ଦିଗପହଣ୍ଡି,୨୬ା୯(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ପୋଲିସ ଏକ ହତ୍ୟା ଉଦ୍ୟମ ମାମଲାରେ ଶୁକ୍ରବାର ପାଟପୁର ଥାନା ଡୋଳବ ଗ୍ରାମର ତୋଫାନ ଗୌଡ଼, ମନୋଜ ରାଉଳ, ଜଗନ୍ନାଥ ପ୍ରଧାନ ଓରଫ ଜଗା ଏବଂ ଶିବ ପ୍ରଧାନଙ୍କୁ ଗିରଫ କରି କୋର୍ଟଚାଲାଣ କରିଛି। ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତମାନଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଯାଇଛି। ତୋଫାନ ଏବଂ ମନୋଜଙ୍କ ନିକଟରୁ ଘଟଣାରେ ବ୍ୟବହୃତ ୨ ବାଇକ୍ ଓ ଲୁହାଛଡ଼ ଜବତ କରାଯାଇଛି। ଖବରରୁ ଜଣାପଡିଛି, ଗତ ୬ ତାରିଖ ରାତି ପ୍ରାୟ ସାଢେ ୯ ଟାରେ ଦିଗପହଣ୍ଡି ଥାନା ଛଣମେରି ଗ୍ରାମର ସ୍ମୃତି ଦିପନ ପ୍ରଧାନ ତାଙ୍କ ଘର ପିଣ୍ଡାରେ ବସିଥିବା ବେଳେ ଡୋଳବ ଗ୍ରାମର ୧୨ ଯୁବକ ୫ଟି ବାଇକ୍ରେ ଆସି ସ୍ମୃତି ଦିପନଙ୍କୁ ଆପତ୍ତିଜନକ ଭାଷାରେ ଗାଳିଗୁଲଜ କରିଥିଲେ। ତୋ ଭାଇ ସଚିନକୁ ଡାକି ଆଣେ ବୋଲି କହିଥିଲେ। କଣ ପାଇଁ କହିବାରୁ ତୋଫାନ ଏକ ଲୁହାଛଡ଼ରେ ତାଙ୍କ ମୁଣ୍ଡକୁ ପିଟି ହତ୍ୟା ଉଦ୍ୟମ କରିଥିଲେ। ପାଟିଶୁଣି ସ୍ମୃତି ଦିପନଙ୍କ ମା’ ସେବତୀ ସେଠାକୁ ଆସି କଣ ପାଇଁ ପୁଅକୁ ମାରୁଛ ବୋଲି ପଚାରିବାରୁ ତାଙ୍କୁ ସେମାନେ ଗାଳି କରି ଅସଦାଚରଣ କରି ତାଙ୍କୁ ମଧ୍ୟ ଲାଠିରେ ମାଡ଼ ମାରିଥିଲେ। ପଡୋଶୀ କୁନା ପ୍ରଧାନ ଦୌଡ଼ି ଆସି ଛଡାଇବାରୁ ଅଭିଯୁକ୍ତମାନେ ତାଙ୍କ ଗୋଡ଼କୁ ଲାଠିରେ ମାଡ଼ ମାରିଥିଲେ। ପରେ ତାଙ୍କ ଘର କବାଟକୁ ଲାଠି ଓ ଲୁହାଛଡ଼ରେ ବାଡ଼ାଇ ଭାଙ୍ଗି ଦେଇ ପରିବାରର ସମସ୍ତଙ୍କୁ ଜୀବନରେ ମାରିଦେବାକୁ ଧମକ ଦେଇଥିଲେ। ବହୁ ସଂଖ୍ୟକ ସାହି ପଡୋଶୀ ସେଠାକୁ ଦୌଡି ଆସିବାରୁ ଅଭିଯୁକ୍ତମାନେ ଫେରାର ହୋଇଯାଇଥିଲେ। ଆହାତ ସ୍ମୃତି ଦିପନ ଏନେଇ ଥାନାରେ ଏତଲା ଦେବା ପରେ ଆଇଆଇସି ପ୍ରଶାନ୍ତ କୁମାର ପାତ୍ର ନଂ.୩୨୬/୨୫ରେ ଏକ ମାମଲା ରୁଜୁ କରି ଏସ୍ଆଇ ଜ୍ୟୋତି ରଞ୍ଜନ ବେହେରାଙ୍କୁ ତଦନ୍ତ ନିର୍ଦ୍ଦେଶ ଦେଇଥିଲେ।
ଗତ ୨ ତାରିଖ ସନ୍ଧ୍ୟାରେ ଡୋଳବ ଗ୍ରାମରେ ଦୁଇ ଗୋଷ୍ଠୀର ଯୁବକ ଗଣେଶ ମେଢ଼ ଭସାଣିରେ ଡିଜେ ଲଗାଇ ଶୋଭାଯାତ୍ରା କରିଥିଲେ। ଗ୍ରାମର ବଟ ଛକରେ ଉଭୟ ଗୋଷ୍ଠୀ ମୁହାମୁହିଁ ହେବା ସହ ପରସ୍ପରଙ୍କୁ ଆକ୍ରମଣ ପ୍ରତି ଆକ୍ରମଣ କରିଥିଲେ। ସେଥିରେ ଉଭୟ ଗୋଷ୍ଠୀର ୪ ଜଣ ଆହତ ହୋଇଥିଲେ। ଏନେଇ ଉଭୟ ଗୋଷ୍ଠୀ ପାଟପୁର ଥାନାରେ ଏତଲା ଦେଇଥିଲେ। ଘଟଣା ଦିନ ସ୍ମୃତି ଦିପନଙ୍କ ଭାଇ ଡିଜେ ସାଉଣ୍ଡ ବକ୍ସ ଡୋଳବ ଗାଁକୁ ନେଇଥିବା ସହ ଗଣ୍ଡଗୋଳରେ ସାମିଲ ଥିବାରୁ ଅଭିଯୁକ୍ତମାନେ ଆକ୍ରୋଶ ରଖି ତାଙ୍କୁ ଆକ୍ରମଣ ପାଇଁ ଯାଇଥିଲେ ବୋଲି ପ୍ରାଥମିକ ତଦନ୍ତରୁ ଜଣାପଡ଼ିଥିବା ତଦନ୍ତକାରୀ ଅଧିକାରୀ ଏସ୍ଆଇ ବେହେରା କହିଛନ୍ତି।
