ଖଲ୍ଲିକୋଟ, ୯।୬(ପ୍ରଶାନ୍ତ କୁମାର ମିଶ୍ର) : ଖଲ୍ଲିକୋଟ ବ୍ଲକରେ ରବିବାର ଦୁଇଟି ଫଳକ ଯୋଗୁ ସାଂସଦଙ୍କ କର୍ମୀ ଓ ବିଧାୟକଙ୍କ କର୍ମୀଙ୍କ ମଧ୍ୟରେ ଉତ୍ତେଜନା ଦେଖାଦେଇଥିଲା । ତେବେ ରବିବାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଦ୍ୱିତୀୟ ପର୍ଯ୍ୟାୟରେ ୨୦୪ ଟି ଗୋଦାବରୀଶ ମିଶ୍ର ଆଦର୍ଶ ବିଦ୍ୟାଳୟର ଭିତ୍ତି ପ୍ରସ୍ତର ସ୍ଥାପନ କରିଥିବାବେଳେ ଖଲ୍ଲିକୋଟ ବ୍ଲକ କୋମଣ୍ଡ ପଞ୍ଚାୟତର ବଡ ରାମପଲ୍ଲୀର ପ୍ରାଥମିକ ବିଦ୍ୟାଳୟ ଏଥିରେ ସାମିଲ ହୋଇଥିଲା । ଏହାର ଭିତ୍ତି ପ୍ରସ୍ତର ସ୍ଥାପନ କରିବା ପାଇଁ ଆସିକା ସାଂସଦ ଅନିତା ଶୁଭ ଦର୍ଶିନୀ ଓ ଖଲ୍ଲିକୋଟ ବିଧାୟକ ପୂର୍ଣ୍ଣ ଚନ୍ଦ୍ର ସେଠୀ ପହଞ୍ଚିଥିଲେ । କିନ୍ତୁ ସେଠୀ ଭିତ୍ତିପ୍ରସ୍ତର ସ୍ଥାପନ ପାଇଁ ଲାଗିଥିବା ଫଳକରେ ବିଧାୟକଙ୍କ ନାମ ପ୍ରଥମେ ରହିଥିଲା ଓ ସାଂସଦଙ୍କ ନାମ ଦ୍ୱିତୀୟରେ ଥିଲା । ଯାହାକୁ ନେଇ ସାଂସଦଙ୍କ କର୍ମୀ ଉତ୍ତେଜନା ସୃଷ୍ଟି କରିଥିଲେ । ପ୍ରଥମେ ସାଂସଦଙ୍କ ନାମ ଥିବା ଆଉ ଗୋଟିଏ ଫଳକ ଲଗାଇବା ପାଇଁ ଦାବି କରିଥିଲେ । ତେବେ ପ୍ରଥମେ ସାଂସଦ ନାମ ଫଳକକୁ ଆଗରୁ ଲଗାଯାଇଥିଲା । କିନ୍ତୁ ସକାଳେ ପୋଲିସ ଉପସ୍ଥିତିରେ ପ୍ରଥମେ ସାଂସଦଙ୍କ ନାମ ଥିବା ଫଳକକୁ ବାହାର କରି ପ୍ରଥମେ ବିଧାୟକଙ୍କ ନାମ ଥିବା ଫଳକକୁ ପୋଲିସ ଉପସ୍ଥିତିରେ ଲଗାଯାଇଥିଲା । ତେବେ ପୁଣି ପ୍ରଥମେ ସାଂସଦଙ୍କ ନାମ ଥିବା ଫଳକଟିକୁ ଲଗାଇବା ପାଇଁ ଅଡି ବସିଥିଲେ ସାଂସଦଙ୍କ କର୍ମୀ । ଯାହା ଫଳରେ ବିଦ୍ୟାଳୟ ପରିସରରେ ଦୁଇ ଗୋଷ୍ଠୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା । ଉତ୍ତେଜନା ଫଳରେ ପୋଲିସ ଦୁଇ ଗୋଷ୍ଠୀଙ୍କୁ ବୁଝାଇବାକୁ ଚେଷ୍ଟା କରିଥିଲା । କିନ୍ତୁ ସମସ୍ୟାର ସମାଧାନ ହୋଇ ପାରିନଥିଲା । କିନ୍ତୁ ତରବରିଆ ଭାବେ ସଭାକାର୍ଯ୍ୟ ସମାପ୍ତ କରି ଭିତ୍ତି ପ୍ରସ୍ତର ସ୍ଥାପନ ନ କରି ସେଠାରୁ ଚାଲି ଯାଇଥିଲେ । କିନ୍ତୁ ସାଂସଦଙ୍କ କର୍ମୀ ସାଂସଦଙ୍କ ନାମ ଥିବା ଫଳକକୁ ଆଣି ଭିତ୍ତି ପ୍ରସ୍ତର ସ୍ଥାପନ ଜାଗାରେ ରଖିଥିଲେ । ଏହା ଦେଖି ବିଧାୟକ ମଧ୍ୟ ଭିତ୍ତି ପ୍ରସ୍ତର ସ୍ଥାପନ ନକରି ବିଡିଓ ଦେବାଶିଷ ସାମଲ ଓ ଅତିରିକ୍ତ ତହସିଲଦାର ଅଜୟ ସ୍ବାଇଁ ଭିତ୍ତି ପ୍ରସ୍ତର ସ୍ଥାପନ କରିଥିଲେ । ଏହି ଘଟଣା ଖଲ୍ଲିକୋଟରେ ଭାଜପାର ଗୋଷ୍ଠୀ କନ୍ଦଳକୁ ପଦାରେ ପକାଇଛି । ସେପଟେ ଦୁଇ ଦୁଇଟି ଫଳକ କିଏ ଆଣିଲା ଓ କାହିଁକି ଦୁଇଟି ଫଳକ କରାଯାଇଥିଲା ତାକୁ ବିରାଟ ପ୍ରଶ୍ନବାଚୀ ସୃଷ୍ଟି ହୋଇଛି।
Odisha’s No.1 Odia Daily
