ପ୍ୟାରିସ(ଏପି):ମହାନ୍ ଟେନିସ ଖେଳାଳି ରାଫାଲ ନାଡାଲଙ୍କ ମ୍ୟାଚ ବିଜୟ ହାସଲ ସଂଖ୍ୟା ୧,୦୦୦ରେ ପହଞ୍ଚତ୍ଛି। ପ୍ୟାରିସ ମାଷ୍ଟର୍ସ ଟେନିସ ଟୁର୍ନାମେଣ୍ଟରେ ବୁଧବାର ଫେଲିସିଆନୋ ଲୋପେଜଙ୍କୁ ୪-୬, ୭-୬ (୫), ୬-୪ ସେଟ୍ରେ ପରାସ୍ତ କରିବା ପରେ ସେ ଏହି ମାଇଲଖୁଣ୍ଟ ହାସଲ କରିଛନ୍ତି। କୋଭିଡ୍ କଟକଣା ଯୋଗୁ ସେତେବେଳେ ୨୦,୦୦୦ ଆସନ କ୍ଷମତାବିଶିଷ୍ଟ ଷ୍ଟାଡିୟମରେ ସେତେବେଳେ ଜଣେ ହେଲେ ଦର୍ଶକ ତାଙ୍କୁ ଉତ୍ସାହିତ କରିବା ଲାଗି ଉପସ୍ଥିତ ନ ଥିଲେ। ୧୯୬୮ରେ ଓପନ୍ ଯୁଗ ଆରମ୍ଭ ହେବା ପରଠାରୁୁ ୧,୦୦୦ କିମ୍ବା ତା’ଠାରୁ ଅଧିକ ମ୍ୟାଚ ଜିତବା ଗୌରବ ହାସଲ କରିଥିବା ଅନ୍ୟ ପୁରୁଷ ଖେଳାଳିମାନେ ହେଲେ ଜିମ୍ମି କନ୍ନର୍ସ (୧,୨୭୪), ରୋଜର ଫେଡରର (୧,୨୪୨) ଏବଂ ଇଭାନ ଲେଣ୍ଡଲ (୧,୦୬୮। ଷ୍ଟାଡିୟମରେ ଦର୍ଶକ ନ ଥିବାରୁ ଏହି ସଫଳତାର ମଜା ସେ ଯଦିଓ ଉପଭୋଗ କରିପାରି ନ ଥିଲେ ଏହି ସଂଖ୍ୟା ହାସଲ କରିବା ତାଙ୍କ ପାଇଁ ସ୍ବତନ୍ତ୍ର ଥିଲା ବୋଲି ନାଡାଲ କହିଛନ୍ତି। ଚଳିତ ବର୍ଷ ନାଡାଲ ପ୍ୟାରିସ୍ରେ ତାଙ୍କ ଦ୍ୱିତୀୟ ମାଇଲଖୁଣ୍ଟ ହାସଲ କରିଥିଲେ। ଗତ ମାସରେ ରୋଲାଣ୍ଡ ଗ୍ୟାରୋସଠାରେ ସେ ଫ୍ରେଞ୍ଚ୍ ଓପନ ଜିତିବା ଦ୍ୱାରା ୨୦ ଗ୍ରାଣ୍ଡସ୍ଲାମ ବିଜୟରେ ରୋଜର ଫେଡରରଙ୍କ ରେକର୍ଡର ସମକକ୍ଷ ହୋଇ ପାରିଥିଲେ। କିନ୍ତୁ ସେତେବେଳେ ତାଙ୍କୁ ଉତ୍ସାହିତ କରିବା ଲାଗି ଷ୍ଟାଡିୟମରେ ୧,୦୦୦ ଦର୍ଶକ ଉପସ୍ଥିତ ଥିଲେ। ବର୍ସି ଆରେନାଠାରେ କିନ୍ତୁ ଜଣେ ହେଲେ ଦର୍ଶକଙ୍କୁ ଦେଖିବାକୁ ମିଳି ନ ଥିଲା।
