ତେନ୍ତୁଳିଖୁଣ୍ଟି, ୨।୯(ଡି.ଏନ୍.ଏ.):ଜୀବନର ଶେଷ ବେଳେ ସାହାରା ହେବ। ତାରି କାନ୍ଧରେ ବୁହା ହୋଇ ମଶାଣୀକୁ ଯିବି। ସମସ୍ତଙ୍କ ଭଳି ପୁଅକୁ ନେଇ ଏଭଳି ସ୍ବପ୍ନ ଦେଖିଥିଲେ ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ଗଦବାଗୁଡା ଗ୍ରାମର ସୁଲୋଚନା ଖୁରା। କିନ୍ତୁ ତାଙ୍କ ସ୍ବପ୍ନ ଏବେ ମଉଳି ଯାଇଛି। ପୁଅ ନୟନ ଖୁରାଙ୍କ ଗୋଡ଼ ଏବେ ଫୁଲି ଧୀରେ ଧୀରେ ବଙ୍କା ହୋଇ ଗଲାଣି। ନୟନଙ୍କୁ ଏବେ ଚାଲିବାରେ ମଧ୍ୟ ଅସୁବିଧା ହେଉଛି। ସୁଲୋଚନା ତାଙ୍କର ବାର୍ଦ୍ଧକ୍ୟ ଭତ୍ତା କାର୍ଡକୁ ୬ହଜାର ଟଙ୍କାରେ ବନ୍ଧକ ରଖି ଉକ୍ତ ଟଙ୍କାରେ ପୁଅର ଚିକତ୍ସା କରାଇଲେ। କିନ୍ତୁ ଚିକିତ୍ସା ପାଇଁ ଆହୁରୀ ଟଙ୍କା ଜରୁରୀ। ଅର୍ଥାଭାବରୁ ସୁଲୋଚନା ପୁଅର ଚିକିତ୍ସା କରାଇ ପାରୁ ନାହାନ୍ତି।
୩ ବର୍ଷ ପୂର୍ବେ କାମ କରିବା ବେଳେ କୋଦାଳ ବାଜି ନୟନଙ୍କ ଡାହାଣ ଗୋଡ଼ ଖଣ୍ଡିଆ ଖାବରା ହୋଇଗଲା। ସେ ଏହାର ଚିକତ୍ସା କରିଥିଲେ। କିଛି ଦିନ ପରେ ସେ ସୁସ୍ଥ ହୋଇ ସ୍ବାଭାବିକ ଜୀବନ ଯାପନ କଲେ। କିନ୍ତୁ ଧୀରେ ଧୀରେ ନୟନଙ୍କ ଡାହାଣ ଗୋଡ଼ ଫୁଲିବାରେ ଲାଗିଲା। ତାଙ୍କ ଚାଲିବାରେ ଅସୁବିଧା ଦେଖାଦେଲା। ସେ ଡାକ୍ତରଙ୍କୁ ପରାମର୍ଶ କରିଥିଲେ। ସୁଲୋଚନା ନିଜ ବାର୍ଦ୍ଧକ୍ୟ ଭତ୍ତା କାର୍ଡକୁ ଗାଁର ଜଣଙ୍କ ପାଖରେ ବନ୍ଧକ ରଖି ୬ହଜାର ଟଙ୍କା ଆଣି ନୟନଙ୍କୁ ଡାକ୍ତରଙ୍କ ପାଖକୁ ନେଇଥିଲେ। ଡାକ୍ତର ତାଙ୍କୁ କୋରାପୁଟରେ ଚିକିତ୍ସା ପାଇଁ ପଠାଇ ଥିଲେ। କିନ୍ତୁ ଟଙ୍କା ଅଭାବରୁ ସେଠାରେ ଚିକତ୍ସା କରି ପାରିଲେ ନାହିଁ। ଏବେ ସୁଲୋଚନା ମଜୁରିଆ କାମ କରି ଘର ଚଳାଉଛନ୍ତି। ଏହା ମଧ୍ୟରେ ପୁଅର ଚିକତ୍ସା କରିବା ଏବେ ତାଙ୍କ ପାଇଁ କଷ୍ଟକର। ସରକାର ନୟନଙ୍କ ଚିକିତ୍ସା ପାଇଁ ବ୍ୟବସ୍ଥା କରିବାକୁ ସୁଲୋଚନା ଓ ଗ୍ରାମବାସୀ କହିଛନ୍ତି। ନୟନଙ୍କ ଚିକିତ୍ସା ପାଇଁ ମା ସୁଲୋଚନା ଭତ୍ତା କାର୍ଡ ବନ୍ଧକ ରଖିବା ପ୍ରସଙ୍ଗରେ ବିଡିଓ ଦୁର୍ଯ୍ୟୋଧନ ଭୋଇଙ୍କୁ ପଚାରିବାରୁ ଏହି ଘଟଣା ତାଙ୍କ ନଜରକୁ ଆସିନି। ତଦନ୍ତ କରି ଉପଯୁକ୍ତ ପଦକ୍ଷେପ ନେବି ବୋଲି ସେ କହିଛନ୍ତି।
