ନୂଆଦିଲ୍ଲୀ, ୨୦ା୧୧(ପି.ଟି.):ଭାରତ-ନେପାଳ ମଧ୍ୟରେ ନିକଟ ଅତୀତରେ ଦେଖାଦେଇଥିବା ବିବାଦ ଯୋଗୁ ଦ୍ୱିପାକ୍ଷିକ ସମ୍ପର୍କ ପ୍ରଭାବିତ ହୋଇଥିଲା। ଏହାକୁ ସୁଧାରିବା ଲାଗି ଦୁଇଦେଶ ଉଦ୍ୟମ ଆରମ୍ଭ କରୁଥିବାବେଳେ ନେପାଳରେ ପୁଣି ରାଜନୈତିକ ସଙ୍କଟ ସୃଷ୍ଟି ହୋଇଛି। ପ୍ରଧାନମନ୍ତ୍ରୀ କେ.ପି. ଶର୍ମା ଓଲିଙ୍କ ଇସ୍ତଫା ଲାଗି ପି.କେ. ଦହଲ ପ୍ରଚଣ୍ଡଙ୍କ ନେତୃତ୍ୱରେ ଶାସକ କମ୍ୟୁନିଷ୍ଟ ପାର୍ଟିର ବିଦ୍ରୋହୀ ଗୋଷ୍ଠୀ ଚାପ ପକାଇଛି। ସଙ୍କଟ ଟାଳିବା ଲାଗି ମଙ୍ଗଳବାର କାଠମାଣ୍ଡୁରେ ଥିବା ଚାଇନା ରାଷ୍ଟ୍ରଦୂତ ହୁ ୟାନ୍କି ପ୍ରଧାନମନ୍ତ୍ରୀ ଓଲିଙ୍କୁ ଭେଟିଥିଲେ। ତେବେ ସେମାନଙ୍କ ମଧ୍ୟରେ କ’ଣ ଆଲୋଚନା ହେଲା ଜଣାପଡିନାହିଁ। ଚଳିତ ମାସ ଶେଷ ଭାଗରେ ଭାରତର ବହିର୍ବ୍ୟାପାର ସଚିବ ହର୍ଷ ଶ୍ରିଙ୍ଗଲା ନେପାଳ ଗସ୍ତ କରିବାକୁ ଥିବାବେଳେ ନିଷ୍ପତ୍ତି ଚୂଡ଼ାନ୍ତ ହୋଇନାହିଁ। ଏଥିସହିତ ଦୁଇଦେଶର ବାଣିଜ୍ୟ ଓ ଶକ୍ତି ସଚିବଙ୍କ ମଧ୍ୟରେ ଭର୍ଚୁଆଲ ବୈଠକ ପାଇଁ ମଧ୍ୟ ଆଲୋଚନା ଚାଲିଛି। ସୀମା କାର୍ଯ୍ୟକାରୀ ଗ୍ରୁପ୍ର ବୈଠକ ଚଳିତ ମାସରେ କରିବା ଲାଗି ନେପାଳ ପ୍ରସ୍ତାବ ଦେଇଥିଲେ ହେଁ ମହାମାରୀ ଯୋଗୁ ଏହା ସମ୍ଭବ ହୋଇ ନ ପାରେ ବୋଲି କୁହାଯାଉଛି।
କାଲାପାନି ସୀମା ବିବାଦରେ ଓଲି ଓ ତାଙ୍କ ମନ୍ତ୍ରୀମାନେ ନରମିଥିବାବେଳେ ଭାରତର ସେନାମୁଖ୍ୟ ଏମ୍.ଏମ୍. ନରଓ୍ବଣେ ନିକଟରେ କାଠମାଣ୍ଡୁ ଗସ୍ତରେ ଯାଇ ସାମରିକ ସହଯୋଗ ବୃଦ୍ଧି ଲାଗି ଆହ୍ବାନ ଦେଇଥିଲେ।
ନେପାଳ ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ ଦଳକୁ ରକ୍ଷା କରିବା ଲାଗି ଓଲି ପ୍ରଧାନମନ୍ତ୍ରୀ ପଦ ତ୍ୟାଗ କରିବାକୁ ପ୍ରଚଣ୍ଡ ଚାପ ପକାଉଛନ୍ତି। ତେବେ ଓଲି ଏତେ ସହଜରେ ପଦ ଛାଡ଼ୁ ନ ଥିବାରୁ ଦଳରେ ବିଭାଜନକୁ ଏଡାଯାଇ ନ ପାରେ ବୋଲି କୁହାଯାଉଛି।
