ସମ୍ବଲପୁର,୧୨ା୮(ପ୍ରମୋଦ ବହିଦାର): ରେଢ଼ାଖୋଲ ନିର୍ବାଚନ ମଣ୍ଡଳୀରେ ହୋଇଥିବା ବିକାଶ ପ୍ରକଳ୍ପଗୁଡ଼ିକର ରକ୍ଷଣାବେକ୍ଷଣରେ ଅବହେଳାକୁ ତୀବ୍ର ସମାଲୋଚନା କରିଛନ୍ତି ପୂର୍ବତନ ମନ୍ତ୍ରୀ ତଥା ବିଜେଡି ସମ୍ବଲପୁର ଜିଲା ସଭାପତି ଇଂ ରୋହିତ ପୂଜାରୀ। ସାମାଜିକ ଗଣମାଧ୍ୟମରେ ସେ ଏକ ପୋଷ୍ଟ କରି କହିଛନ୍ତି ଯେ, ୨୦୧୪ରେ ସେ ପ୍ରଥମ ଥର ରେଢ଼ାଖୋଲର ବିଧାୟକ ହେବା ପରେ ଅଞ୍ଚଳବାସୀଙ୍କ ଭ୍ରମଣ ଓ ମନୋରଞ୍ଜନ ପାଇଁ ଉପଯୁକ୍ତ ସ୍ଥାନର ଅଭାବ ଲକ୍ଷ୍ୟ କରିଥିଲେ। ଏହି ଆବଶ୍ୟକତାକୁ ଦୃଷ୍ଟିରେ ରଖି ୨୦୧୫ରେ ତତ୍କାଳୀନ ଜଙ୍ଗଲ ସଚିବ ଆର୍ କେ ଶର୍ମାଙ୍କୁ ୯ ଏକର ୪୦ ଡେସିମିଲି ପରିମିତ ଜମିରେ ଏକ ଇକୋ ପାର୍କ ନିର୍ମାଣ ପାଇଁ ପ୍ରସ୍ତାବ ଦିଆଯାଇଥିଲା। ପରବର୍ତ୍ତୀ ସମୟରେ ସୁରେଶ ମହାପାତ୍ର ଓ ମୁନା ଶର୍ମାଙ୍କ କାର୍ଯ୍ୟକାଳ ମଧ୍ୟରେ ଏହି ପ୍ରକଳ୍ପକୁ ଆଗକୁ ବଢ଼ାଯାଇଥିଲା।
ପ୍ରାୟ ୨ କୋଟି ୭୬ ଲକ୍ଷ ଟଙ୍କା ବ୍ୟୟରେ ନିର୍ମିତ ଏହି ଇକୋ ପାର୍କରେ ନକ୍ଷତ୍ର ବନ, ସୁଗନ୍ଧ ଉଦ୍ୟାନ, ଶିଶୁ ଉଦ୍ୟାନ, ବାଉଁଶ ଉଦ୍ୟାନ, ଫୁଆରା, ଜଳାଶୟ, ଓଷଧୀୟ ଏବଂ ଫଳ ବୃକ୍ଷ ରୋପଣ କରାଯାଇ ୨୦୨୩ ମସିହାରେ ଏହାର କାର୍ଯ୍ୟ ସମ୍ପୂର୍ଣ୍ଣ ହୋଇଥିଲା। ଏହା ପଶ୍ଚିମ ଓଡ଼ିଶାର ଅନ୍ୟତମ ପ୍ରମୁଖ ପାର୍କ ଭାବେ ଗଢ଼ିଉଠିଥିଲା।
ତେବେ ଗତ ଦୁଇ ବର୍ଷ ମଧ୍ୟରେ ଏହି ପାର୍କର ସଠିକ ରକ୍ଷଣାବେକ୍ଷଣ ଅଭାବରୁ ଏହା ଜଙ୍ଗଲ ଓ ଖଣ୍ଡରରେ ପରିଣତ ହେବାକୁ ବସିଛି। ଏ ନେଇ ସେ ମୁଖ୍ୟମନ୍ତ୍ରୀ ଓ ଜିଲା ପ୍ରଶାସନକୁ ତୁରନ୍ତ ଏହାର ପୁନଃରୁଦ୍ଧାର ପାଇଁ ଆବଶ୍ୟକ ପଦକ୍ଷେପ ନେବାକୁ ଅନୁରୋଧ କରିଛନ୍ତି।
ତେବେ ଇଂ ରୋହିତଙ୍କ ଏଭଳି ପୋଷ୍ଟିଂକୁ ନେଇ ଏହା ପରୋକ୍ଷରେ ରେଢ଼ାଖୋଲ ବିଧାୟକ ତଥା ବରିଷ୍ଠ ବିଜେଡି ନେତା ଓ ଓଡ଼ିଶା ବିଧାନସଭାର ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟଙ୍କୁ ଇଂ ରୋହିତ ପୂଜାରୀଙ୍କ ଟାର୍ଗେଟ ବୋଲି ସାଧାରଣରେ ଚର୍ଚ୍ଚା ଜୋର ଧରିଛି। ଗତ ୮ ତାରିଖରେ ସମ୍ବଲପୁର ଏମ୍ପି ଧର୍ମେନ୍ଦ୍ର ପ୍ରଧାନଙ୍କ ସହ ପ୍ରସନ୍ନ ଆଚାର୍ଯ୍ୟ ଗୋଟିଏ ମଞ୍ଚରେ ଉପସ୍ଥିତ ହେବା ପରେ ଇଂ ରୋହିତଙ୍କ ଏଭଳି ପୋଷ୍ଟିଂକୁ ନେଇ ସାଧାରଣରେ ଏହା ପ୍ରସନ୍ନଙ୍କ ପ୍ରତି ଇଂ ରୋହିତଙ୍କ କଟାକ୍ଷ ବୋଲି ଚର୍ଚ୍ଚା ହେଉଛି।
ଅନ୍ୟପଟେ ଉଭୟ ନେତା ଏଭଳି ଚର୍ଚ୍ଚାକୁ ଭିତ୍ତିହୀନ ବୋଲି କହିଛନ୍ତି।
ବିରୋଧୀ ଦଳର ଉପନେତା, ଓଡ଼ିଶା ବିଧାନସଭା ଓ ରେଢ଼ାଖୋଲ ବିଧାୟକ ପ୍ରସନ୍ନ ଆଚାର୍ଯ୍ୟ ନିଜ ପ୍ରତିକ୍ରିୟାରେ କହିଲେ ଯେ
‘ରକ୍ଷଣାବେକ୍ଷଣ କରିବା ସରକାରଙ୍କ ଦାୟିତ୍ୱ, ଜଣେ ବିଧାୟକଙ୍କର ନୁହେଁ। ଆମ ବିଜେଡି ସରକାର ସମୟରେ ଅନେକ ପ୍ରକଳ୍ପ ନିର୍ମାଣ କରାଯାଇଥିଲା, କିନ୍ତୁ ବର୍ତ୍ତମାନର ସରକାର ସେଗୁଡ଼ିକର ରକ୍ଷଣାବେକ୍ଷଣ ନ କରି ଅବହେଳା କରୁଛନ୍ତି। ଆମେ ମଧ୍ୟ ଏହିସବୁ ପ୍ରକଳ୍ପର ଅବହେଳା ବିରୋଧରେ ବିଧାନସଭାରେ ସରକାରଙ୍କ ଦୃଷ୍ଟି ଆକର୍ଷଣ କରୁଛୁ। ଯଦି ମୁଁ ଶାସକ ଦଳର ବିଧାୟକ ଥାଆନ୍ତି, ତେବେ ମୋର ଦାୟିତ୍ୱ ରହିଥାନ୍ତା ଓ ଅନୁଦାନ ଆଣି କାମ କରାଇଥାନ୍ତି। କିନ୍ତୁ ଏହା କୌଣସି ଦଳର ନୁହେଁ, ବରଂ ସରକାରଙ୍କର ଦାୟିତ୍ୱ।’
ସେହିପରି ପୂର୍ବତନ ମନ୍ତ୍ରୀ ତଥା ବିଜେଡି ଜିଲା ସଭାପତି ଇଂ. ରୋହିତ ପୂଜାରୀ ପ୍ରତିକ୍ରିୟା ରଖି କହିଛନ୍ତି ଯେ, ତାଙ୍କ ପୋଷ୍ଟିଂରେ ସେ ରେଢ଼ାଖୋଲ ବିଧାୟକଙ୍କୁ ନୁହେଁ ବରଂ ସମ୍ବଲପୁର ବିଧାୟକ ବରିଷ୍ଠ ଭାଜପା ନେତା ଜୟନାରାୟଣ ମିଶ୍ରଙ୍କ ପ୍ରଶ୍ନର ଜବାବ ଦେଇଛନ୍ତି। ସମ୍ବଲପୁର ଜିଲାର ବିକାଶମୂଳକ କାର୍ଯ୍ୟ ଏବଂ ସହରର ଭିତ୍ତିଭୂମିକୁ ନେଇ ନିଜର ଆଭିମୁଖ୍ୟ ସ୍ପଷ୍ଟ କରିବା ସହ ବିପର୍ଯ୍ୟୟ ପରିଚାଳନା ଓ ସହରର ଜନସାଧାରଣଙ୍କ ସୁବିଧା ସୁଯୋଗକୁ ନେଇ ସେ ପ୍ରଶ୍ନ ଉଠାଇଛନ୍ତି। ତାଙ୍କର ପ୍ରଶ୍ନ କୌଣସି ନିର୍ଦ୍ଦିଷ୍ଟ ବ୍ୟକ୍ତିବିଶେଷଙ୍କ ବିରୋଧରେ ନୁହେଁ, ବରଂ କେବଳ ସମ୍ବଲପୁରର ବିକାଶ ଓ ଜନସ୍ବାର୍ଥକୁ ନେଇ ଉଦ୍ଦିଷ୍ଟ ବୋଲି ସେ କହିଛନ୍ତି। ସେ କହିଛନ୍ତି, ବିଜେଡି ଶାସନ କାଳରେ ନିର୍ମିତ ହୋଇଥିବା ପ୍ରକଳ୍ପଗୁଡ଼ିକର ସୁରକ୍ଷା ଓ ରକ୍ଷଣାବେକ୍ଷଣ ହେବା ଆବଶ୍ୟକ। ନିଜର ୧୦ ବର୍ଷର କାର୍ଯ୍ୟକାଳ ମଧ୍ୟରେ କରାଯାଇଥିବା ବିକାଶମୂଳକ କାମଗୁଡ଼ିକର ତାଲିକା ଦେବାକୁ ସେ ପ୍ରସ୍ତୁତ ଥିବା ବେଳେ ଶାସକ ଦଳ ଭାଜପା ନେତାମାନେ ନିଜର ଦୀର୍ଘ ବର୍ଷର କାର୍ଯ୍ୟକାଳରେ କ’ଣ କରିଛନ୍ତି ସେ ନେଇ ଜନସାଧାରଣଙ୍କୁ ହିସାବ ଦିଅନ୍ତୁ ବୋଲି ଦାବି କରିଛନ୍ତି।
