ବାଲେଶ୍ୱର ଅଫିସ, ୬।୭-ବାଲେଶ୍ୱର ଜିଲା ସ୍ବାସ୍ଥ୍ୟ ବିଭାଗ ପାଇଁ ସରକାର ଯେତିକି ଡାକ୍ତର ପଦବୀ ମଞ୍ଜୁର କରିଛନ୍ତି ସେଥିରୁ ଅଧାରୁ ଅଧିକ ପଦବୀ ଖାଲିପଡିଛି। ଏମିତି କି ଗୋଟିଏ ଗୋଟିଏ ବିଭାଗରେ ଡାକ୍ତର ନାହାନ୍ତି। ଏପରି ଦୟନୀୟ ଅବସ୍ଥାରେ ପ୍ରତିଦିନ ହଜାର ହଜାର ରୋଗୀ ସରକାରୀ ଡାକ୍ତରଖାନାରୁ ନିରାଶ ହୋଇ ଘରୋଇ କ୍ଲିନିକ୍ ଉପରେ ଭରସା କରି ଖର୍ଚ୍ଚାନ୍ତ ହେଉଛନ୍ତି। ଦୁଇବର୍ଷ ପୂର୍ବରୁ ବାଲେଶ୍ୱର ଜିଲା ମୁଖ୍ୟ ଚିକିତ୍ସାଳୟରେ ଫକୀରମୋହନ ମେଡିକାଲ କଲେଜ ସ୍ଥାପିତ ହୋଇଥିଲେ ମଧ୍ୟ କିଛି ପରିବର୍ତ୍ତନ ହୋଇନାହିଁ ଓ ସମସ୍ୟା ଦିନକୁ ଦିନ ବଢ଼ିବାରେ ଲାଗିଛି।
ଜିଲାରେ ସରକାରୀ ଅନୁମୋଦିତ ମୋଟ ୩୭୩ ଡାକ୍ତର ପଦ ରହିଛି। ଏବେ ଅଛନ୍ତି ମାତ୍ର ୧୮୩ ଡାକ୍ତର। ୧୯୦ ପଦବୀ ବର୍ଷ ବର୍ଷ ଧରି ଖାଲି ପଡ଼ିଛି। ଉପାନ୍ତ ଅଞ୍ଚଳର ବିଭିନ୍ନ ଡାକ୍ତରଖାନାରେ ୧୪୬ଟି ପଦବୀ ଖାଲି ପଡ଼ିଥିବା ବେଳେ କେବଳ ଜିଲା ମୁଖ୍ୟ ଚିକିତ୍ସାଳୟରେ ୪୪ ଡାକ୍ତର ପଦବୀ ଖାଲିପଡିଛି। ଜିଲା ମୁଖ୍ୟ ଚିକିତ୍ସାଳୟରେ ପ୍ରସୂତି ଓ ସ୍ତ୍ରୀ ରୋଗ ବିଶେଷଜ୍ଞ ପରାମର୍ଶଦାତା, ରଞ୍ଜନରଶ୍ମି ଚିକିତ୍ସକ, ଶିଶୁ ରୋଗ ଚିକିତ୍ସକ, ଏଟିପିଏଚ୍ଓ, ଲେପ୍ରୋସି, ନାସା, କର୍ଣ୍ଣ ଓ ଗଳା ଚିକିତ୍ସକ, ନିଶ୍ଚେତକ ଚିକିତ୍ସକ, ଶଲ୍ୟ ଚିକିତ୍ସକ, ଅସ୍ଥିଶଲ୍ୟ ଚିକିତ୍ସକ, ବ୍ଲଡବ୍ୟାଙ୍କ ଅଫିସର ଆଦି ପଦବୀ ଖାଲି ରହିଛି। ଏହାସହିତ ମେଡିକାଲ ଅଫିସର(ଜେଲ), ମେଡିକାଲ ଅଫିସର(ରିଜର୍ଭ ପୋଲିସ ବାରାକ୍), ହେଲ୍ଥ ଅଫିସର (ମ୍ୟୁନିସିପାଲିଟି) ଆଦି ପଦବୀରେ କେହିନାହାନ୍ତି। ଅନ୍ୟପକ୍ଷରେ ସିନିୟର ମେଡିକାଲ ଅଫିସର ମଞ୍ଜୁରୀ ପଦ ୮ ଓ ଜେନେରାଲ ଡ୍ୟୁଟି ମେଡିକାଲ ଅଫିସର ୨୨ଟି ମଞ୍ଜୁରୀ ପଦ ରହିଥିଲେ ମଧ୍ୟ ପଦବୀଗୁଡ଼ିକ ଦୀର୍ଘଦିନ ଧରି ଫାଙ୍କା ପଡ଼ିଛି। ମେଡିକାଲ କଲେଜ ଓ ହସ୍ପିଟାଲ ହେବା ପରେ ଏଠାରେ ସୁପର ସ୍ପେଶିଆଲିଟି ବିଭାଗ ଖୋଲିବା କଥା ମାତ୍ର ସେ ସୁବିଧା ବି ଏଠାରେ ମିଳୁନାହଁି। ପୂର୍ବରୁ ସ୍ନାୟୁଶଲ୍ୟ ବିଭାଗରେ ମେଡିକାଲ କଲେଜର ଡିନ୍ ଡା. ପ୍ରତାପ ରଥ ରୋଗୀମାନଙ୍କୁ ଦେଖୁଥିଲେ। ହେଲେ ଡା. ରଥ ଗତ ଜାନୁୟାରୀରେ ଅବସର ନେବା ପରେ ଆଜକୁ ୬ମାସ ହେବ ସେ ବିଭାଗରେ ମଧ୍ୟ କେହି ଡାକ୍ତର ନାହାନ୍ତି। ସେମିତି କାର୍ଡିଓଲୋଜି, ନେଫ୍ରୋଲୋଜି, ପେଡିଆଟ୍ରିକ୍, ସର୍ଜରି ଆଦି ସୁପର ସ୍ପେଶିଆଲିଟି ବିଭାଗ ଏଯାଏ ଖୋଲିନାହଁି। ଫଳରେ ଏହି ବିଭାଗର ରୋଗୀମାନେ କଟକ ଓ ଭୁବନେଶ୍ୱରକୁ ଯାଉଛନ୍ତି। କରୋନା ପୂର୍ବରୁ ଦିନକୁ ୪୦ରୁ ଅଧିକ ରୋଗୀଙ୍କୁ ବାହାରକୁ ରେଫର କରାଯାଉଥିବା ବେଳେ କରୋନା ସମୟରେ ଡାକ୍ତରଖାନାକୁ ରୋଗୀ ବହୁତ କମ୍ ଆସୁଛନ୍ତି। ତା’ ସତ୍ତ୍ୱେ ଏବେ ୨୦ରୁ ୨୫ ରୋଗୀଙ୍କୁ ବାହାରକୁ ରେଫର କରାଯାଉଛି। ମେଡିକାଲ କଲେଜ ହେଲେ ଏହି ସମସ୍ୟା ଦୂର ହେବ ବୋଲି କୁହାଯାଉଥିଲା, ଏଯାବତ୍ ତାହା ସମ୍ଭବ ହୋଇନାହଁି। ଦିନକୁ ଦିନ ଅବ୍ୟବସ୍ଥା ବଢ଼ିଚାଲିଛି।
ଏନେଇ ଜିଲା ମୁଖ୍ୟ ଚିକିତ୍ସାଧିକାରୀ ଡା. ଦୁଲାଲସେନ ଜଗଦେବଙ୍କୁ ପଚାରିବାରୁ ଡାକ୍ତର ଅଭାବ ନେଇ ରୋଗୀ ଚିକିତ୍ସାରେ ଅସୁବିଧା ହେଉଛି। ଅଧିକ ଡାକ୍ତର ନିଯୁକ୍ତି ପାଇଁ ସ୍ବାସ୍ଥ୍ୟ ବିଭାଗକୁ ଲିଖିତ ଭାବେ ଜଣାଯାଇଛି ବୋଲି କହିଛନ୍ତି।
