ମୁମ୍ବାଇ: ନାୟିକା ଅନନ୍ୟା ପାଣ୍ଡେ ନିଜର ଅଭିନୟକୁ ନେଇ ନ୍ୟୁ କମର ଭାବେ ବଲିଉଡରେ ସୃଷ୍ଟି କରିଛନ୍ତି ନିଜର ଏକ ଭିନ୍ନ ପରିଚୟ । ସୋସିଆଲ ମିଡିଆରେ ଆକ୍ଟିଭ ରହୁଥିବା ଅନନ୍ୟାଙ୍କ ଖୁବ୍ ପ୍ରଶଂସକ ବି ରହିଛନ୍ତି । କେବେ କେବେ ସେ ସୋସିଆଲ ମିଡିଆ ୟୁଜର୍ସଙ୍କ ବାଃ ବାଃ ପାଇ ଥାଆନ୍ତି ତ ପୁଣି କେବେ କେବେ ଟ୍ରୋଲ ବି ହୋଇ ଥାଆନ୍ତି । ହେଲେ ଏବେ ଏହି ଅଭିନେତ୍ରୀଙ୍କ ପ୍ରଶଂସକ ପାଲଟି ଯାଇଛି ମୁମ୍ବଇ ପୋଲିସ । ଅନନ୍ୟା ଏବେ ମୁମ୍ବାଇ ସାଇବର ପୋଲିସ ସହ ମିଶି ସାଇବର କ୍ରାଇମ ଉପରେ ସଚେତନତା ସୃଷ୍ଟି କରିବା ଆରମ୍ଭ କରିଛନ୍ତି । ନିକଟରେ ସେ ମୁମ୍ବାଇ ପୋଲିସର ସାଇବର ଅପରାଧ ଶାଖାର ଏସିପି ସନ୍ଦିପ କାର୍ତ୍ତିକ, ପିଏସ୍ଆଇ ଦତ୍ତାତ୍ରେୟ ଜ୍ଞାନେଶ୍ୱର ଭୋଜନେ ତଥା ପିଏସ୍ଆଇ ଅଜୟ କାଶୀନାଥ ପାଟିଲଙ୍କ ସହ ଏକ ଭର୍ଚୁଆଲ ମିଟିଂ କରିଥିଲେ । ଏହି ସମୟରେ ସେ ସାଇବର ଅପରାଧ ବିଷୟରେ ଏମାନଙ୍କଠାରୁ କିଛି ଜାଣିବାକୁ ଚାହିଁଥିଲେ । ଏହାସହ ସାଇବର ଅପରାଧକୁ ନେଇ ସେ କେତେଜଣ ବିଶେଷଜ୍ଞଙ୍କ ସହ ମଧ୍ୟ ଆଲୋଚନା କରିଥିଲେ । ତାଙ୍କର ମୂଳ ଉଦ୍ଦେଶ୍ୟ ଥିଲା ସୋସିଆଲ ମିଡିଆରେ କିପରି ନିଜର ସ୍ପେସ ଷ୍ଟ୍ରଙ୍ଗ କରିହେବ । ଏହାସହ ସାଇବର ଅପରାଧରୁ ନିଜକୁ କିପରି ବଞ୍ଚାଇ ହେବ । ଏହାପରେ ସେ ବିଭିନ୍ନ ସୋସିଆଲ ମିଡିଆରେ ୟୁଜର୍ସଙ୍କୁ ଏ ଦିଗରେ ସାହାଯ୍ୟ କରିବା ଆରମ୍ଭ କରିଛନ୍ତି । ତେବେ ସାଇବର ସ୍ପେସକୁ ସ୍ୱଚ୍ଛ ଓ ସୁରକ୍ଷିତ ରଖିବାକୁ ଅନନ୍ୟା ଯେଉଁ କାମ କରୁଛନ୍ତି ତାହା ପ୍ରକୃତରେ ପ୍ରଶଂସାଯୋଗ୍ୟ । ପୂର୍ବରୁ ମଧ୍ୟ ଏହାକୁ ନେଇ ଅଭିନେତ୍ରୀ ସ୍ୱର ଉଠାଇ ସାରିଛନ୍ତି । ଏବେ ମୁମ୍ବାଇ ପୋଲିସ ସହ ମିଶି ଅନନ୍ୟା ଯେଉଁ କାମ କରୁଛନ୍ତି ତାହା ମୁମ୍ବାଇ ପୋଲିସକୁ ଖୁବ୍ ପସନ୍ଦ ଆସିଛି ।
