ଢେଙ୍କାନାଳ ଅଫିସ, ୧୪।୧୨ ହାତୀ ମୁହଁରୁ ଫସଲ, ଧନଜୀବନ ସୁରକ୍ଷା ଲାଗି ସାଇରନ୍ ବଜାଇ ବୁଲୁଛି ‘ଐରାବତ’। ଅତ୍ୟାଧୁନିକ ଜ୍ଞାନକୌଶଳରେ ନିର୍ମିତ ଏହି ଗାଡ଼ି ଏବଂ ପ୍ରଶିକ୍ଷିତ କର୍ମଚାରୀ ଜନବସତି ମୁହାଁ ହାତୀଙ୍କୁ ଜଙ୍ଗଲକୁ ଘଉଡ଼ାଇବାକୁ ନିରନ୍ତର ପ୍ରୟାସ କରୁଛନ୍ତି। ହେଲେ ଢେଙ୍କାନାଳ ସଦର ବ୍ଲକ ଗୋବିନ୍ଦପୁର ଅଞ୍ଚଳରେ ମାସେ ହେଲା ଉପଦ୍ରବ ଚଳାଇଥିବା ଗୋଠଛଡ଼ା ଦନ୍ତା ପାଇଁ ନାକେଦମ ହୋଇଗଲାଣି ବନ ବିଭାଗ। ସଞ୍ଜ ଗଡ଼ିଲେ ଉକ୍ତ ହାତୀ ଜମିରେ ପଶୁଛି। ୨୦୦ ଏକରରୁ ଊର୍ଦ୍ଧ୍ୱ ଜମିର ଫସଲ ନଷ୍ଟ କରିସାରିଲାଣି। ଜୀବନ ଭୟରେ ଚାଷୀମାନେ ମଞ୍ଚାରେ ରାତି ଅନିଦ୍ରା ରହି ଫସଲକୁ ସୁରକ୍ଷା ଦେଉଥିବାବେଳେ ସାଧାରଣ ଜନତା ଆତଙ୍କିତ ଅବସ୍ଥାରେ ଦିନ କାଟୁଛନ୍ତି।
ଗୋଠଛଡ଼ା ଦନ୍ତା ଦିନ ସାରା ଗାଁ ମୁଣ୍ଡରେ ବିଚରଣ କରୁଥିବାବେଳେ ସଞ୍ଜ ନଇଁଲେ ଜନବସତି ମୁହାଁ ହେଉଛି। ଆକ୍ରମଣ କରିବାକୁ ଗୋଡ଼ାଉଛି। ସନ୍ଧ୍ୟା ହେଲେ ଗୋବିନ୍ଦପୁର-ଗହମଖୁଣ୍ଟି ରାସ୍ତାରେ ଯାତାୟାତ ଠପ୍ ହୋଇଯାଉଛି। ଚାଷୀମାନେ ବିଲକୁ ଯିବାକୁ ଡରୁଛନ୍ତି। ଯୁବକମାନେ ରାତିରେ ବିଲ ନିକଟରେ ଠେଙ୍ଗାବାଡ଼ି ଧରି ଜଗୁଛନ୍ତି। ସମସ୍ୟା ସମ୍ପର୍କରେ ଗ୍ରାମବାସୀ ବନ ବିଭାଗର ଦୃଷ୍ଟି ଆକର୍ଷଣ କରିଥିଲେ ମଧ୍ୟ ସୁଫଳ ମିଳୁନାହିଁ। ଗହମଖୁଣ୍ଟି ଏବଂ ଗୋବିନ୍ଦପୁର ଅଞ୍ଚଳର ୩ ଜଣଙ୍କ ଜୀବନ ନେଇଛି ହାତୀ। ଦନ୍ତାକୁ ଟ୍ରାଙ୍କୁଲାଇଜ୍ କରି ଅନ୍ୟତ୍ର ସ୍ଥାନାନ୍ତର କରିବା ପାଇଁ ଚାଷୀ ସନ୍ତୋଷ ସ୍ବାଇଁ, ଶ୍ୱେତ ପାତ୍ର ପ୍ରମୁଖ ଦାବି କରିଛନ୍ତି। ନଚେତ୍ ବ୍ୟାପକ ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛନ୍ତି।
ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ଡା. ପ୍ରକାଶଚାନ୍ଦ ଗୋଗିନେନି କୁହନ୍ତି, ଉକ୍ତ ଦନ୍ତା ଉଗ୍ର ସ୍ବଭାବର। କିଛିଦିନ ରହିବା ପରେ ସେ ପଳାଇଯିବ। ବନ କର୍ମଚାରୀଙ୍କୁ ହାତୀର ଗତିବିଧି ଲକ୍ଷ୍ୟ କରିବା ସହିତ ପାଟ୍ରୋଲିଂ ପାଇଁ କୁହାଯାଇଛି। ଅନୁଗୋଳ ଜିଲାରେ ହାତୀ ଘଉଡ଼ାଇବା ପାଇଁ ‘ଫାୟାର ଗନ୍’ ପ୍ରଭାବୀ ସାବ୍ୟସ୍ତ ହୋଇଛି। ବିଭାଗ ପକ୍ଷରୁ ହାତୀକୁ ଅନ୍ୟତ୍ର ଘଉଡ଼ାଇବାକୁ ଉଦ୍ୟମ କରାଯାଉଛି।
