ନୟାଗଡ଼ ଅଫିସ,୧୭।୧୦: ନୟାଗଡ଼ ଜିଲା ପରିଷଦ ଅଧ୍ୟକ୍ଷ ଆସନ ଅନୁସୂଚିତ ଜନଜାତି ମହିଳାଙ୍କ ପାଇଁ ସଂରକ୍ଷଣ କରାଯାଇଛି । ୨୦୧୭ ନିର୍ବାଚନରେ ଏହା ମହିଳାଙ୍କ ପାଇଁ ସଂରକ୍ଷଣ ଥିଲା । ତେବେ ଜିଲା ପରିଷଦ ଆସନ ପାଇଁ ଚିଠା ସଂରକ୍ଷଣ ପ୍ରକାଶ ପରେ ଜିଲା ରାଜନୀତି ଚଳଚଞ୍ଚଳ ହୋଇ ଉଠିଛି। ଜିଲାର ନୂଆଗାଁ ୧୭ ନଂ. ଜୋନ ଅନୁସୂଚିତ ଜନଜାତି (ଆଦିବାସୀ) ମହିଳାଙ୍କ ପାଇଁ ସଂରକ୍ଷଣ ଥିବାରୁ ଏହା ଏବେ ଚର୍ଚ୍ଚାକୁ ଆସିଛି । ଏହି ଜୋନରୁ ପ୍ରାର୍ଥତ୍ନୀ ବିଜୟୀ ହେଲେ ଅଧ୍ୟକ୍ଷା ଆସନ ଅଳଙ୍କୃତ କରିବା ସୁବିଧା ହେବ । ଅନ୍ୟ କୌଣସି ଅସଂରକ୍ଷିତ ଆସନ ଅଥବା ମହିଳାଙ୍କ ପାଇଁ ସଂରକ୍ଷିତ ଆସନରୁ ଅନୁସୂଚିତ ଜନଜାତି ମହିଳା ପ୍ରାର୍ଥୀ ବିଜୟୀ ହୋଇ ଆସିଲେ ଅଧ୍ୟକ୍ଷା ହୋଇ ପାରିବେ । କିନ୍ତୁ ସଂରକ୍ଷଣ ଆସନରେ ଜିତିବା ସୁବିଧା । ଅନ୍ୟ ଆସନରେ ବିଜୟୀ ହୋଇ ଆସିବା ଅନୁସୂଚିତ ଜନଜାତି ମହିଳା ପ୍ରାର୍ଥୀଙ୍କ ପାଇଁ କଷ୍ଟ ହୋଇପାରେ ବୋଲି ସାଧାରଣରେ କୁହାଯାଇଛି । କାରଣ ଜଣେ ଆଦିବାସୀ ମହିଳା ଅନ୍ୟ ବର୍ଗର ମହିଳାଙ୍କ ସହ ଲଢ଼େଇ କରି ବିଜୟୀ ହେବା କଷ୍ଟ ହେବ। ଅପରପକ୍ଷେ ଜିଲା ପରିଷଦର ଅଧ୍ୟକ୍ଷ ପଦ ଅନୁସୂଚିତ ଜନଜାତି ମହିଳାଙ୍କ ପାଇଁ ଘୋଷଣା ହେବା ପରେ ବିଜେଡି, କଂଗ୍ରେସ ଓ ଭାଜପା ଆଦି ରାଜନୈତିକ ଦଳ ପକ୍ଷରୁ ଜିଲାର ମହିଳା ଓ ଅଣସଂରକ୍ଷିତ ଆସନକୁ ଗୁରୁତ୍ୱ ଦିଆଯାଉଛି। ଜିଲା ପରିଷଦ ଅଧ୍ୟକ୍ଷ ପାଇଁ ୨୫ ତାରିଖ ଓ ଜିଲା ପରିଷଦ ସଭ୍ୟଙ୍କ ପାଇଁ ୧୮ ତାରିଖ ମଧ୍ୟରେ ଚିଠା ସଂରକ୍ଷଣର ନେଇ ଆପତ୍ତି, ଅଭିଯୋଗ କରିବା ପାଇଁ ସମୟ ମିଳିଛି । ପରେ ଚୁଡ଼ାନ୍ତ ସଂରକ୍ଷଣ ତାଲିକା ପ୍ରକାଶ ପାଇବା ପରେ ପ୍ରତି ଦଳ ସେମାନଙ୍କର ପ୍ରାର୍ଥୀ ଘୋଷଣା କରିବାକୁ ପଦକ୍ଷେପ ନେବେ ।
୨୪ ଜିଲା ପରିଷଦ ଜୋନ ମଧ୍ୟରୁ ଅନୁସୂଚିତ ଜାତିଙ୍କ ପାଇଁ ୩, ଅନୁସୂଚିତ ଜନଜାତିଙ୍କ ପାଇଁ ୨, ପଛୁଆ ବର୍ଗଙ୍କ ପାଇଁ ୬, ଅଂସରକ୍ଷିତ ୧୩ଟି ଜିଲା ପରିଷଦ ଜୋନ ରହିଛି। ଏଥିମଧ୍ୟରୁ ୧୨ ଟି ଜିଲା ପରିଷଦ ପୁରୁଷ ଓ ୧୨ଟି ଜିଲା ପରିଷଦ ମହିଳାଙ୍କ ପାଇଁ ସଂରକ୍ଷିତ । ତେବେ ଅନୁସୂଚିତ ଜନଜାତି ମହିଳା ଜିଲାର ୧୩ ଟି ଜୋନରେ ପ୍ରାର୍ଥୀ ହୋଇ ପାରିବେ । ଜିଲାର ଓଡ଼ଗାଁ ୧ ଜୋନ ମହିଳା, ଓଡ଼ଗାଁ ୨ ଜୋନ ଅଂସରକ୍ଷିିତ, ଓଡ଼ଗାଁ ୪ନଂ.ଜୋନ ମହିଳା, ଖଣ୍ଡପଡ଼ା ଜୋନ ୬ ମହିଳା, ଖଣ୍ଡପଡ଼ା ୭ ନଂ. ଜୋନ ଅସଂରକ୍ଷିତ, ଗଣିଆ ୮ନଂ. ଜୋନ ମହିଳା, ନୟାଗଡ଼ ୧୨ ଓ ୧୩ ନଂ. ଜୋନ୍ ଅସଂରକ୍ଷିତ, ଭାପୁର ୧୯ ଓ ୨୦ ନଂ. ଜୋନ ଅସଂରକ୍ଷିତ, ରଣପୁର ୨୧ ନଂ. ଜୋନ୍ ମହିଳା, ରଣପୁର ୨୨ ନଂ.ଜୋନ ଅସଂରକ୍ଷିତ, ରଣପୁର ୨୪ ନଂ. ଜୋନ୍ ମହିଳାଙ୍କ ସଂରକ୍ଷିତ ଥିବାରୁ ଏହି ଜୋନ୍ରେ ପ୍ରାର୍ଥୀ ହୋଇ ପାରିବେ ା
