ଭବାନୀପାଟଣା,୨୧ା୧୧(ଉତ୍ତମ କୁମାର ଦାଶ):ଉଭୟ ରାଜ୍ୟ ଓ କେନ୍ଦ୍ର ସରକାର ଦୁର୍ଗମ ଅଞ୍ଚଳରେ ବସବାସ କରୁଥିବା ଲୋକଙ୍କ ଉନ୍ନତି ପାଇଁ ଅନେକ ଯୋଜନା କରି କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ଏହା ପରେ ମଧ୍ୟ ଦୁର୍ଗମ ଅଞ୍ଚଳବାସୀଙ୍କ ମୌଳିକ ସମସ୍ୟାର ସମାଧାନ ହୋଇପାରୁନାହିଁ। ଫଳରେ ଆଜି ମଧ୍ୟ ସେମାନେ ଅବହେଳିତ ଭାବରେ ଜୀବନଯାପନ କରୁଛନ୍ତି। ଏଭଳି ଏକ ଉଦାହରଣ ଦେଖିବାକୁ ମିଳିଛି କଳାହାଣ୍ଡି ଜିଲା ଭବାନୀପାଟଣା ବ୍ଲକ ଯୁଗସାଇପାଟଣା ପଞ୍ଚାୟତର ବଣପାହାଡ଼ ଘେରରେ ଥିବା କଡ୍ରୁସୋରୁ ଗାଁରେ। ଏହି ଗାଁରେ ୧୩ ଆଦିବାସୀ ପରିବାର ଦୀର୍ଘବର୍ଷ ହେବ ରହୁଥିବାବେଳେ ଗାଁକୁ ଯିବାପାଇଁ ବର୍ତ୍ତମାନ ପର୍ଯ୍ୟନ୍ତ ଭଲ ରାସ୍ତାଟିଏ ନାହିଁ। ଜଙ୍ଗଲିଆ ରାସ୍ତାରେ ଲୋକେ ଯା’ଆସ କରୁଛନ୍ତି। ଏପରି କି ଗାଁଠାରୁ ୩କି.ମି. ଦୂରରେ ଥିବା କଟଲଙ୍ଗ ସ୍କୁଲକୁ ଯିବାକୁ ହେଲେ ଉକ୍ତ ଜଙ୍ଗଲିଆ ରାସ୍ତା ଦେଇ କୋମଳମତି ଶିଶୁମାନଙ୍କୁ ଯିବାକୁ ପଡିଥାଏ। ବିପଦ ଆଶଙ୍କା ଥିବାରୁ ଶିଶୁଙ୍କୁ ପାଠ ପଢିବା ପାଇଁ ଛାଡିବାକୁ ଗ୍ରାମବାସୀ ଉଚିତ ମଣୁନାହାନ୍ତି। ସେହିପରି ଜରୁରିକାଳୀନ ପରିସ୍ଥିତିରେ ରୋଗୀ ବା ଗର୍ଭବତୀ ମହିଳାଙ୍କୁ ଖଟିଆ ସାହାଯ୍ୟରେ ବୋହି ୪କି.ମି. କମଲେଇ ଗାଁକୁ ନେଲାପରେ ଆମ୍ବୁଲାନ୍ସ ସେବା ମିଳିଥାଏ। ସବୁଠାରୁ ଆଶ୍ୱର୍ଯ୍ୟର ବିଷୟ ହେଲା ଏହି ଗାଁରୁ ପଞ୍ଚାୟତ ମୁଖ୍ୟାଳୟ ୮୦ କି.ମି. ଓ ବ୍ଲକ କାର୍ଯ୍ୟାଳୟ ୬୪ କି.ମି. ଦୂରରେ ରହିଛି। ଫଳରେ ଗାଁ ଲୋକଙ୍କ ପାଇଁ ପଞ୍ଚାୟତରୁ ପିଡ଼ିଏସ୍ ସାମଗ୍ରୀ ଆଣିବା ମୁସ୍କିଲ ହୋଇପଡୁଛି। ଗାଁରେ ଦୁଇଟି ନଳକୂପ ରହିଛି। ସେଥିମଧ୍ୟରୁ ଗୋଟିଏ ଅଚଳ ହୋଇ ଦୁଇବର୍ଷ ପରେ ମଧ୍ୟ ମରାମତି ହେଉ ନ ଥିବାବେଳେ ଅନ୍ୟ ଏକ ନଳକୂପ ପାହାଡ଼ ଜାଗା ପାଇଁ ପର୍ଯ୍ୟାପ୍ତ ପରିମାଣରେ ପାଣି ବାହାରୁନାହିଁ। ଫଳରେ ନିକଟସ୍ଥ ଝରଣା ପାଣି ଗ୍ରାମବାସୀଙ୍କ ଭରସା ପାଲଟିଛି। ଏହି ଝରଣା ପାଣି ଏବେ ଶୋଷ ମେଣ୍ଟାଉଛି ବୋଲି ଗ୍ରାମବାସୀ ପ୍ରକାଶ କରିଛନ୍ତି। ସେହିପରି ବର୍ତ୍ତମାନ ସୁଦ୍ଧା ଏହି ଗାଁରେ ବିଜୁଳି ସଂଯୋଗ ହୋଇ ପାରିନି। ଯାହାଫଳରେ ଅନ୍ଧାରରେ ଜୀବନ କାଟୁଥିବା ନେଇ ଗ୍ରାମର ଇନ୍ଦ୍ର ମାଝୀ, ଡୁନି ମାଝୀ, ଡମ୍ବରୁ ମାଝୀ, ଲାକ୍ସା ମାଝୀ, ସାନ୍ଦା ମାଝୀ, ଜାମଦେଈ ମାଝୀ, ବନ ମାଝୀ, ଦୁରପି ମାଝୀ, ଲାଚନା ମାଝୀ, କମାଲ ଦେଈ ମାଝୀ ପ୍ରମୁଖ ପ୍ରକାଶ କରିଛନ୍ତି। ଶୀଘ୍ର ଏହି ସମସ୍ୟା ପ୍ରତି ବ୍ଲକ ଓ ଜିଲା ପ୍ରଶାସନ ଦୃଷ୍ଟି ଦେବାକୁ ଗ୍ରାମବାସୀ ଦାବି କରିଛନ୍ତି।
Dharitri – Odisha’s No.1 Odia Daily
