ଭଞ୍ଜନଗର,୯/୬(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗର ଘୁମୁସର ଗବେଷଣା ପରିଷଦ କାର୍ଯ୍ୟାଳୟ ପରିସରରେ ମଙ୍ଗଳବାର ପୂର୍ବତନ ମୁଖ୍ୟମନ୍ତ୍ରୀ ନନ୍ଦିନୀ ଶତପଥୀଙ୍କ ଜୟନ୍ତୀ ଉତ୍ସବ ପାଳିତ ହୋଇଯାଇଛି । ନନ୍ଦିନୀ ଶତପଥୀ ସ୍ମୃତି ସଂସଦ ଏବଂ ଘୁମୁସର ଗବେଷଣା ପରିଷଦ ପକ୍ଷରୁ ମିଳିତ ଭାବେ ଏହି ଉତ୍ସବ ପାଳିତ ହୋଇଥିଲା। ଆୟୋଜିତ ଉତ୍ସବରେ କେନ୍ଦୁପଦର କଲେଜର ଅବସରପ୍ରାପ୍ତ ଅଧ୍ୟକ୍ଷ ଡଃ ସନ୍ତୋଷ କୁମାର ଆପଟ ମୁଖ୍ୟ ଅତିଥି ଭାବେ ଯୋଗଦେଇ ନନ୍ଦିନୀ ଦେବୀ ଜଣେ ଦୂରଦୃଷ୍ଟି ସମ୍ପନ୍ନ ନାରୀ ନେତ୍ରୀ ଥିଲେ ବୋଲି କହିଥିଲେ। ଓଡ଼ିଶାର ଶିକ୍ଷକ ସମାଜ ପାଇଁ ତାଙ୍କର ଅବଦାନ ଅବିସ୍ମରଣୀୟ ହୋଇ ରହିବ। ଓଡ଼ିଶାର ସାମଗ୍ରିକ ବିକାଶ ପାଇଁ ତାଙ୍କର କିଛି ଦୃଢ଼ ନିଷ୍ପତ୍ତି ଓଡ଼ିଶାକୁ ଆଗେଇ ନେବାରେ ସହାୟକ ହୋଇଥିଲା। ଜଣେ ସ୍ପଷ୍ଠ ନାରୀ ନେତ୍ରୀ ଭାବେ ସେ ପରିଚିତ ଥିଲେ ବୋଲି ଶ୍ରୀ ଆପଟ କହିଥିଲେ।
ଅବସରପ୍ରାପ୍ତ ପ୍ରଧାନ ଶିକ୍ଷକ ତଥା ଶିକ୍ଷକ ନେତା ସନ୍ତୋଷ ଜେନା ଅନ୍ୟତମ ଅତିଥି ଭାବେ ଯୋଗଦେଇ ରାଜ୍ୟର ପ୍ରଥମ ମହିଳା ମୁଖ୍ୟମନ୍ତ୍ରୀ ହେଉଛନ୍ତି ନନ୍ଦିନୀ ଦେବୀ ବୋଲି କହିଥିଲେ। ଏଥିସହ ସେ କହିଥିଲେ ଯେ ଶିକ୍ଷକ ମାନଙ୍କ ଚାକିରି ସର୍ତ୍ତାବଳୀ ଏବଂ ଦରମା ସମସ୍ୟା ନନ୍ଦିନୀ ଦେବୀଙ୍କ ଦ୍ୱାରା ସମାଧାନ ହୋଇଥିଲା। ନନ୍ଦିନୀ ଦେବୀ ଡହ ଜଳଭଣ୍ଡାର ଶିଳାନ୍ୟାସ କରିବାକୁ ଆସିଥିବା ସମୟରେ ତାଙ୍କ ନାମରେ ନନ୍ଦିନୀପଲ୍ଲୀ ପ୍ରତିଷ୍ଠା ହୋଇଥିଲା ବୋଲି ଜେନା କହିଥିଲେ।
ଅବସରପ୍ରାପ୍ତ ସହକାରୀ ଗୋଷ୍ଠୀ ଶିକ୍ଷା ଅଧିକାରୀ ତଥା ଶିକ୍ଷକ ନେତା ଜଗବନ୍ଧୁ ଜେନା ସମ୍ମାନିତ ଅତିଥି ଭାବେ ଯୋଗଦେଇ ନନ୍ଦିନୀ ଦେବୀ ପ୍ରାଥମିକ ଶିକ୍ଷକ ଠାରୁ ଆରମ୍ଭ କରି କଲେଜ ପର୍ଯ୍ୟନ୍ତ ସମସ୍ତଙ୍କୁ ଡାଇରେକ୍ଟ ପେମେଣ୍ଟ ଦେବା ବ୍ୟବସ୍ଥା ଆରମ୍ଭ କରିଥିଲେ ବୋଲି କହିଥିଲେ। ତେଣୁ ନନ୍ଦିନୀ ଦେବୀ ସର୍ବଦା ଶିକ୍ଷକମାନଙ୍କ ସ୍ମରଣୀୟ ହୋଇ ରହିବେ। ଶିକ୍ଷକମାନେ ଯେଉଁଭଳି ଅବହେଳିତ ଅବସ୍ଥାରେ ଥିଲେ ସେଥିରୁ ସେ ଶିକ୍ଷକ ସମାଜକୁ ଉଦ୍ଧାର କରିଥିଲେ। ଶିକ୍ଷକମାନଙ୍କୁ ପ୍ରତ୍ୟକ୍ଷ ଦରମା ଦେବା ବ୍ୟବସ୍ଥା ନନ୍ଦିନୀ ଦେବୀ ଆରମ୍ଭ କରିଥିଲେ। ଯାହାକି ଏକ ଯୁଗାନ୍ତକାରୀ ପଦକ୍ଷେପ ବୋଲି ଜଗବନ୍ଧୁ କହିଥିଲେ। ଘୁମୁସର ସମ୍ବାଦ ସମ୍ପାଦକ ନେତାଜୀ ବିଷୋୟୀ ନନ୍ଦିନୀ ଦେବୀଙ୍କ ଜୀବନୀ ସଂପର୍କରେ କହିବା ସହ ଆଗାମି ଦିନରେ ଜୟନ୍ତୀ ଉତ୍ସବକୁ ଆହୁରି ବଡ ଧରଣର କରିବା ପାଇଁ କହିଥିଲେ।
ବୈଠକରେ ଅନ୍ୟମାନଙ୍କ ମଧ୍ୟରେ ଅବସରପ୍ରାପ୍ତ ପ୍ରାଧ୍ୟାପକ ଡଃ ଶିରୀଶ କୁମାର ଷଡ଼ଙ୍ଗୀ, ଘୁମୁସର ଗବେଷଣା ପରିଷଦର ସମ୍ପାଦକ ତଥା ପ୍ରାଧ୍ୟାପକ ତପନ ମିଶ୍ର, ଜି ଉଦୟଗିରି ମହାବିଦ୍ୟାଳୟର ଅର୍ଥନୀତି ବିଭାଗର ବିଭାଗୀୟ ମୁଖ୍ୟ ପ୍ରାଧ୍ୟାପକ ବିନାୟକ ବିଶ୍ୱାଳ, ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟ ବଟନି ବିଭାଗର ବିଭାଗୀୟ ମୁଖ୍ୟ ଅଧ୍ୟାପିକା ସୁନିତା ରାଣୀ ଖଣ୍ଡୁଆଳ, ବେଲଗୁଣ୍ଠା କଲେଜର ଅଧ୍ୟାପକ ଡ ଅଜୟ ବିଶାଳ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ। ଧରିତ୍ରୀ ପ୍ରତିନିଧି ବାବୁଲା ପ୍ରଧାନ ସଭାକୁ ସଂଯୋଜନା କରିଥିଲେ।
Dharitri – Odisha’s No.1 Odia Daily
