ନୂଆଦିଲ୍ଲୀ,୧୭।୭: ଫିଫା ବିଶ୍ୱକପ ୨୦୨୬ର ଆଭିମୁଖ୍ୟ ସ୍ପଷ୍ଟ ହୋଇସାରିଛି। ଚଳିତ ସଂସ୍କରଣର ମେଗା ଫାଇନାଲ ମ୍ୟାଚରେ ଦୁଇ ଶକ୍ତିଶାଳୀ ଦଳ ସ୍ପେନ ଏବଂ ଆର୍ଜେଣ୍ଟିନା ମୁହାଁମୁହିଁ ହେବାକୁ ଯାଉଛନ୍ତି। ୧୯୬୬ ଠାରୁ ପ୍ରଥମ ଥର ପାଇଁ ଏହି ଦୁଇ ଦେଶ ବିଶ୍ୱକପ ମଞ୍ଚରେ ପରସ୍ପରକୁ ଭେଟିବେ, ଆଉ ସେ ପୁଣି ଟ୍ରଫି ପାଇଁ। ଗୋଟିଏ ପଟେ ଲିଓନେଲ ମେସି ଥିବାବେଳେ ଅନ୍ୟପଟେ ଲାମିନ ୟାମାଲ ଏବଂ ସ୍ପେନର ସେହି ଶକ୍ତିଶାଳୀ ଡିଫେନ୍ସ ଅଛି, ଯାହା ବିପକ୍ଷରେ ଚଳିତ ବିଶ୍ୱକପରେ ମାତ୍ର ଗୋଟିଏ ଗୋଲ ହୋଇଛି।
ଏହି ମହାମୁକାବିଲା ପୂର୍ବରୁ ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ଏମଏସ ଧୋନୀଙ୍କର ଏକ ୧୦ ବର୍ଷ ତଳର ପୋଷ୍ଟ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଧୋନୀଙ୍କ ପ୍ରଶଂସକମାନେ ଦାବି କରୁଛନ୍ତି ଯେ ତାଙ୍କର ପୁରୁଣା ଭବିଷ୍ୟବାଣୀ ଏବେ ସତ ପ୍ରମାଣିତ ହୋଇଛି।
ପ୍ରକାଶ ଥାଉ କି, ସେମିଫାଇନାଲରେ ସ୍ପେନ ଫ୍ରାନ୍ସକୁ ୨-୦ ଗୋଲରେ ହରାଇ ଫାଇନାଲରେ ପ୍ରବେଶ କରିଥିବାବେଳେ ଆର୍ଜେଣ୍ଟିନା ଇଂଲଣ୍ଡକୁ ପରାସ୍ତ କରି ଶୀର୍ଷ ଲଢ଼େଇ ପାଇଁ ଟିକେଟ ପାଇଛି। ଭାରତୀୟ ସମୟ ଅନୁସାରେ ଏହି ହାଇଭୋଲ୍ଟେଜ ଫାଇନାଲ ମ୍ୟାଚ ଜୁଲାଇ ୨୦ (ସୋମବାର) ରାତି ୧୨:୩୦ (ଅର୍ଥାତ୍ ରବିବାର ବିଳମ୍ବିତ ରାତି) ରେ ଖେଳାଯିବ।
ଫିଫା ବିଶ୍ୱକପ ଫାଇନାଲ ଲାଇନ-ଅପ ସ୍ଥିର ହେବା ମାତ୍ରେ ଧୋନୀଙ୍କର ୨୦୧୬ର ଏକ ଇନଷ୍ଟାଗ୍ରାମ ପୋଷ୍ଟ ଭାଇରାଲ ହେବାରେ ଲାଗିଛି। ସେତେବେଳେ ଭାରତୀୟ ଦଳ ଜିମ୍ବାୱେ ଗସ୍ତରେ ଥିଲା ଏବଂ ଧୋନୀ ଦଳର ଅଧିନାୟକ ଥିଲେ। ପୋଷ୍ଟ କରାଯାଇଥିବା ଫଟୋରେ ଧୋନୀଙ୍କ ସହ ଅକ୍ଷର ପଟେଲ, କରୁଣ ନାୟାର ଓ ଜୟଦେବ ଉନାଦକତ ବସିଥିବା ଦେଖାଯାଇଛି।
ଫଟୋରୁ ସ୍ପଷ୍ଟ ଜଣାପଡ଼ୁଛି ଯେ ସେମାନେ ମୋବାଇଲ କିମ୍ବା ଗେମିଂ କନସୋଲରେ‘ଫିଫା ଗେମ’ ଖେଳୁଥିଲେ। ଏହି ଫଟୋର କ୍ୟାପସନରେ ଧୋନୀ ଲେଖିଥିଲେ, ‘ସ୍ପେନ ବନାମ ଆର୍ଜେଣ୍ଟିନା’। ଧୋନୀଙ୍କ ପ୍ରଶଂସକଙ୍କ କହିବା କଥା ହେଉଛି, ମାହି ୧୦ ବର୍ଷ ପୂର୍ବରୁ ହିଁ ଜାଣିସାରିଥିଲେ ଯେ ଦିନେ ଏହି ଦୁଇ ଦଳ ବିଶ୍ୱକପ ଭଳି ଏକ ବଡ଼ ମଞ୍ଚର ଫାଇନାଲରେ ମୁହାଁମୁହିଁ ହେବେ।
