ସୁନ୍ଦରଗଡ,୭।୪(ଜୟ ନାରାୟଣ ମେଣ୍ଡୁଳି): ସୁନ୍ଦରଗଡ ଜିଲା ମୁଖ୍ୟ ଡାକ୍ତରଖାନାରେ ଦନ୍ତ ବିଭାଗରେ କାର୍ଯ୍ୟରତ ଜଣେ ମହିଳା ଡାକ୍ତରଙ୍କୁ ଅତିରିକ୍ତ ଜିଲା ମୁଖ୍ୟ ଚିକିତ୍ସାଧିକାରୀ(ଏଡିଏମଓ) ଡା. ପ୍ରକାଶ ବଳ ଅସଦାଚରଣ କରିଥିବା ନେଇ ଅଭିଯୋଗ ହୋଇଛି। ମହିଳା ଡାକ୍ତର ଜଣକ ଏ ସମ୍ପର୍କରେ ସ୍ଥାନୀୟ ଟାଉନ ଥାନାରେ ଅଭିଯୋଗ କରିଛନ୍ତି। ଅଭିଯୋଗ ପରେ ପୋଲିସ ପ୍ରକାଶଙ୍କ ବିରୋଧରେ ଟାଉନଥାନାରେ କେଶ ନମ୍ବର ୧୨୮/୨୦୨୪ରେ ଆଇପିସି ୩୪୧/୨୯୪/୩୫୪(କ)/୫୦୫/୫୦୯ରେ ମମଲା ରୁଜୁ କରି ତଦନ୍ତ ଆରମ୍ଭ କରିଛି।
ମହିଳା ଡାକ୍ତର ତାଙ୍କର ଏତଲାରେ ଦର୍ଶାଇଛନ୍ତି ଯେ, ସୁନ୍ଦରଗଡ ଜିଲା ଖଣିଜ ପ୍ରତିଷ୍ଠାନ(ଡିଏମଏଫ) ପକ୍ଷରୁ ଜିଲା ମୁଖ୍ୟ ଡାକ୍ତରଖାନାର ଦନ୍ତ ବିଭାଗର ମେଡ଼ିକାଲ ଅଫିସର ଭାବରେ ଗତ୨୦୧୯ଡିସେମ୍ବର୨୧ତାରିଖରେ ନିଯୁକ୍ତି ପାଇଛନ୍ତି। ସେତେବେଳେ ସର୍ଜରୀ ବିଭାଗରେ ଡାକ୍ତର ଥିବା ପ୍ରକାଶ ବଳ ଓପିଡି ଆସି ତାଙ୍କ ପ୍ରତି ଅଶାଳୀନ ମନ୍ତବ୍ୟ ଦେବା, ବିଭିନ୍ନ ସମୟରେ ଅପରେଶନ ଥିଏଟରକୁ ଡାକି ଶରୀରରେ ସ୍ପର୍ଶ କରିବା, ପିଠି, ବେକରେ ହାତ ଦେଇ ଆସୁଥିଲେ। ଏହାକୁ ପ୍ରତିବାଦ କଲେ ସେ ଏହାକୁ ଶୁଣୁ ନ ଥିଲେ।ଏ ହାକୁ ନେଇ ମହିଳା ଡାକ୍ତର ଜଣକୁ ତତ୍କାଳୀନ ଜିଲା ମୁଖ୍ୟ ଚିକିତ୍ସାଧିକାରୀ ଓ ଜିଲପାଳଙ୍କ ନିକଟରେ ଅଭିଯୋଗ କରିଥିଲେ। ଅଭିଯୋଗ ପରେ ଜିଲାପାଳଙ୍କ ନିର୍ଦ୍ଦେଶ କ୍ରମେ ଏକ ବିଭାଗୀୟ କମିଟି ଜରିଆରେ ତଦନ୍ତ ପରେ ମଧ ତାଙ୍କୁ କୌଣସି ନ୍ୟାୟ ମିଳି ନ ଥିଲା।
କିଛିଦିନ ଏହା ବନ୍ଦ ପରେ ବର୍ତ୍ତମାନ ଏଡିଏମଓ ଥିବା ଡା. ବଳ ୨୦୨୩ରେ ପୂର୍ବ ପରି ବ୍ୟବହାର ଆରମ୍ଭ କରିଥିଲେ। ଏଥିରେ ସେ ଅତିଷ୍ଠ ହୋଇ ପ୍ରତିବାଦ କରିଥିଲେ। ଫଳରେ ତାଙ୍କୁ ସେ ଅନ୍ୟତ୍ର ବଦଳି କରି ଦେବାକୁ ଧମକ ଦେଉଥିଲେ।
ଅପରପକ୍ଷରେ ଏଭଳି ଅଭିଯୋଗକୁ ଏଡିଏମଓ ଡା. ବଳ ଖଣ୍ଡନ କରିଛନ୍ତି। ସେ କହିଛନ୍ତି, ଦନ୍ତ ବିଭାଗ ରେ ୭ ଜଣ ଡାକ୍ତର କାର୍ଯ୍ୟ କରୁଛନ୍ତି। ହେଲେ ବିଭିନ୍ନ ସମୟରେ ପରସ୍ପରକୁ ମଧ୍ୟରେ ଗଣ୍ଡଗୋଳ ଲାଗିରହୁଛି। ଅଧିକାଂଶ ସମୟରେ ଏଭଳି ବିଶୃଙ୍ଖଳା ଯୋଗୁ ରୋଗୀ ସେବା ବାଧାପ୍ରାପ୍ତ ହେଉଥିବା ନେଇ ଜନସାଧାରଣଙ୍କଠାରୁ ବାରମ୍ବାର ଅଭିଯୋଗ ପରେ ଡା. ବଳ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଥିଲେ। ପ୍ରଶାସନିକ ଶୃଙ୍ଖଳା ଦୃଷ୍ଟିରୁ ଅଭିଯୋଗକାରିଣୀ ମହିଳା ଡାକ୍ତରଙ୍କ ଜିଲା ମୁଖ୍ୟ ଡାକ୍ତରଖାନା ପରିସରରେ ଥିବା ଏମସିଏଚ ବିଲଡିଙ୍ଗ(ମାଆ ଓ ଶିଶୁର ହସ୍ପିଟାଲ)କୁ ବଦଳି କରାଯାଇଥିଲା ଓ ସେ ଫେବୃଆରୀ ପହିଲାରୁ ସେଠାରେ ଜଏନ କରିବା କଥା। ମାତ୍ର ସେ ଏଥିରେ ଉତକ୍ଷିପ୍ତ ହୋଇ ଫୋନରେ ମୋତେ କାହିଁକି ସେଠିକୁ ବଦଳି କଲେ ବୋଲି ପଚାରିବା ସହ ପରେ ୪/୫ ଜଣ ସ୍ଥାନୀୟ ଯୁବକଙ୍କୁ ଧରି ମୋ ଅଫିସ ପ୍ରକୋଷ୍ଠରେ ପହଞ୍ଚି ପାଟିତୁଣ୍ଡ କରିଥିଲେ। ଯାହାକି ସିସିଟିଭି ଫୁଟେଜରେ ରେକର୍ଡ ରହିଛି। ଏହାପରେ ଦନ୍ତ ବିଭାଗରେ ଥିବା ସମସ୍ତ ମହିଳା ଡାକ୍ତରଙ୍କ ମଧ୍ୟରେ ଗତ ୩ତାରିଖରେ ଗଣ୍ଡଗୋଳ ଘଟିଥିଲା।ଏପରିକି ପରସ୍ପର ମଧ୍ୟରେ ଚୌକି ଫୋପାଡି ଗଣ୍ଡଗୋଳ କରିଥିଲେ। ଏଠାରେ ଦୁଇଟି ଗୋଷ୍ଠୀରେ ଡାକ୍ତର ହୋଇ ମୋ ବିରୋଧରେ ମିଥ୍ୟା ଆରୋପ ଲଗାଯାଇଥିବା ଏଡିଏମଓ ବଳ କହିଛନ୍ତି। ହେଲେ କିଏ ସତ କହୁଛି ତଦନ୍ତ ପରେ ସ୍ପଷ୍ଟ ହେବ। ପୋଲିସ ତଦନ୍ତ ଆରମ୍ଭ କରିଛି।
