ଭୁବନେଶ୍ୱର, ୧୩।୩(କ୍ରୀଡ଼ା ପ୍ରତିନିଧି)-
ଓଡ଼ିଶା ରାଜ୍ୟ ଟେନିସ କ୍ରିକେଟ ଆସୋସିଏଶନ ଆନୁକୂଲ୍ୟରେ ଚାଲିଥିବା ୫ମ ଜାତୀୟ ସିନିୟର ଟେନିସ କ୍ରିକେଟ ଚାମ୍ପିୟନଶିପ୍ରେ ଓଡ଼ିଶା ପୁରୁଷ ଦଳ କ୍ରମାଗତ ଦ୍ୱିତୀୟ ବିଜୟ ହାସଲ କରିଛି। ପ୍ରଥମ ମ୍ୟାଚରେ କର୍ନାଟକକୁ ହରାଇ ଅଭିଯାନ ଆରମ୍ଭ କରିଥିବା ଓଡ଼ିଶା ଶୁକ୍ରବାର ଦ୍ୱିତୀୟ ମ୍ୟାଚରେ ଗୋଆକୁ ପରାସ୍ତ କରିଛି। ଫଳରେ ଓଡ଼ିଶା ପ୍ରି-କ୍ୱାର୍ଟର ଫାଇନାଲରେ ପ୍ରବେଶ କରିଛି। ଆଲୋକ ଅଭାବ ଯୋଗୁ ମ୍ୟାଚ ଗୁରୁବାର ଅଧାରୁ ବନ୍ଦ ଥିଲା। ଶୁକ୍ରବାର ଓଡ଼ିଶା ୧୪ ରନରେ ବିଜୟୀ ହୋଇଥିଲା। ସେଞ୍ଚୁରିଅନ ଗ୍ରାଉଣ୍ଡରେ ଅନୁଷ୍ଠିତ ଏହି ମ୍ୟାଚରେ ଟସ୍ ହାରି ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇଥିବା ଓଡ଼ିଶା ୮ ଓଭରରେ ୪ ଉଇକେଟ ହରାଇ ୮୩ ରନ କରିଥିଲା। ଦଳ ପକ୍ଷରୁ ସୌମ୍ୟ ମହାନ୍ତି ସର୍ବାଧିକ ୫୮ ରନ କରିଥିବାବେଳେ ବିପକ୍ଷ ଦଳର ଓଁକାର ୨ଟି ଉଇକେଟ ନେଇଥିଲେ। ୮୪ ରନ ବିଜୟ ଲକ୍ଷ୍ୟନେଇ ବ୍ୟାଟିଂ କରିଥିବା ଗୋଆ ୮ ଓଭରରେ ୪ ଉଇକେଟ ହରାଇ ୬୯ ରନ କରିବାକୁ ସକ୍ଷମ ହୋଇଥିଲା। ଦଳ ପକ୍ଷରୁ ଅନୀଲ ସର୍ବାଧିକ ୩୩ ରନ କରିଥିଲେ। ଓଡ଼ିଶାର ସ୍ବାଗତ ଚକ୍ର ଓ ସୌମ୍ୟ ଗୋଟିଏ ଲେଖାଏ ଉଇକେଟ ନେଇଥିଲେ। ଅଲରାଉଣ୍ଡ ପ୍ରଦର୍ଶନ ପାଇଁ ସୌମ୍ୟଙ୍କୁ ମ୍ୟାନ ଅଫ୍ ଦି ମ୍ୟାଚ ପୁରସ୍କାର ପ୍ରଦାନ କରାଯାଇଥିଲା। ଓଡ଼ିଶା ପ୍ରି-କ୍ୱାର୍ଟର ଫାଇନାଲରେ ପଶ୍ଚିମବଙ୍ଗକୁ ଭେଟିବ।
ତୃତୀୟ ଦିବସରେ ଅନୁଷ୍ଠିତ ଅନ୍ୟ ମ୍ୟାଚ ଗୁଡ଼ିକ ମଧ୍ୟରେ ଲାକ୍ଷାଦୀପ ୧୦ ଉଇକେଟରେ ଆସାମକୁ ପରାସ୍ତ କରିଛି। ପ୍ରଥମେ ବ୍ୟାଟିଂ କରିଥିବା ଆସାମ ୮ ଓଭରରେ ୮ ଉଇକେଟ ହରାଇ ୫୩ ରନ କରିଥିବାବେଳେ ଲାକ୍ଷାଦୀପ ୫ ଓଭରରେ କୌଣସି ଉଇକେଟ ନ ହରାଇ ୫୭ ରନ ସଂଗ୍ରହ କରି ନେଇଥିଲା। ବିଜୟୀ ଦଳର ମହମ୍ମଦ ରସିକ ଗୋଟିଏ ଉଇକେଟ ନେଇଥିବାବେଳେ ୨୭ ରନ ସ୍କୋର କରି ମ୍ୟାନ ଅଫ୍ ଦି ମ୍ୟାଚ ବିବେଚିତ ହୋଇଥିଲେ। ସେହିପରି ଗୁଜରାଟ ୭ ଉଇକେଟରେ ଆନ୍ଧ୍ର ପ୍ରଦେଶ, ଗୋଆ ୭ ଉଇକେଟରେ କର୍ନାଟକ, ଛତିଶଗଡ଼ ୮ ଉଇକେଟରେ ରାଜସ୍ଥାନ, ମୁମ୍ବାଇ ୨୩ ରନରେ ବିହାର, ତାମିଲନାଡ଼ୁ ‘ବି’ ୨୮ ରନରେ ଆନ୍ଧ୍ରପ୍ରଦେଶକୁ ପରାସ୍ତ କରିଛି। ଏଥିସହ ପ୍ରି-କ୍ୱାର୍ଟର ଫାଇନାଲ ଲାଇନ୍ଅପ୍ ହୋଇଯାଇଛି। ଏହି ପର୍ଯ୍ୟାୟରେ ମଧ୍ୟପ୍ରଦେଶ-ବିଦର୍ଭ, ଛତିଶଗଡ଼-ଗୋଆ, ମହାରାଷ୍ଟ୍ର-ହରିୟାଣା, ପଣ୍ଡିଚେରୀ-ଝାଡ଼ଖଣ୍ଡ, ତାମିଲନାଡ଼ୁ-ଗୁଜରାଟ, ଡାମନ-ଲାକ୍ଷାଦ୍ୱିପ ଓ କେରଳ-ମୁମ୍ବାଇ ମଧ୍ୟରେ ମୁକାବିଲା ହେବ।
