ନୂଆଦିଲ୍ଲୀ/ଭୁବନେଶ୍ୱର,୮ା୯(ବ୍ୟୁରୋ): ଡାକ୍ତରୀ ପାଠ୍ୟକ୍ରମରେ ନାମଲେଖା ପାଇଁ ନ୍ୟାଶନାଲ ଟେଷ୍ଟିଂ ଏଜେନ୍ସି(ଏନ୍ଟିଏ) ଦ୍ୱାରା ପରିଚାଳିତ ଏନ୍ଇଇଟି(ୟୁଜି)-୨୦୨୨ ପରୀକ୍ଷା ଫଳ ବୁଧବାର ପ୍ରକାଶ ପାଇଛି। ଦେଶରେ ମୋଟ ୧୭,୬୪,୫୭୧ ଛାତ୍ରୀଛାତ୍ର ପରୀକ୍ଷା ଦେଇଥିବାବେଳେ ୯,୯୩,୦୬୯ଜଣ ଉତ୍ତୀର୍ଣ୍ଣ ହୋଇଛନ୍ତି। ଏମାନଙ୍କ ମଧ୍ୟରେ ୫,୬୩,୯୦୨ଜଣ ଛାତ୍ରୀ ଥିବାବେଳେ ୪,୨୯,୧୬୦ଜଣ ଛାତ୍ର ରହିଛନ୍ତି। ଓଡ଼ିଶାରୁ ୪୩,୦୮୦ଜଣ ଛାତ୍ରୀଛାତ୍ର ଏହି ପରୀକ୍ଷା ଦେଇଥିବା ବେଳେ ୨୬,୨୭୯ କୃତକାର୍ଯ୍ୟ ହୋଇଛନ୍ତି। ରାଜସ୍ଥାନର ତନିଷ୍କା ୯୯.୯୯୯୭୭୩୩ ପର୍ସେଣ୍ଟାଇଲ ସ୍କୋର ସହ ସର୍ବଭାରତୀୟସ୍ତରରେ ଏନ୍୍ଇଇଟି ର଼୍ୟାଙ୍କ-୧ରେ ଥିବାବେଳେ ସମାନ ସ୍କୋର ରଖି ଦିଲ୍ଲୀର ବତ୍ସ ଆଶିଷ ବାତ୍ରା ଦ୍ୱିତୀୟ, କର୍ନାଟକର ହୃଷୀକେଶ ନାଗଭୂଷଣ ଗାଙ୍ଗୁଲେ ତୃତୀୟ ଏବଂ ରୁଚା ପୱାସେ ଚତୁର୍ଥ ର଼୍ୟାଙ୍କ ପାଇଛନ୍ତି। ଶ୍ରେଷ୍ଠ ୫୦ଜଣଙ୍କ ତାଲିକାରେ ଓଡ଼ିଶାର ପ୍ରିୟ ସୋମଦତ୍ତ ନାୟକ ୩୯ ର଼୍ୟାଙ୍କ ପାଇଛନ୍ତି। ପ୍ରିୟ ୭୦୫ ନମ୍ବର ରଖିଥିବା ବେଳେ ୯୯.୯୯୭୬୧୯୮ପର୍ସେଣ୍ଟାଇଲ ସ୍କୋର ରଖି ରାଜ୍ୟ ଟପ୍ପର ହୋଇଛନ୍ତି। ସେହିପରି ଦେଶରେ ଶ୍ରେଷ୍ଠ ୧୦ ଭିନ୍ନକ୍ଷମ(ପିଡବ୍ଲ୍ୟୁଡି) ଛାତ୍ରଙ୍କ ମଧ୍ୟରେ ଓଡ଼ିଶାର ଦୁଇଜଣ ଛାତ୍ର ସ୍ଥାନ ପାଇଛନ୍ତି। ପ୍ରିତମ ଗୋଚ୍ଛାୟତ ଦ୍ୱିତୀୟ ସ୍ଥାନରେ ଥିବାବେଳେ ସର୍ବଭାରତୀୟ ସ୍ତରରେ ୫,୫୧୧ ର଼୍ୟାଙ୍କ ହାସଲ କରିଛନ୍ତି। ଚନ୍ଦନ ଦାସ ପଞ୍ଚ ସ୍ଥାନରେ ଥିବାବେଳେ ସର୍ବଭାରତୀୟ ସ୍ତରରେ ୧୩,୩୨୬ ର଼୍ୟାଙ୍କ ହାସଲ କରିଛନ୍ତି।
ଏନ୍ଇଇଟି(ୟୁଜି)-୨୦୨୨ ଗତ ଜୁଲାଇ ୧୭ରେ ପରୀକ୍ଷା ଅନୁଷ୍ଠିତ ହୋଇଥିଲା। ଦେଶ ବାହାରର ୧୪ଟି ସହରକୁ ମିଶାଇ ମୋଟ ୪୯୭ ସହରରେ ୩,୫୭୦ ପରୀକ୍ଷା କେନ୍ଦ୍ର ହୋଇଥିଲା। ଇଂଲିଶ, ହିନ୍ଦୀ, ଓଡ଼ିଆ ସମେତ ମୋଟ ୧୩ଟି ଭାଷାରେ ଏହି ପରୀକ୍ଷା ହୋଇଥିଲା। ଚଳିତବର୍ଷ ପ୍ରଥମ ଥର ପାଇଁ ଆବୁଧାବି, ବ୍ୟାଙ୍କକ୍, କଲମ୍ବୋ, ଦୋହା, କାଠମାଣ୍ଡୁ, କୁଆଲାଲମ୍ପୁର, ଲାଗୋସ, ମାନାମା, ମସ୍କାଟ, ରିୟାଧ, ଶାରଜା, ସିଙ୍ଗାପୁର, ଦୁବାଇ ଓ କୁଏଟରେ ପରୀକ୍ଷା ଅନୁଷ୍ଠିତ ହୋଇଥିଲା।
