ଭୋଗରାଇ, ୧୯।୩(ଡ଼ି.ଏନ.ଏ.): ଆଗରୁ ଝିଅଟିଏ ଥିଲା। ପୁଣି ଗୋଟିଏ ଝିଅ ହେବାରୁ ମା’ ମନରେ ସୃଷ୍ଟି ହୋଇଥିଲା ବିତୃଷ୍ଣା। ପରିବାର ଲୋକେ ତାଙ୍କୁ ସାନ୍ତ୍ୱନା ଦେବା ପରିବର୍ତ୍ତେ ଭାରାକ୍ରାନ୍ତ କରିବାରୁ ସେ ଅତିଷ୍ଠ ହୋଇପଡ଼ିଥିଲେ। ଶେଷରେ ସେ ସାନଝିଅକୁ ଜୀବନରୁ ହଟାଇବାକୁ ମନେ ମନେ ସ୍ଥିର କରିଥିଲେ। ଦିନେ ଘରେ କେହି ନ ଥିବା ବେଳେ ମା’ ନିଜ ୬ ଦିନର ଝିଅର ତଣ୍ଟିଚିପି ହତ୍ୟା କରି ପୋଖରୀରେ ଫିଙ୍ଗି ଦେଇଥିଲେ। ଝିଅକୁ କୁକୁର ଝୁଣି ଖାଇଗଲା ବୋଲି ବାହାନା କରିଥିଲେ। ପୋଖରୀରେ ମୃତଦେହ ଭାସୁଥିବା ଦେଖି ପଡ଼ୋଶୀମାନେ ଉଦ୍ଧାର କରିବା ସହ ଡାକ୍ତରଖାନାରେ ଭର୍ତ୍ତି କରିଥିଲେ। ବ୍ୟବଚ୍ଛେଦ ରିପୋର୍ଟ ଆସିବା ପରେ ପୋଲିସର ସନ୍ଦେହ ହେବାରୁ ଘଟଣା ପଦାକୁ ଆସିଛି। ବାଲେଶ୍ୱର ଜିଲା ଭୋଗରାଇ ବ୍ଲକ କମର୍ଦା ଥାନା ଅଧୀନ ସିଅଁାରୋଇ ଗ୍ରାମରେ ଏହି ଘଟଣା ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳରେ ଆଲୋଡନ ସୃଷ୍ଟି କରିଛି।
ସିଅଁାରୋଇ ଗ୍ରାମର ବଳରାମ ପାତ୍ର ଓ ସ୍ତ୍ରୀ ବନ୍ଦନାଙ୍କ ପୂର୍ବରୁ ୩ ବର୍ଷର କନ୍ୟା ସନ୍ତାନ ଥିଲେ। ପୁଅ ଆଶାରେ ବନ୍ଦନା ପୁଣି ଗର୍ଭବତୀ ହୋଇଥିଲେ। ପୁନର୍ବାର ତାଙ୍କର ଏକ ଶିଶୁକନ୍ୟା ହେବାରୁ ସେ ମାନସିକ ଭାରସାମ୍ୟ ହରାଇଥିଲେ। ଦୁଇ ଝିଅଙ୍କୁ ଲାଳନ ପାଳନ କରି ବଡ଼ କରିବା ପାଇଁ ତାଙ୍କପକ୍ଷେ କଷ୍ଟକର ଥିବା ବେଳେ ପରିବାର ଲୋକେ ଅସନ୍ତୋଷ ପ୍ରକାଶ କରିଥିଲେ। ଗତ ୬ ତାରିଖ ରାତିରେ ପରିବାର ଲୋକେ ଭୋଜି ଖାଇବା ପାଇଁ ପଡ଼ୋଶୀ ଘରକୁ ଯାଇଥିବା ବେଳେ ଏହି ସୁଯୋଗରେ ମା’ ୬ ଦିନର ଶିଶୁକନ୍ୟାକୁ ଘରେ ତଣ୍ଟି ଚିପି ହତ୍ୟା କରିବା ପରେ ପୋଖରୀରେ ଫିଙ୍ଗି ଦେଇଥିଲେ। ବ୍ୟବଚ୍ଛେଦ ରିପୋର୍ଟରୁ ହତ୍ୟା ସୂଚନା ମିଳିବା ପରେ ପୋଲିସ ନିଜ ଆଡୁ ମାମଲା ରୁଜୁ କରିଥିଲା। ତଦନ୍ତ ପରେ ଶିଶୁକନ୍ୟା ମୃତ୍ୟୁ ଘଟଣାର ରହସ୍ୟ ଉନ୍ମୋଚନ ହେବା ସହ ପୋଲିସ ମା’ଙ୍କୁ ଗିରଫ କରି କୋର୍ଟଚାଲାଣ କରିଛି। ଏ ସଂକ୍ରାନ୍ତରେ କମର୍ଦ୍ଦା ଥାନାରେ ଏକ ମାମଲା(ନଂ.୩୦/୨୩) ରୁଜୁ ହୋଇଛି। କୋର୍ଟରେ ତାଙ୍କର ଜାମିନ ନାମଞ୍ଜୁର ହେବାରୁ ଜେଲ ହାଜତକୁ ପଠାଇ ଦିଆଯାଇଛି।
