ବରଗଡ଼,୧୪।୨(ପ୍ରେମାନନ୍ଦ ଖମାରୀ): ବରଗଡ଼ ଲୋକ ସଭା ଏମପି ପ୍ରଦୀପ ପୁରୋହିତ ଶୁକ୍ରବାର ରେଳମନ୍ତ୍ରୀ Ashwini Vaishnaw ଙ୍କୁ ଭେଟିଛନ୍ତି। ରେଳମନ୍ତ୍ରୀଙ୍କଠାରେ ସେ ବିଭିନ୍ନ ଦାବି ରଖିବା ସହିତ ତାଙ୍କୁ ଏକ ଦାବିପତ୍ର ସେ ପ୍ରଦାନ କରିଛନ୍ତି। ବରଗଡ଼ରୁ ଭୁବନେଶ୍ୱରକୁ ଇଣ୍ଟରସିଟି ଟ୍ରେନ ଚଳାଚଳ ଅଞ୍ଚଳବାସୀଙ୍କ ଦୀର୍ଘଦିନର ଦାବି ରହିଛି। ଫଳରେ ବରଗଡ଼ରୁ ଭୁବନେଶ୍ୱରକୁ ପ୍ରତିଦିନ ସକାଳୁ ଇଣ୍ଟରସିଟି ଟ୍ରେନ ଚଳାଚଳ ପାଇଁ ପ୍ରଦୀପ ଦାବି କରିଛନ୍ତି। ସେହିପରି ବରଗଡ଼ ରୋଡ୍ ଏବଂ ବଲାଙ୍ଗିର ଷ୍ଟେଶନ ପୂର୍ବତଟ ରେଲବାଇର ସମ୍ବଲପୁର ଡିଭିଜନ ଅଧିନରେ ରହିଛି। ବରଗଡ଼ ରୋଡ୍/ବଲାଙ୍ଗିରରୁ ଭୁବନେଶ୍ୱର ପର୍ଯ୍ୟନ୍ତ ଏକ ନୂଆ ଟ୍ରେନ ଚଳାଚଳ କରାଯାଉ କିମ୍ବା 1803/304 ପୁରୀ-ସମ୍ବଲପୁର-ପୁରୀ ଇଣ୍ଟରସିଟିକୁ ବରଗଡ଼/ବଲାଙ୍ଗିର ପର୍ଯ୍ୟନ୍ତ 2-ରେକ୍ ଟ୍ରେନଭାବେ ପରିବର୍ତ୍ତନ କରାଯାଉ ବୋଲି ପ୍ରଦୀପ ଦାବି କରିଛନ୍ତି।
ପଶ୍ଚିମ ଓଡ଼ିଶାବାସୀଙ୍କ ଭାବାବେଗକୁ ବିଚାର କରି ଏବଂ ଏହି ଅଞ୍ଚଳର ପୁରୁଣା ଦାବି ସମୂହକୁ ପୂରଣ ପାଇଁ ଆବଶ୍ୟକ ପଦକ୍ଷେପ ନେବାକୁ ସେ ରେଳମନ୍ତ୍ରୀଙ୍କଠାରେ ଦାବି ରଖିଛନ୍ତି। ଏହା ସହିତ ବରଗଡ଼-ନୂଆପଡ଼ା ରେଳପଥ ନିର୍ମାଣ କାର୍ଯ୍ୟରେ ତ୍ୱରିତ୍ ପଦକ୍ଷେପ ନେବା ସହିତ ପାଇକମାଳ ରେଳ ଷ୍ଟେଶନର ନାମ ପରିବର୍ତ୍ତନ କରି ନୃସିଂହନାଥ ରେଳ ଷ୍ଟେଶନ କରିବାକୁ ପ୍ରଦୀପ ପ୍ରସ୍ତାବ ଦେଇଛନ୍ତି। ସେହିପରି ଜନଶତାବ୍ଦୀ ଏକ୍ସପ୍ରେସକୁ ଝାରସୁଗୁଡ଼ା ପର୍ଯ୍ୟନ୍ତ ସମ୍ପ୍ରସାରଣ ସହିତ ହାତିଆ଼-ଝାରସୁଗୁଡ଼ା ପାସେଞ୍ଜର ଟ୍ରେନକୁ ରାୟଗଡ଼ ଏବଂ କୋଭିଡ୍ ସମୟରେ ବନ୍ଦ ହୋଇଥିବା ନିଜାମୁଦ୍ଦିନ-ରାୟଗଡ଼ ଗୋଣ୍ଡୱାନା ଏକ୍ସପ୍ରେସ ଟ୍ରେନକୁ ପୁନଃ ଚଳାଚଳ କରିବା ପାଇଁ ରେଳମନ୍ତ୍ରୀଙ୍କଠାରେ ପ୍ରଦୀପ ଦାବି ରଖିଛନ୍ତି। ରେଳମନ୍ତ୍ରୀଙ୍କଠାରେ ପ୍ରଦୀପ ଏହି ଦାବି ରଖିବା ସମୟରେ କେନ୍ଦ୍ରମନ୍ତ୍ରୀ ରବନିତ୍ ସିଂ ବିଟ୍ଟୁ ମଧ୍ୟ ସେଠରେ ଉପସ୍ଥିତ ଥିଲେ।
