ନୂଆଦିଲ୍ଲୀ, ୧୪।୯: ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ତ୍ରୟୋଦଶ ସଂସ୍କରଣ ଆରମ୍ଭ ହେବାକୁ ଆଉ ଗୋଟିଏ ସପ୍ତାହରୁ କମ୍ ସମୟ ବାକି ରହିଛି। ଏହି ହାଇଭୋଲଟେଜ୍ ଟୁର୍ନାମେଣ୍ଟ ଆସନ୍ତା ୧୯ରୁ ଏହା ୟୁଏଇରେ ଆରମ୍ଭ ହେବ। ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ଓ ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱାଧୀନ ଚେନ୍ନାଇ ସୁପର୍ କିଙ୍ଗ୍ସ (ସିଏସ୍କେ) ମଧ୍ୟରେ ଉଦ୍ଘାଟନୀ ମ୍ୟାଚ୍ ଖେଳାଯିବ।
ରେକର୍ଡ ଉପରେ ଦୃଷ୍ଟି ପକାଯିବ ତେବେ ଆଇପିଏଲ୍ ଇତିହାସରେ ସବୁଠାରୁ ଅଧିକ ମ୍ୟାଚ୍ ଖେଳିବାର ସୌଭାଗ୍ୟ ମୁମ୍ବାଇ ଦଳ ନାମରେ ରହିଛି। ୨୦୦୮ରୁ ୨୦୧୯ ମଧ୍ୟରେ ମୁମ୍ବାଇ ମୋଟ୍ ଉପରେ ୧୮୭ ଆଇପିଏଲ୍ ମ୍ୟାଚ୍ ଖେଳିଛି। ମୁମ୍ବାଇ ପଛକୁ ବିରାଟ କୋହଲିଙ୍କ ନେତୃତ୍ୱାଧୀନ ରୟାଲ୍ ଚ୍ୟାଲେଞ୍ଜର ବାଙ୍ଗାଲୋର (୧୮୧), କୋଲକାତା ନାଇଟ୍ ରାଇଡର୍ସ (୧୭୮), ଦିଲ୍ଲୀ କ୍ୟାପିଟାଲ୍ସ (୧୭୭), କିଙ୍ଗ୍ସ ଇଲେଭେନ ପଞ୍ଜାବ (୧୭୬), ଚେନ୍ନାଇ ସୁପର୍ କିଙ୍ଗ୍ସ (୧୬୫), ରାଜସ୍ଥାନ ରୟାଲ୍ସ (୧୪୭) ଓ ସନ୍ରାଇଜର୍ସ ହାଇଦ୍ରାବାଦ (୧୦୮) ଯଥାକ୍ରମେ ୨ରୁ ୮ମ ସ୍ଥାନ ମଧ୍ୟରେ ରହିଛନ୍ତି। ମୋଟ୍ ଉପରେ ୮ଟି ଦଳ ୧୦୦ରୁ ଊର୍ଦ୍ଧ୍ୱ ମ୍ୟାଚ୍ ଖେଳିଛନ୍ତି। ଏଥିମଧ୍ୟରୁ କେବଳ ୨ଟି ଦଳ ୧୦୦ରୁ ଊର୍ଦ୍ଧ୍ୱ ମ୍ୟାଚ୍ ଜିତିପାରିଛି। ଏହି ୨ଟି ଟିମ୍ ହେଲା ମୁମ୍ବାଇ (୧୦୭) ଓ ଚେନ୍ନାଇ (୧୦୦)। ସେହିଭଳି ୭ଟି ଟିମ୍ ୫୦ କିମ୍ବା ଏହାଠାରୁ ଅଧିକ ମ୍ୟାଚ୍ ହାରିଛି। ଆଇପିଏଲ୍ରେ ସବୁଠାରୁ ଅଧିକ ମ୍ୟାଚ୍ ହାରିବାର ଅଲୋଡ଼ା କୀର୍ତ୍ତିମାନ ଦିଲ୍ଲୀ କ୍ୟାପିଟାଲ୍ସ (୯୭ ମ୍ୟାଚ୍) ନାମରେ ରହିଛି। ଦିଲ୍ଲୀ ସମେତ ମୋଟ୍ ୩ଟି ଟିମ୍ ୯୦ରୁ ଊର୍ଦ୍ଧ୍ୱ ମ୍ୟାଚ୍ରେ ପରାଜୟର ସାମ୍ନା କରିଛନ୍ତି। ଅନ୍ୟ ୨ଟି ଟିମ୍ ହେଲା କିଙ୍ଗ୍ସ ଇଲେଭେନ ପଞ୍ଜାବ (୯୪) ଓ ବାଙ୍ଗାଲୋର (୯୨)।
