ହାଙ୍ଗଝୋ,୨୬ା୯: ଏସିଆନ୍ ଗେମ୍ସ ୨୦୨୩ର ଦ୍ୱିତୀୟ ଦିନରେ ଭାରତୀୟ ଖେଳାଳିଙ୍କ ମିଶ୍ର ପ୍ରଦର୍ଶନ ଜାରି ରହିଛି। ଉଷୁରେ ଭାରତର ନାଓରେମ୍ ରୋଶିବିନା ଦେବୀ ଏକ ପଦକ ପକ୍କା କରିଛନ୍ତି। ସେ ୬୦ କିଗ୍ରା ଓଜନ ବର୍ଗର ସାଣ୍ଡାରେ ସେମି ଫାଇନାଲରେ ପ୍ରବେଶ କରିଥିବା ବେଳେ ଅନୂ୍ୟନ ଏକ ବ୍ରୋଞ୍ଜ ପଦକ ହାସଲ କରିବା ସ୍ପଷ୍ଟ ହୋଇଛି । ସେ ପୂର୍ବରୁ ୨୦୧୮ ସଂସ୍କରଣରେ ମଧ୍ୟ ଏକ ବ୍ରୋଞ୍ଜ ପଦକ ଅର୍ଜନ କରିଥିଲେ। ସୋମବାର ଅନୁଷ୍ଠିତ କ୍ୱାର୍ଟର ଫାଇନାଲରେ ସେ କାଜାଖସ୍ତାନର ଆଇମାନ କାର୍ଶିଗାଙ୍କୁ ପରାସ୍ତ କରିଥିଲେ।
ଚେସ୍: ଚେସ୍ରେ ଭାରତୀୟ ଗ୍ରାଣ୍ଡମାଷ୍ଟର ଭିଦିତ ସନ୍ତୋଷ ଗୁଜରାଠୀ ଚମତ୍କାର ପ୍ରତ୍ୟାବର୍ତ୍ତନ କରିବା ସହ ଦୁଇଟି ବିଜୟ ହାସଲ କରିଛନ୍ତି। ଅନ୍ୟପକ୍ଷରେ ପ୍ରଥମ ଦିନରେ ସଫଳ ରହିଥିବା ଉଭୟ ମହିଳା ଖେଳାଳି ଗୋଟିଏ ଲେଖାଏ ଡ୍ର ଓ ପରାଜୟ ହାସଲ କରିଛନ୍ତି। ପୁରୁଷ ବ୍ୟକ୍ତିଗତ ଇଭେଣ୍ଟରେ ୨୮ ବର୍ଷୀୟ ଗୁଜରାଠୀ ତୃତୀୟ ରାଉଣ୍ଡରେ ଥାଇଲାଣ୍ଡର ପ୍ରିନ୍ ଲାଓହାଓ୍ବିରାପାପଙ୍କୁ ପରାସ୍ତ କରିଥିବା ବେଳେ ପରବର୍ତ୍ତୀ ରାଉଣ୍ଡରେ ଭିଏତନାମର ଲେ ଟୁଆନ୍ ମିନଙ୍କୁ ହରାଇଥିଲେ। ଅନ୍ୟତମ ଭାରତୀୟ ଗ୍ରାଣ୍ଡମାଷ୍ଟର ଅର୍ଜୁନ୍ ଏରିଗାସୀ ଭିଏତ୍ନାମର ଏନ୍ଗୁଏନ୍ ଏନଗକ୍ ଟ୍ରୁଓଙ୍ଗଙ୍କୁ ହରାଇଥିବା ବେଳେ ଇରାନର ଗ୍ରାଣ୍ଡ ମାଷ୍ଟର ଟାବାଟବେଆଇ ସୟଦ ମହମ୍ମଦାମିଙ୍କ ସହିତ ମ୍ୟାଚ୍ ଡ୍ର ରଖିଥିଲେ। ଉଭୟ ଭିଦିତ ଓ ଅର୍ଜୁନ୍ ୩ ପଏଣ୍ଟ ସହିତ ଯୁଗ୍ମ ଦ୍ୱିତୀୟ ସ୍ଥାନରେ ରହିଛନ୍ତି। ଉଜ୍ବେକିସ୍ତାନର ନୋଡିର୍ବେକ୍ ଅବଦୁସାଟୋରୋଭ ଓ ଚାଇନାର ଓ୍ବେଇ ଇ ୩.୫ ପଏଣ୍ଟ ସହିତ ପ୍ରଥମ ସ୍ଥାନରେ ରହିଛନ୍ତି।
ମହିଳା ବ୍ୟକ୍ତିଗତ ଇଭେଣ୍ଟରେ ଭାରତର ଡି. ହାରିକା ଓ କୋନେରୁ ହମ୍ପି ଗୋଟିଏ ଲେଖାଏ ମ୍ୟାଚ୍ ଡ୍ର ରଖିଥିବା ବେଳେ ଗୋଟିଏ ଲେଖାଏ ପରାଜୟ ବରଣ କରିଛନ୍ତି। ଉଭୟ ପ୍ରଥମ ଦିନରେ ୨ ପଏଣ୍ଟ ଲେଖାଏ ଅର୍ଜନ କରିଥିଲେ। ଚାଇନାର ଟପ୍ ସିଡ୍ ଖେଳାଳି ହୋଉ ୟିଫାନ୍ ଉଭୟ ଭାରତୀୟ ଖେଳାଳିଙ୍କୁ ପରାସ୍ତ କରିଥିଲେ। ଚାଇନାର ଝୁ ଜିନରଙ୍କ ସହିତ ହମ୍ପି ମ୍ୟାଚ୍ ଡ୍ର ରଖିଥିବା ବେଳେ ଉଜ୍ବେକିସ୍ତାନର ନିଲୁଫର ୟାକୁବ ବାୟେଭାଙ୍କ ସହିତ ଡ୍ର ରଖିଥିଲେ ଡି ହାରିକା।
ଟେନିସ୍: ଟେନିସ୍ରେ ଭାରତ ସୋମବାର ଏକ ବଡ ବିପର୍ଯ୍ୟୟର ସମ୍ମୁଖୀନ ହୋଇଛି। ଟପ୍ ସିଡେଡ୍ ତଥା ସ୍ବର୍ଣ୍ଣ ପଦକ ଫେଭରିଟ୍ ରୋହନ ବୋପାନ୍ନା-ୟୁକି ଭାମ୍ବ୍ରିଙ୍କ ଯୋଡି ବିଦାୟ ନେଇଛନ୍ତି। ଉଜବେକିସ୍ତାନର ସେର୍ଗେଇ ଫୋମିନ୍-ଖୁମୋୟୁନ୍ ସୁଲତାନୋଭଙ୍କଠାରୁ ୨-୬, ୬-୩ ଓ ୧୦-୬ରେ ପରାସ୍ତ ହୋଇଛନ୍ତି। ୨୦୧୮ରେ ଦ୍ୱିଜ ଶରଣଙ୍କ ସହିତ ବୋପାନ୍ନା ସ୍ବର୍ଣ୍ଣ ପଦକ ବିଜୟୀ ହୋଇଥିଲେ।
ରଗ୍ବୀ: ସେଭେନ୍ ଏ ସାଇଡ୍ ରଗ୍ବୀରେ ଭାରତୀୟ ମହିଳା ଦଳ କ୍ରମାଗତ ୪ ମ୍ୟାଚରେ ପରାଜୟ ବରଣ କରିଛି। ପ୍ରଥମ ଦିନରେ ଦୁଇଟି ପରାଜୟ ସହ ଦଳ ବିଦାୟ ନେଇଥିଲା। ରବିବାର ହଂକଂ ଓ ଜାପାନଠାରୁ ହାରିଥିବା ବେଳେ ସୋମବାର ଅନ୍ତିମ ଗ୍ରୁପ୍ ମ୍ୟାଚରେ ସିଙ୍ଗାପୁର ଠାରୁ ୧୫-୦ରେ ପରାଜିତ ହୋଇଥିଲା। ସପ୍ତମ-ଅଷ୍ଟମ ସ୍ଥାନ ପାଇଁ ଖେଳା ଯାଇଥିବା ମ୍ୟାଚରେ କାଜାଖସ୍ତାନ ନିକଟରୁ ୨୪-୭ରେ ପରାଜିତ ହୋଇ ଅଭିଯାନ ଶେଷ କରିଛି ଭାରତ।
