ବାହାନଗା/ସୋର, ୯।୧୨(ଡି.ଏନ.ଏ.) ବାଲେଶ୍ୱର ଜିଲା ବାହାନଗା ବ୍ଲକ ସୋର ଥାନା ଅଧୀନ ତଳନଗର ପଞ୍ଚାୟତ ବାଇନଣ୍ଡା ଓ ଅଞ୍ଜି ପଞ୍ଚାୟତ ଜୟୀନଗର ଗ୍ରାମରେ ଚୋରା କରତକଳ ଉପରେ ବନବିଭାଗ ପକ୍ଷରୁ ଚଢାଉ କରାଯାଇ ଲକ୍ଷାଧିକ ଟଙ୍କାର କାଠକଟା ମେଶିନ ଗ୍ୟାସ କଟର ଦ୍ୱାରା କଟାଯାଇ ଜବତ କରାଯାଇଛି। ଏହାଛଡା ସ-ମିଲ୍ରେ ପଡିଥିବା ନିମ୍ବ, ଆମ୍ବ, ଝାଉଁ ଆଦି ଦାମୀ କାଠଗଡ ଓ ପଟାକୁ ବନବିଭାଗ ପକ୍ଷରୁ ଜବତ କରାଯାଇଛି। ଜବତ କାଠର ଆନୁମାନିକ ମୂଲ୍ୟ ଲକ୍ଷାଧିକ ଟଙ୍କା ହେବ ବୋଲି ବନ ଅଧିକାରୀ ସୂଚନା ଦେଇଛନ୍ତି। ଚଢାଉ ବେଳେ ମିଲ୍ରେ ଥିବା କର୍ମଚାରୀମାନେ ଫେରାର ହୋଇଯାଇଥିଲେ। ଜିଲା ବନବିଭାଗ ଅଧିକାରୀ(ଡିଏଫ୍ଓ)ଙ୍କ ନିର୍ଦ୍ଦେଶକ୍ରମେ ସହାୟକ ବନସଂରକ୍ଷକ (ଏସିଏଫ୍) ସୁଶାନ୍ତ କୁମାର ଜେନାଙ୍କ ତତ୍ତ୍ୱାବଧାନରେ ସୋର ବନବିଭାଗ ଓ ନୀଳଗିରି ବନବିଭାଗ ସମେତ ଚାନ୍ଦିପୁର ଉପଖଣ୍ଡ ବନବିଭାଗ ପକ୍ଷରୁ ଚଢାଉ କରାଯାଇଥିଲା। ଚୋରା କରତକଳର ମାଲିକଙ୍କ ସମେତ ମ୍ୟାନେଜର ଓ କର୍ମଚାରୀମାନେ ଫେରାର ହୋଇଯାଇଥିଲେ।
