ଟାଙ୍ଗୀ ଖୋର୍ଦ୍ଧା, ୧୬।୧୧(ରଘୁନାଥ ସାହୁ)ଟାଙ୍ଗୀ ବ୍ଲକ ଅନ୍ତର୍ଗତ ବଡ଼ପାରୀ ଗ୍ରାମ ପଞ୍ଚାୟତର ଭୋବରା ଗାଁ ମୁଣ୍ଡରେ ୧୯୮୮ ମସିହାରେ ଅର୍ଜୁନପୁର, ବରପାଲି, କାସନ୍ଦା, ରାମଚନ୍ଦ୍ରପୁର, ଭୋବରା, ହରିଚନ୍ଦନପୁର ଗ୍ରାମରେ ଏକ ମଧ୍ୟ ଇଂରାଜୀ ବିଦ୍ୟାଳୟ ଖୋଲାଯାଇଥିଲା। ରାମଚନ୍ଦ୍ର ସ୍ବାଇଁ, ବ୍ରହ୍ମଚାରୀ ଦାସ, ସନାତନ ପ୍ରଧାନ, ଭୁଜ ପ୍ରଧାନ, କୀର୍ତ୍ତନ ପ୍ରଧାନ, କାହ୍ନୁ ବିଶ୍ବାଳ, ଲକ୍ଷ୍ମଣ ସୀଠ, ପ୍ରଫୁଲ୍ଲ ପ୍ରଧାନଙ୍କ ଉଦ୍ୟମରେ ରାମଚଣ୍ଡୀ ମଧ୍ୟ ଇଂରାଜୀ ବିଦ୍ୟାଳୟ ଗଢି ଉଠିଥିଲା। ଭୋବରା ଗ୍ରାମର ପଞ୍ଚାନନ ପ୍ରଧାନ ଓ ବଡପାରୀ ଗ୍ରାମର ସାରଙ୍ଗଧର ପାଲଟା ସିଂହ ଶିକ୍ଷକ ଭାବେ କାର୍ଯ୍ୟ କରିଥିଲେ। ଏକ ସୁନ୍ଦର ପରିବେଶରେ ତଥା ଜନସାଧାରଣଙ୍କ ନିଜସ୍ବ ଉଦ୍ୟମରେ ବିଦ୍ୟାଳୟ ଗୃହ ନିର୍ମାଣ ହୋଇଥିଲା। ପରବର୍ତ୍ତୀ ସମୟରେ ସରକାରୀ ଅନୁଦାନରେ ଶୌଚାଳୟ, ରୋଷେଇ ଘର ଆଦି ନିର୍ମାଣ କରାଯାଇଥିଲା। ୨ ଜଣ ଶିକ୍ଷକ ମଧ ୧୯୯୪ ମସିହାରେ ସରକାରୀ ଅନୁଦାନପ୍ରାପ୍ତ ଶିକ୍ଷକ ଭାବେ ମାନ୍ୟତା ପାଇଲେ। କିନ୍ତୁ ୨୦୨୦ ମସିହାରେ ପ୍ରଧାନ ଶିକ୍ଷକ ପଞ୍ଚାନନ ପ୍ରଧାନ ଓ ୨୦୨୧ ମସିହାରେ ଶିକ୍ଷକ ସାରଙ୍ଗଧର ପାଲଟା ସିଂହ ଅବସର ଗ୍ରହଣ ପରେ ସେମାନଙ୍କ ସ୍ଥାନରେ କୌଣସି ଶିକ୍ଷକଙ୍କୁ ନିଯୁକ୍ତି ଦିଆଗଲା ନାହିଁ। ୨୦୨୧ ମସିହାରୁ ବିଦ୍ୟାଳୟକୁ ବନ୍ଦ କରିଦିଆଗଲା। ଫଳରେ ସ୍ଥାନୀୟ ଅଞ୍ଚଳର ଛାତ୍ରୀଛାତ୍ରମାନେ ୩ କିମି ଜଙ୍ଗଲ ରାସ୍ତା ଦେଇ ନିକଟସ୍ଥ ବଡ଼ପାରୀ ବିଦ୍ୟାଳୟକୁ ପଢିବାକୁ ଆସୁଛନ୍ତି। ଏହି ରାସ୍ତା ଦେଇ ଜଙ୍ଗଲୀ ଜୀବଜନ୍ତୁଙ୍କ ଭୟ ରହିଛି। ଅନ୍ୟପକ୍ଷରେ ରାମଚଣ୍ଡୀ ମଧ୍ୟ ଇଂରାଜୀ ବିଦ୍ୟାଳୟଟି ଭାଙ୍ଗିରୁଜି ଗଲାଣି। ସେ ସ୍ଥାନଟି ଏବେ ନିଶାଡ଼ିମାନଙ୍କର ଆଡ୍ଡାସ୍ଥଳୀ ପାଲଟିଛି। ଏହି ବିଦ୍ୟାଳୟକୁ ପୁନଃ ଖୋଲିବା କିମ୍ବା ଭୋବରା ସରକାରୀ ପ୍ରାଥମିକ ବିଦ୍ୟାଳୟକୁ ଅପ୍ଗ୍ରେଡ଼ କରାଯାଇ ଷଷ୍ଠ, ସପ୍ତମ ଶ୍ରେଣୀ ଖୋଲିବା ଦାବି ନେଇ ଗ୍ରାମବାସୀ ଜିଲାପାଳ, ଜିଲା ଗୋଷ୍ଠୀ ଶିକ୍ଷା ଅଧିକାରୀଙ୍କୁ ଲିଖିତ ଅଭିଯୋଗ କରିଥିବା ଜଣାପଡ଼ିଛି। ଦୀର୍ଘଦିନ ଧରି ଅଭିଯୋଗ ହୋଇଆସୁଥିଲେ ମଧ୍ୟ ବିଭାଗ ପକ୍ଷରୁ କୌଣସି ପଦେକ୍ଷପ ନିଆଯାଇନାହିଁ। ଫଳରେ ସାଧାରଣରେ ତୀବ୍ର ଅସନ୍ତୋଷ ଦେଖାଦେଇଛି। ଆସନ୍ତା ଶିକ୍ଷାବର୍ଷରୁ ଛାତ୍ରୀଛାତ୍ରୀଙ୍କୁ ପାଠ ପଢ଼ିବାର ସୁଯୋଗ ଦେବାପାଇଁ ଗ୍ରାମବାସୀମାନେ ଦାବି କରିଛନ୍ତି।
