ବୌଦ୍ଧ, ୨୮।୨(ସ୍ବ.ପ୍ର.): ବୌଦ୍ଧ ଜିଲା ଦୌରାଜଜ୍ ବିକ୍ରମ କୁମାର ପ୍ରଧାନ ସୋମବାର ଏକ ହତ୍ୟା ମାମଲାର ବିଚାର କରି ଅଭିଯୁକ୍ତଙ୍କୁ ଆଜୀବନ କାରାଦଣ୍ଡାଦେଶ ଆଦେଶ ପ୍ରଦାନ କରିଛନ୍ତି। ମାମଲାରୁ ପ୍ରକାଶ ଯେ, ବୌଦ୍ଧ ଥାନା ଅନ୍ତର୍ଗତ କିରାସିରା ଗ୍ରାମରେ ଜମିବାଡ଼ି ବିବାଦକୁ ନେଇ ଗତ ୭।୧।୨୧ରେ ନିରଞ୍ଜନ ନାଏକଙ୍କୁ ହତ୍ୟା କରାଯାଇଥିଲା। କିରାସିରା ଗ୍ରାମର ବିଦ୍ୟାଧର ନାଏକ ଓ ନିରଞ୍ଜନ ନାଏକଙ୍କ ମଧ୍ୟରେ ଜାଗାକୁ ନେଇ ଝଗଡ଼ା ଲାଗିରହିଥିଲା। ଉଭୟ ପରିବାର ପଡ଼ୋଶୀ ହୋଇଥିବାବେଳେ ଘର ଲାଗି କରି ରହିଛି। ମଝିରେ ପ୍ରାୟ ଦେଢଫୁଟ ହେବ ଏକ ଗଳି ଅଛି। ଉକ୍ତ ଜାଗାକୁ ନେଇ ବିଦ୍ୟାଧର ନିରଞ୍ଜନ ସହିତ ଝଗଡା କରୁଥିଲେ। ଫଳରେ ନିରଞ୍ଜନର ଘର କାନ୍ଥକୁ ପଲସ୍ତରା କରାଇ ଦେଉ ନ ଥିଲା। ତାଙ୍କର ସ୍ତ୍ରୀକୁ ଖରାପ ବ୍ୟବହାର ଦେଖାଉଥିଲା। ଖରାପ ବ୍ୟବହାର ପାଇଁ ନିରଞ୍ଜନ ଘଟଣାର ଚାରି ମାସେ ତଳେ ବଘିଆପଡ଼ା ଫାଣ୍ଡିରେ ଲିଖିତ ଭାବରେ ଜଣାଇଥିଲେ। ସେମାନଙ୍କ ମଧ୍ୟରେ ଆପୋସ ମିଳାମିଶା ହୋଇଥିଲା। ଗତ ୭।୧।୨୦୨୧ ତାରିଖ ଦିନ ପ୍ରାୟ ୧୧ ଟା ସମୟରେ ନିରଞ୍ଜନ, ତାର ସ୍ତ୍ରୀ ଓ ପୁଅକୁ ଧରି ନଦୀକୁ ଗାଧୋଇବାକୁ ଯାଇଥିଲେ। ନିରଞ୍ଜନ ପ୍ରଥମେ ଗାଧେଇ ସାରି ଆସି ତାର ଘର ସମ୍ମୁଖରେ ଥିବା ବାରଣ୍ଡାରେ ବସିଥିଲେ। ସେତିକିବେଳେ ଅଭିଯୁକ୍ତ ବିଦ୍ୟାଧର ନାଏକ ଏକ ଟାଙ୍ଗିଆ ଧରି ଆସି ପଛପଟୁ ନିରଞ୍ଜନର ବେକରେ ଚୋଟ ଉପରେ ଚୋଟ ମାରିଥିଲେ। ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ହତ୍ୟାକାଣ୍ଡ ପରେ ଅଭିଯୁକ୍ତ ବିଦ୍ୟାଧର ଏକ ସାଇକେଲରେ ଟାଙ୍ଗିଆକୁ ଧରି କମିରା ଗ୍ରାମ ଆଡକୁ ଚାଲିଯାଇଥିଲେ। ଏନେଇ ନିରଞ୍ଜନଙ୍କ ଭାଇ ବୌଦ୍ଧ ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା ରୁଜୁକରି ବିଦ୍ୟାଧରଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ପରବର୍ତ୍ତୀ ସମୟରେ ଏହି ମାମଲାଟି ଜିଲା ଦୌରାଜଜଙ୍କ ଅଦାଲତରେ (ଏସଟି ୩୩/୨୧)ରେ ବିଚାର ହୋଇଥିଲା। ସରକାରଙ୍କ ପକ୍ଷରୁ ୧୫ଜଣ ସାକ୍ଷୀଙ୍କ ବୟାନକୁ ଭିତ୍ତିକରି ପ୍ରମାଣ ଥିବା ନେଇ ଅଦାଲତ ଅଭିଯୁକ୍ତ ବିଦ୍ୟାଧରଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିବା ସହ ୧୦ ହଜାର ଟଙ୍କା ଜରିମାନା ଆଦେଶ ପ୍ରଦାନ କରିଛନ୍ତି। ଜରିମାନା ଅନାଦେୟ ହେଲେ ଅଧିକ ଛଅ ମାସ କାରାଦଣ୍ଡ ପ୍ରଦାନ କରାଯାଇଛି। ସରକାରଙ୍କ ପକ୍ଷରୁ ଏହି ମାମଲାକୁ ସରକାରୀ ଓକିଲ ସବିତା କୁମାରୀ ପଣ୍ଡା ପରିଚାଳନା କରିଥିଲେ।
