ନୂଆଦିଲ୍ଲୀ,୨।୫: ଅରୁଣ ଜେଟଲୀ ଷ୍ଟାଡିୟମରେ ଶନିବାର ଖେଳାଯାଥିବା ମ୍ୟାଚ୍ରେ ରୋମାଞ୍ଚକର ବିଜୟ ହାସଲ କରିଥିଲା ମୁମ୍ବାଇ ଇଣ୍ଡିଆନ୍ସ। ଏକୁଟିଆ କିରୋନ ପୋଲାର୍ଡ ବିରୋଧୀ ଚେନ୍ନାଇ ସୁପରକିଙ୍ଗ୍ସ ଦଳ ବୋଲର୍ଙ୍କୁ ଘାଇଲା କରିଦେଇଥିଲେ। ଆଇପିଏଲ୍ ଇତିହାସରେ ମୁମ୍ବାଇ ପ୍ରଥମ ଥର ସଫଳତାର ସହ ୨୦୦ରୁ ଅଧିକ ରନ୍ ଲକ୍ଷ୍ୟର ପିଛା କରିଥିଲା। ପୋଲାର୍ଡ ୩୪ ବଲ୍ରେ ୬ ଚଉକା ଏବଂ ୮ ଛକା ସହାୟତାରେ ଅପରାଜିତ ୮୭ରନ୍ କରିଥିଲେ। ଫଳରେ ହାରୁଥିବା ମ୍ୟାଚ୍ ମୁମ୍ବାଇ ସହଜରେ ଜିତି ଯାଇଥିଲା। ଏହି ମ୍ୟାଚ୍ରେ ପରାଜୟ ପରେ ସିଏସ୍କେ ଅଧିନାୟକ ମହେନ୍ଦ୍ର ସିଂହ ଧୋନୀ ଦଳର ସବୁଠାରୁ ବଡ଼ ଭୁଲ ବିଷୟରେ ଖୁଲାସା କରିଛନ୍ତି। ଆବଶ୍ୟକ ସମୟରେ କ୍ୟାଚ୍ ଛାଡ଼ିବା ଏବଂ ଖରାପ ବୋଲିଂ ହିଁ ବଡ଼ ଭୁଲ। ଏହା ମୁମ୍ବାଇ ମ୍ୟାଚ୍ ଜିତିବାର ପ୍ରମୁଖ କାରଣ ବୋଲି ସେ କହିଛନ୍ତି।
ମଇଦାନ ବହୁତ ଭଲ ଥିଲା। ଭଲ ଖେଳାଯାଇପାରିଥାନ୍ତା। ବୋଲରମାନଙ୍କ ଉପରେ କଡ଼ା ସ୍ବଭାବ କରିବା ଠିକ୍ ନୁହେଁ। ଗୁରୁତ୍ୱପୂର୍ଣ୍ଣ ସମୟରେ ଦଳ ଅନେକ କ୍ୟାଚ୍ ଛାଡ଼ିଲା। ବୋଲିଂ ଆହୁରି ଭଲ ହୋଇପାରିଥାନ୍ତା। ହେଲେ ଏହି ପରାଜୟରୁ ତାଙ୍କୁ କିଛି ଶିଖିବାର ସୁଯୋଗ ମିଳିବ ବୋଲି ମାହି କହିଛନ୍ତି।
ଏହାଛଡ଼ା ହାରିବାକୁ ନେଇ ଖରାପ ଲାଗିଲା କି ପ୍ରଶ୍ନରେ ଧୋନୀ କହିଛନ୍ତି, ପରାଜୟ ଦୁଃଖ ଦେଇଛି ନିଶ୍ଚୟ, ହେଲେ ଦଳର ମନୋବଳ ଦୃଢ଼ ରହିଛି। ଯେତେବେଳେ କେହି ହାରେ ସେ ବେଶି ଶିଖେ। ଆମେ ଅଙ୍କ ତାଲିକାରେ କେଉଁଠି ଅଛୁ ସେ କଥା ନ ଭାବି ମ୍ୟାଚ୍ ବିଷୟରେ ଭାବି ଥାଉ। କାରଣ ଯଦି ତୁମେ ଭଲ ଖେଳ, ଅଙ୍କ ତାଲିକା ଆପେଆପେ ବଦଳିଯିବ ବୋଲି ସେ କହିଛନ୍ତି।
