କଟକ,୬ା୧୦ (କାର୍ତ୍ତିକ ସାହୁ):ସଙ୍ଗୀତର ମଧୁର ମୂର୍ଚ୍ଛନା ପ୍ରାଣକୁ ଉଲ୍ଲସିତ କରେ। ମାନସିକ ଅବସାଦ ଦୂର କରି ସୁସ୍ଥତା ଆଣିଦିଏ। ମ୍ୟୁଜିକ୍ଥେରାପିର କଥା କିଛି ନୂଆ ନୁହେଁ। ତେବେ କଟକ ଏସ୍ସିବି ମେଡିକାଲ ପାଇଁ ଏହା ଏକ ନୂଆ ନିଷ୍ପତ୍ତି। ଏଣିକି ଆଇସିୟୁରେ ଚିକିତ୍ସିତ ହେଉଥିବା ଗୁରୁତର ରୋଗୀଙ୍କୁ ମ୍ୟୁଜିକ୍ଥେରାପି ଦିଆଯିବ। ଗୁରୁବାର ଅନୁଷ୍ଠିତ ଏସ୍ସିବି ମେଡିକାଲର ସ୍ବାସ୍ଥ୍ୟ ବିକାଶ ସମିତି ବୈଠକରେ ଏନେଇ ନିଷ୍ପତ୍ତି ହୋଇଥିବା କୁଳସଚିବ ଡ. ଅବିନାଶ ରାଉତ ସୂଚନା ଦେଇଛନ୍ତି।
ସୂଚନା ଅନୁସାରେ, ଏସ୍ସିବି ମେଡିକାଲ ବିଭିନ୍ନ ବିଭାଗର ଆଇସିୟୁ ଓ ଆଇସିୟୁ ୱାର୍ଡରେ ଗୁରୁତର ରୋଗୀମାନେ ଚିକିତ୍ସିତ ହେଉଛନ୍ତି। ସେଠାରେ ସେମାନଙ୍କ ମାନସିକ ଅବସାଦ ଦୂର କରିବା ପାଇଁ ୨୪ ଘଣ୍ଟିଆ ମ୍ୟୁଜିକ୍ଥେରାପି ବ୍ୟବସ୍ଥା ଆରମ୍ଭ ହେବ। ଏଥିରେ କୌଣସି ନିର୍ଦ୍ଦିଷ୍ଟ ଭଜନ ବାଜିବ ନାହିଁ। ହେଲେ ବିଭିନ୍ନ ଲୋକପ୍ରିୟ ଭଜନଗୁଡ଼ିକର କେବଳ ଯନ୍ତ୍ର ସଙ୍ଗୀତ (ବାଦ୍ୟଯନ୍ତ୍ର ଧ୍ୱନି) ବଜାଯିବ। ସ୍ବାସ୍ଥ୍ୟ ବିକାଶ ସମିତି ବୈଠକରେ ଏଭଳି ଗୁରୁତ୍ୱପୂର୍ଣ୍ଣ ନିଷ୍ପତ୍ତିକୁ ନେଇ କର୍ତ୍ତୃପକ୍ଷ ଅତ୍ୟନ୍ତ ଆଗ୍ରହୀ ଓ ତତ୍ପର ହୋଇଛନ୍ତି। ଆଗାମୀ ୨ ମାସ ମଧ୍ୟରେ ଏହି ସେବା କାର୍ଯ୍ୟକାରୀ କରିବାକୁ ଯୋଜନା ରଖାଯାଇଛି। ଏସ୍ସିବି ସମ୍ମିଳନୀ କକ୍ଷରେ ଅନୁଷ୍ଠିତ ବୈଠକରେ ମେଡିକାଲ ସୁପରିଣ୍ଟେଣ୍ଡେଣ୍ଟ ପ୍ରଫେସର ଡା. ସୁଧାଂଶୁ ଶେଖର ମିଶ୍ର, ସ୍ବାସ୍ଥ୍ୟ ବିକାଶ ସମିତିର ଚେୟାରମ୍ୟାନ ତଥା ସିଏମ୍ସି କମିଶନର ନିଖିଲ ପଓ୍ବନ କଲ୍ୟାଣ, ଡିନ୍ ପ୍ରଫେସର ଡା. ପ୍ରସେନ୍ଜିତ୍ ମହାନ୍ତିଙ୍କ ସମେତ ପ୍ରଫେସରମାନେ ଯୋଗଦେଇଥିଲେ। ଆଇସିୟୁରେ ଯନ୍ତ୍ର ସଙ୍ଗୀତ ବଜାଇବା ନିମନ୍ତେ କେତେକ ସଭ୍ୟ ପ୍ରସ୍ତାବ ଉପସ୍ଥାପନ କରିଥିଲେ। ଏହା ଉପରେ ଆଲୋଚନା, ପର୍ଯ୍ୟାଲୋଚନା ଓ ତର୍ଜମା କରାଯାଇ ସଙ୍ଗୀତର ଧୂନ ରୋଗୀ ସୁସ୍ଥ ହେବାରେ ସହାୟକ ହୋଇଥାଏ ବୋଲି ମତପ୍ରକାଶ ପାଇଥିଲା। ତେବେ ଆସନ୍ତା ୧ ମାସ ମଧ୍ୟରେ ଏଥିପାଇଁ ଆନୁଷଙ୍ଗିକ କାର୍ଯ୍ୟ ସାରିବାକୁ ସ୍ବାସ୍ଥ୍ୟ ବିକାଶ ସମିତି ଚେୟାରମ୍ୟାନ ନିର୍ଦ୍ଦେଶ ଦେଇଛନ୍ତି। ପ୍ରତି ଆଇସିୟୁର ୱାର୍ଡରେ ଯନ୍ତ୍ରସଙ୍ଗୀତ ସରଞ୍ଜାମ ଖଞ୍ଜିବା ପାଇଁ ସରକାରୀ ନିୟମ ଅନୁସାରେ ଟେଣ୍ଡର କରାଯିବ। ଏହାକୁ ତଦାରଖ ପାଇଁ ଜଣେ ଅଧିକାରୀଙ୍କୁ ଦାୟିତ୍ୱ ଦିଆଯିବ। ମ୍ୟୁଜିକ୍ଥେରାପିର କୌଣସି ଖରାପ ପ୍ରଭାବ ରୋଗୀଙ୍କ ଉପରେ ପଡ଼ିବ ନାହିଁ। ବରଂ ରୋଗୀ ଆରୋଗ୍ୟ ହେବାରେ ଏହା ସହାୟକ ହେବ ବୋଲି କୁଳସଚିବ ଡ. ରାଉତ କହିଛନ୍ତି।
