ପଟ୍ଟାଙ୍ଗି,୩ା୨(ଶରତ କୁମାର ଧଳ)-କୋରାପୁଟ ଜିଲା ପଟ୍ଟାଙ୍ଗି ବ୍ଲକ୍ ଅଧୀନ କୋଟିଆ ପଞ୍ଚାୟତର ସୀମାନ୍ତବାସୀଙ୍କୁ ନେଇ ଓଡ଼ିଶା-ଆନ୍ଧ୍ର ପ୍ରଦେଶ ପକ୍ଷରୁ ବୈଠକକରି ସଚେତନ କରାଯାଉଛି। ଏଥିରେ ଉକ୍ତ ପଞ୍ଚାୟତର ସୀମାନ୍ତବାସୀ ହଇରାଣ ହେଉଥିବା ଜଣାପଡ଼ିଛି। କୋଟିଆ ପଞ୍ଚାୟତ ସୀମାନ୍ତ ନେରିଡିବାଲସା ଗ୍ରାମରେ ଆନ୍ଧ୍ର ପିଆଇଟିଡିଏ ବିଭାଗ ପକ୍ଷରୁ ନିର୍ମିତ ସ୍ଥାୟୀ ଗୃହ ବାରଣ୍ଡାରେ ଲୋକଙ୍କୁ ମଙ୍ଗଳବାର ଏକତ୍ର କରାଯାଇଛି। ଆନ୍ଧ୍ର ପାର୍ବତୀପୁରମ ମାନ୍ୟାମ ଜିଲା ଅଧୀନ ସାଲୁର ବ୍ଲକ୍ରେ ଥିବା ଜିସିସି ବିଭାଗର ସି.ଏଚ୍. ରାମୁଲୁଙ୍କ ସହ ଅନ୍ୟ କର୍ମଚାରୀ ସୀମାନ୍ତ ଗ୍ରାମରେ ପହଞ୍ଚି ଲୋକଙ୍କୁ ଉତ୍ପାଦିତ ବିରି, ଅଳସୀ ଆଦି ଶସ୍ୟକୁ ସୁଲଭ ମୂଲ୍ୟରେ ବିକ୍ରିକରି ରୋଜଗାରକ୍ଷମ ହେବା ନେଇ ବୁଝାଇଛନ୍ତି। ନିଜ ରାଜ୍ୟରେ ଥିବା ସରକାରୀ ଦରରେ ବିକ୍ରି କରିବାକୁ କହିଛନ୍ତି। କୋଟିଆ ପଞ୍ଚାୟତର ପ୍ରତି ଗ୍ରାମ ଓ ପାହାଡ଼ରେ ପ୍ରଚୁର ପରିମାଣରେ ଥିବା ତେନ୍ତୁଳି ଗଛରୁ ତେନ୍ତୁଳି ଅମଳ କରି ଆନ୍ଧ୍ରର ଉକ୍ତ ସଂସ୍ଥାକୁ ବିକ୍ରିକରି ଲାଭବାନ୍ ହୋଇପାରିବେ ବୋଲି କହିଛନ୍ତି। ଏହାକୁ ଦୃଷ୍ଟିରେ ରଖି ସୀମାନ୍ତବାସୀଙ୍କୁ ତେନ୍ତୁଳି କିଲୋ ପିଛା ୩୬ଟଙ୍କାରେ କିଣିବା ବ୍ୟବସ୍ଥା ରହିଛି ବୋଲି ବୁଝାଇଛନ୍ତି।
ସୀମାନ୍ତବାସୀ କୁଆଡ଼େ ଯିବା ଆବଶ୍ୟକ ନାହିଁ ପ୍ରତି ସପ୍ତାହରେ ନେରିଡିବାଲସା ଗ୍ରାମରେ ହେଉଥିବା ସାପ୍ତାହିକ ହାଟରୁ ଆମ ସଂସ୍ଥା କିଣିବ ବୋଲି ଆନ୍ଧ୍ରର ଉକ୍ତ ସଂସ୍ଥାର ଅଧିକାରୀ ସୀମାନ୍ତବାସୀଙ୍କୁ ବୁଝାଇ ଜଙ୍ଗଲ ଜାତୀୟ ଆମଦାନୀ ଫସଲକୁ ମଧ୍ୟ ସୁଲଭ ମୂଲ୍ୟରେ କିଣିବ ବୋଲି ପ୍ରତିଶ୍ରୁତି ଦେବା ସହ ଆନ୍ଧ୍ର ସରକାର ତୁମମାନଙ୍କ ସହ ସର୍ବଦା ରହିଛି ଓ ରହିଥିବ ବୋଲି ବୁଝାଇଛନ୍ତି। ପଟ୍ଟାଙ୍ଗି ବ୍ଲକ୍ ପ୍ରଶାସନର ଜନସମ୍ପର୍କ ବୈଠକର ୨୪ ଘଣ୍ଟା ପରେ ଆନ୍ଧ୍ରର ସରକାରୀ ସଂସ୍ଥାର ଅଧିକାରୀ କର୍ମଚାରୀ ଅନୁପ୍ରବେଶକରି ସୀମାନ୍ତବାସୀଙ୍କୁ ସଚେତନକରି ଫେରିଛନ୍ତି। ପଟ୍ଟାଙ୍ଗି ବ୍ଲକ ପ୍ରଶାସନ ପକ୍ଷରୁ ହୋଇଥିବା ଜନସମ୍ପର୍କ କାର୍ଯ୍ୟକ୍ରମକୁ ନେଇ କୋଟିଆ ସରପଞ୍ଚ ଲିଉ ଗେମେଲ କହିଛନ୍ତି, ପଞ୍ଚାୟତର ସୀମାନ୍ତ ଗ୍ରାମରେ ବ୍ଲକ ପ୍ରଶାସନ ପକ୍ଷରୁ ଜନସମ୍ପର୍କ ବୈଠକ କରି ସୀମାନ୍ତବାସୀଙ୍କୁ ସରକାରଙ୍କ କାର୍ଯ୍ୟକ୍ରମ ନେଇ ସଚେତନତା କରାଯାଉଛି। କିନ୍ତୁ ମୋତେ ଅବଗତ କରାଯାଉନାହିଁ ବୋଲି ସରପଞ୍ଚ ଗେମେଲ ଅସନ୍ତୋଷ ପ୍ରକାଶ କରିଛନ୍ତି।
