କେସିଙ୍ଗା, ୮।୩(ଡି.ଏନ୍.ଏ.): କଳାହାଣ୍ଡି ଜିଲା କେସିଙ୍ଗା ଥାନା ଅଞ୍ଚଳର ଏକତରଫା ପ୍ରେମକୁ ନେଇ ହତ୍ୟାକାଣ୍ଡ ଘଟିଛି। କୌଣସି କାରଣକୁ ନେଇ ସୋମବାର ପୂର୍ବାହ୍ନରେ ପ୍ରେମିକ ଉକ୍ତ ଯୁବତୀଙ୍କୁ ଏକ ଛୁରିରେ ଆକ୍ରମଣ କରିଥିଲା। ଯୁବତୀଙ୍କ ମା’ ଝିଅକୁ ବଞ୍ଚାଇବାକୁ ଯାଇ ଆକ୍ରମଣର ଶିକାର ହୋଇ ମୃତ୍ୟୁବରଣ କରିଛନ୍ତି।
ପ୍ରକାଶ ଯେ, ଯୁବତୀ ସକାଳୁ ନିକଟସ୍ଥ ଜୋରରୁ ଗାଧୋଇ ଘରକୁ ଫେରୁଥିଲେ। ସେହି ସମୟରେ ତାଙ୍କୁ ଏକତରଫା ପ୍ରେମ କରୁଥିବା ଉକ୍ତ ଅଞ୍ଚଳର ଜଣେ ଯୁବକ ନିକଟସ୍ଥ ଛକରେ ଲୁଚି ରହିଥିଲେ। ଯୁବତୀଙ୍କୁ ନିକଟରେ ପାଇ ତାଙ୍କୁ ଛୁରିରେ ଆକ୍ରମଣ କରିଥିଲେ। ଯୁବତୀଙ୍କ ପାଟି ଶୁଣି ତାଙ୍କ ମା ଦୌଡି ଆସିଥିଲେ। ଫଳରେ ପ୍ରେମିକ ଯୁବତୀଙ୍କ ମା’ଙ୍କୁ ଛୁରିରେ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ତାଙ୍କୁ ନିକଟସ୍ଥ କେସିଙ୍ଗା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏ ନେଇ କେସିଙ୍ଗା ଥାନାରେ ମୃତ ମହିଳାଙ୍କ ସ୍ବାମୀ ଏକ ଲିଖିତ ଅଭିଯୋଗ କରିଛନ୍ତି। ଘଟଣାସ୍ଥଳରେ କେସିଙ୍ଗା ପୋଲିସ ପହଞ୍ଚି ତଦନ୍ତ ଜାରି ରହିଛି। ଏ ନେଇ ଥାନାରେ କେସ୍ ନଂ. ୭୮/୨୧ରେ ଏକ ମାମଲା ରୁଜୁ ହୋଇଛି।
