ନୂଆଦିଲ୍ଲୀ,୨୮।୨:ଦେଶର ପ୍ରମୁଖ ବ୍ୟବସାୟୀ ତଥା ଡିଏଲଏଫ୍ ଚେୟାର୍ମ୍ୟାନ୍ କୁଶଲ ପାଲ ସିଂ ୯୧ ବର୍ଷ ବୟସରେ ପ୍ରେମରେ ପଡିଛନ୍ତି। ୨୦୧୮ରେ ସେ ସ୍ତ୍ରୀଙ୍କୁ କ୍ୟାନସର ରୋଗରେ ହରାଇଥିଲେ। ଏବେ ପୁଣି ଥରେ ସେ ତାଙ୍କ ଜୀବନରେ ଏକ ସାଥୀ ପାଇଛନ୍ତି। ନିକଟରେ ଏକ ସାକ୍ଷାତକାରରେ କେପି ସିଂ ତାଙ୍କ ବ୍ୟକ୍ତିଗତ ଜୀବନ ବିଷୟରେ ଅନେକ ରହସ୍ୟ ପ୍ରକାଶ କରିଛନ୍ତି। ସେ ତାଙ୍କ ସ୍ତ୍ରୀ ଏବଂ ତାଙ୍କ ନୂତନ ପ୍ରେମ କାହାଣୀ ସହିତ ତାଙ୍କ ବନ୍ଧନ ବିଷୟରେ ଅନେକ କଥା ଶେୟାର କରିଥିଲେ।
କେପି ସିଂ କହିଛନ୍ତି, ସ୍ତ୍ରୀ ମୋର ସବୁଠୁ ଭଲ ସାଙ୍ଗ ଥିଲେ। ସେ କ୍ୟାନସର ରୋଗରେ ମୃତ୍ୟୁବରଣ କରିବା ପରେ ମୁଁ ଏକୁଟିଆ ରହିବାକୁ ପସନ୍ଦ କରିଥିଲି। ୬୫ ବର୍ଷ ଜଣେ ସାଙ୍ଗ ହୋଇ ରହିବା ପରେ, ଯଦି ତୁମେ ସାଥୀ ହରାଇବ ତେବେ ଜଣେ ହତାଶ ହେବା ସ୍ବାଭାବିକ। ନିଜର ବ୍ୟକ୍ତିଙ୍କୁ ହରାଇଲେ ଖୁବ୍ ଯନ୍ତ୍ରଣା ହୁଏ। ସ୍ତ୍ରୀ ମୋତେ ଜୀବନରେ ହାର୍ ନ ମାନିବାକୁ କହିଥିଲେ। ଆଗକୁ ବଢିବାକୁ ସେ ପରାମର୍ଶ ଦେଇଥିଲେ। ଏହି ଶବ୍ଦଗୁଡ଼ିକ ସର୍ବଦା ମୋ ସହିତ ରହିବ। ମୁଁ ସ୍ତ୍ରୀଙ୍କ ପରାମର୍ଶରେ ମାନି ଆଗକୁ ବଢୁଛି ଏବଂ ପୁଣି ଥରେ ପ୍ରେମ ପାଇଛି।
କେପି ସିଂ କହିଛନ୍ତି, ମୋ ନୂଆ ସାଥୀଙ୍କ ନାମ ଶିନା। ସାରା ବିଶ୍ୱରେ ତାଙ୍କର ଅନେକ ବନ୍ଧୁ ଅଛନ୍ତି। ସେ ସବୁ ପ୍ରକାର ପରିସ୍ଥିତି ପାଇଁ ନିଜକୁ ପ୍ରସ୍ତୁତ ରଖନ୍ତି। ମୁଁ ଶିନାଙ୍କ ସହ ସବୁଆଡେ ବୁଲିବାକୁ ଯାଏ। ଯେତେବେଳେ ବି ଜୀବନରେ କୌଣସି ପ୍ରକାରର ସମସ୍ୟା ଥାଏ, ସେ ସର୍ବଦା ସମର୍ଥନ କରନ୍ତି। ବର୍ତ୍ତମାନ ସେ ମୋ ଜୀବନର ଏକ ଗୁରୁତ୍ୱପୂର୍ଣ୍ଣ ଅଂଶ ହୋଇପାରିଛନ୍ତି।
