ଜାତୀୟ ସିନିୟର ଭଲିବଲ୍ ଚାମ୍ପିୟନଶିପ୍ ଉଦ୍ଘାଟିତ: ପୁରୁଷ ବର୍ଗରେ ଓଡ଼ିଶାର ବିଜୟ ଅଭିଯାନ
21 ଭୁବନେଶ୍ୱର,୬।୩(ସ୍ପୋଟର୍ସ ବ୍ୟୁରୋ): କିଟ୍ର ବିଜୁ ପଟ୍ଟନାୟକ ଇନ୍ଡୋର ଷ୍ଟାଡିୟମରେ ଶୁକ୍ରବାର ୬୯ତମ ଜାତୀୟ ସିନିୟର ଭଲିବଲ୍ ଚାମ୍ପିୟନଶିପ୍ ଉଦ୍ଘାଟିତ ହୋଇଛି। ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ ମନ୍ତ୍ରୀ ତୁଷାରକାନ୍ତି ବେହେରା ମୁଖ୍ୟ ଅତିଥିଭାବେ ଯୋଗ ଦେଇଥିଲେ। ସେହିପରି ଭଲିବଲ୍ ଫେଡେରେଶନ ଅଫ୍ ଇଣ୍ଡିଆ (ଭିଏଫ୍ଆଇ) ସାଧାରଣ ସମ୍ପାଦକ ଅନିଲ ଚୌଧୁରୀ, ଭିଏଫ୍ଆଇ ବରିଷ୍ଠ ଉପସଭାପତି ତଥା କଣ୍ଟ୍ରୋଲ କମିଟି ଅଧ୍ୟକ୍ଷ ରଥିନ ରାୟ, ଏମ୍ପି ତଥା ଭିଏଫ୍ଆଇ ଅଧ୍ୟକ୍ଷ ଏବଂ କିଟ୍ ଓ କିସ୍ ପ୍ରତିଷ୍ଠାତା ଅଚ୍ୟୁତ ସାମନ୍ତ, ଆୟୋଜନ କମିଟି ଅଧ୍ୟକ୍ଷା ତଥା କିଟ୍ ବିଶ୍ୱବିଦ୍ୟାଳୟ ଉପକୁଳପତି ପ୍ରଫେସର ସସ୍ମିତା ସାମନ୍ତ, କୁଳପତି ପ୍ରଫେସର ହୃଷୀକେଶ ମହାନ୍ତି, ଆୟୋଜନ କମିଟି ସମ୍ପାଦକ ତଥା ଭିଏଫ୍ଆଇ ଯୁଗ୍ମ ସମ୍ପାଦକ ଓ ଓଡ଼ିଶା ଭଲିବଲ୍ ଆସୋସିଏଶନ ସାଧାରଣ ସମ୍ପାଦକ ତଥା କିଟ୍ ବିଶ୍ୱବିଦ୍ୟାଳୟ କ୍ରୀଡ଼ା ନିର୍ଦ୍ଦେଶକ ଗଗନେନ୍ଦୁ ଦାଶ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ।
ବିଜୁ ପଟ୍ଟନାୟକଙ୍କ ୧୦୫ତମ ଜୟନ୍ତୀ ଅବସରରେ ଏହି ଚାମ୍ପିୟନଶିପ୍ରେ ୨୮ଟି ରାଜ୍ୟ ଓ ୮ଟି କେନ୍ଦ୍ରଶାସିତ ଅଞ୍ଚଳରୁ ୧୨ଶହରୁ ଊର୍ଦ୍ଧ୍ୱ ପୁରୁଷ ଓ ମହିଳା ଖେଳାଳି ଅଂଶଗ୍ରହଣ କରିଛନ୍ତି। ଖେଳାଳି ଓ ଅଫିସିଆଲଙ୍କ ଉପସ୍ଥିତିରେ ଅତିଥିମାନେ ବିଜୁ ପଟ୍ଟନାୟକଙ୍କ ଫଟୋଚିତ୍ରରେ ମାଲ୍ୟାର୍ପଣ କରିବା ପରେ ଉଦ୍ଘାଟନୀ କାର୍ଯ୍ୟ ଆରମ୍ଭ ହୋଇଥିଲା।
ଭାରତୀୟ ଭଲିବଲ୍ ଇତିହାସରେ ଓଡ଼ିଶା ପ୍ରଥମଥର ପାଇଁ ଲଗାତର ଦୁଇଥର ଏହି ଚାମ୍ପିୟନଶିପ୍ ଆୟୋଜନ କରୁଛି। ଏହାପୂର୍ବରୁ ଗତବର୍ଷ ଚାମ୍ପିୟନଶିପ୍ର ୬୮ତମ ସଂସ୍କରଣ ସଫଳତାର ସହ କିଟ୍ରେ ଆୟୋଜିତ ହୋଇଥିଲା। ପ୍ରଥମଥର ଲାଗି ବିଜୁ ପଟ୍ଟନାୟକ ଇନ୍ଡୋର ଷ୍ଟାଡିୟମ କୋର୍ଟରେ ମ୍ୟାଚ୍ଗୁଡିକ ଆୟୋଜିତ ହେବ। ଏହି ଚାମ୍ପିୟନଶିପ୍ ମାଧ୍ୟମରେ ନିକଟରେ ଆୟୋଜନ ହେବାକୁ ଥିବା ଏସିଆନ ଚାମ୍ପିୟନଶିପ୍ ଓ ଅନ୍ୟ ଅନ୍ତର୍ଜାତୀୟ ମିଟ୍ରେ ଯୋଗଦେବା ପାଇଁ ଖେଳାଳି ଚୟନ କରାଯିବ। ରାଜ୍ୟ ସରକାରଙ୍କ କୋଭିଡ୍-୧୯ ନିୟମାବଳୀକୁ ଦୃଷ୍ଟିରେ ରଖି ଏହି ଇଭେଣ୍ଟ ଆୟୋଜନ କରାଯାଉଛି। ପ୍ରଥମ ଦିବସରେ ପୁରୁଷ ବିଭାଗରେ ଓଡ଼ିଶା ଓ ମଧ୍ୟପ୍ରଦେଶ ମଧ୍ୟରେ ଓ ମହିଳା ବିଭାଗରେ ଓଡ଼ିଶା ଓ ରାଜସ୍ଥାନ ମଧ୍ୟରେ ଉଦ୍ଘାଟନୀ ମ୍ୟାଚ୍ ଅନୁଷ୍ଠିତ ହୋଇଥିଲା। ଓଡ଼ିଶାରେ ପୂର୍ବରୁ ଏକାଧିକ ଜାତୀୟ ଭଲିବଲ୍ ଚାମ୍ପିୟନଶିପ୍ ସଫଳତା ସହ ଆୟୋଜିତ ହୋଇଛି। ପୂର୍ବରୁ ଓଡ଼ିଶାରେ ୨୦୦୯ରେ ୩୬ତମ ଜୁନିୟର ଭଲିବଲ ଚାମ୍ପିୟନଶିପ୍, ୨୦୧୯ରେ ୪୧ତମ ଜାତୀୟ ସବ୍ଜୁନିୟର ଭଲିବଲ୍ ଚାମ୍ପିୟନଶିପ୍ ଆୟୋଜନ ହୋଇଛି।
ପୁରୁଷ ବର୍ଗରେ ଓଡ଼ିଶା ଉଦ୍ଘାଟନୀ ମ୍ୟାଚ୍ରେ ୩-୦ରେ ମଧ୍ୟପ୍ରଦେଶକୁ ହରାଇ ବିଜୟ ଅଭିଯାନ ଆରମ୍ଭ କରିଛି। ଓଡ଼ିଶା ୨୫-୨୦, ୨୫-୨୦, ୨୮- ୨୬ରେ ମଧ୍ୟପ୍ରଦେଶକୁ ହରାଇଛି। ସେହିପରି ଦ୍ୱିତୀୟ ମ୍ୟାଚ୍ରେ ପଶ୍ଚିମବଙ୍ଗ ୩-୦ରେ ଦିଲ୍ଲୀକୁ ହରାଇଛି। ତୃତୀୟ ମ୍ୟାଚ୍ରେ ଛତିଶଗଡ଼ ପୁରୁଷ ଦଳ ୩-୦ରେ ଲଦାଖକୁ ହରାଇ ଅଭିଯାନ ଆରମ୍ଭ କରିଛି। ମହିଳା ବିଭାଗରେ କିନ୍ତୁ ଓଡ଼ିଶା ଏହାର ପ୍ରଥମ ମ୍ୟାଚ ହାରି ଯାଇଛି। କଡ଼ା ସଂଘର୍ଷ ପରେ ଓଡ଼ିଶା ଦଳ ରାଜସ୍ଥାନଠାରୁ ୧୯-୨୫, ୨୫-୯, ୧୭-୨୫, ୨୫-୧୮ ଓ ୧୪-୧୬ ପଏଣ୍ଟରେ ପରାସ୍ତ ହୋଇଛି।