୍ତି।
ସେ ଆହୁରି କହିଛନ୍ତି ଯେ, ଟିକସ ଅନୁପାଳନକୁ ବଢାଇବା ଦିଗରେ ସରକାର ନିରନ୍ତର ପ୍ରକ୍ରିୟା ଜାରି ରଖିଛନ୍ତି। ସିଷ୍ଟମ ଭିତ୍ତିକ ଆନାଲିଟିକାଲ ଟୁଲ୍, ସିଷ୍ଟମ ଜେନେରେଟେଡ ରେଡ ଫ୍ଲାଗ ରିପୋର୍ଟ ଉଭୟ କେନ୍ଦ୍ର ଏବଂ ରାଜ୍ୟ ସ୍ତରର ଟିକସ କର୍ତ୍ତୃପକ୍ଷଙ୍କୁ ସହ ବିନିମୟ ହେଉଛି। ଟିକସ ଠକେଇକୁ ରୋକିବା ଲାଗି କେନ୍ଦ୍ର ସରକାର କଡା କାର୍ଯ୍ୟାନୁଷ୍ଠାନ ଗ୍ରହଣ କରୁଥିବା ଠାକୁର ମତ ରଖିଛନ୍ତି।
