ଜଗତ୍ସିଂହପୁର ଅଫିସ, ୧୭ା୧୨:ଜଗତ୍ସିଂହପୁର ବ୍ଲକ ମହିରାସ୍ଥିତ ରଥ ସରକାରୀ ଉଚ୍ଚ ବିଦ୍ୟାଳୟ ଏବେ ଅବହେଳିତ ହୋଇପଡ଼ିଛି। ଏହି ଉଚ୍ଚ ବିଦ୍ୟାଳୟ ୧୯୯୩ରୁ ସରକାରୀ ବିଦ୍ୟାଳୟର ମାନ୍ୟତା ପାଇଥିଲେ ସୁଦ୍ଧା ସରକାରଙ୍କ ୫-ଟି ଅନ୍ତର୍ଗତ ଆକାଂକ୍ଷିତ ବିଦ୍ୟାଳୟ ତାଲିକାରେ ସ୍ଥାନ ପାଇନାହିଁ। କେବଳ ଏତିକି ନୁହେଁ, ବିଦ୍ୟାଳୟର ପ୍ରଧାନଶିକ୍ଷକ ପଦବୀ ଦୀର୍ଘ ୧୧ ବର୍ଷ ହେବ ଖାଲି ପଡିଛି। ଅନ୍ୟପଟେ ଗୋଟିଏ ଲେଖାଏ କଳା ଶିକ୍ଷକ, କ୍ରୀଡା ଶିକ୍ଷକ, ରାତ୍ର ଜଗୁଆଳ ଓ ପିଅନ ପଦବୀ ମଧ୍ୟ ଖାଲି ରହିଛି। ଏନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ବିଭିନ୍ନ ସମସ୍ୟା ଭିତରେ ଶିକ୍ଷାନୁଷ୍ଠାନଟି ଚାଲିଥିବାରୁ ଏହାର ପ୍ରତିକାର ପାଇଁ ଦାବି ହୋଇଛି।
ଆଳିପିଙ୍ଗଳ-ନାଉଗାଁ ରାସ୍ତାର ମହିରା ଛକରୁ ବାମ ପାର୍ଶ୍ୱରେ ୨୦୦ ମିଟର ଅଣଓସାରିଆ ରାସ୍ତା ଦେଇଗଲେ ଏହି ବିଦ୍ୟାଳୟ ଦେଖିବାକୁ ମିଳେ। ରାସ୍ତା ଅବସ୍ଥା ଭଲ ନ ଥିବାରୁ ଅନେକ ସମୟରେ ଦୁର୍ଘଟଣା ଘଟୁଛି।ବିଦ୍ୟାଳୟରେ ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ୧୮୦ ଜଣ ଛାତ୍ରୀଛାତ୍ର ଶିକ୍ଷାଲାଭ କରୁଛନ୍ତି । ଗୋଟିଏ ଶ୍ରେଣୀ ଗୃହରେ ବିଜ୍ଞାନ ଲାବରେଟୋରୀ କାମଚଳା ଭାବେ ଚାଲିଛି । ମୋଟ ଉପରେ ୯ଟି ପକ୍କା ଶ୍ରେଣୀ ଗୃହ ଓ ଗୋଟିଏ ହଲ୍ ରହିଛି । ଏହାବାଦ୍ ଗୋଟିଏ ଲେଖାଏ ଆଇସିଟି ଲାବ୍ ଓ ଶିକ୍ଷକ କମନ ରୁମ୍ ଓ ପ୍ରଧାନ ଶିକ୍ଷକଙ୍କ କୋଠରି ରହିଛି । ବିଦ୍ୟାଳୟ ପାଇଁ ଅଧିକ ସଂଖ୍ୟାରେ ଛାତ ଘରର ଆବଶ୍ୟକତା ରହିଛି। ଏସବୁ ସମସ୍ୟାର ସମାଧାନ ସହ ଆକାଂକ୍ଷିତ ବିଦ୍ୟାଳୟ ତାଲିକାରେ ଅନ୍ତର୍ଭୁକ୍ତ କରିବା ପାଇଁ ଭାରପ୍ରାପ୍ତ ପ୍ରଧାନଶିକ୍ଷକ ଜ୍ଞାନ ରଞ୍ଜନ ଆଚାର୍ଯ୍ୟଙ୍କ ସମେତ ଏକାଧିକ ଅଭିଭାବକ ଓ ସାଧାରଣ ଲୋକେ ଦାବି କରିଛନ୍ତି। ଏ ସମ୍ପର୍କରେ ଜିଲା ଶିକ୍ଷା ଅଧିକାରୀ ନିରଞ୍ଜନ ବେହେରାଙ୍କ ସହ ଯୋଗାଯୋଗ କରିବାରୁ ସମସ୍ୟାର ସମାଧାନ ପାଇଁ ଚିନ୍ତା କରାଯିବ ବୋଲି କହିଥିଲେ।
