ବୈଶିଙ୍ଗା,୨୧ା୫(ଡି.ଏନ୍.ଏ.): ମୟୂରଭଞ୍ଜ ଜିଲାର ବୈଶିଙ୍ଗା ଅଞ୍ଚଳରେ ବୁଢ଼ାବଳଙ୍ଗ ଓ ଗଙ୍ଗାହାର ନଦୀ ଅବବାହିକାରେ ପ୍ରଚୁର ପରିମାଣରେ ପନିପରିବା ଚାଷ କରାଯାଇଥାଏ। ଚଳିତ ବର୍ଷ ମଧ୍ୟ ଜହ୍ନି, ବାଇଗଣ, ବିଲାତି, କାକୁଡ଼ି, ପୋଟଳ, ଲଙ୍କା, ଝୁଡ଼ଙ୍ଗ ଆଦିର ଉତ୍ପାଦନ ଭଲ ହୋଇଛି। ମାତ୍ର ପ୍ରବଳ ଖରା ଓ ଗରମରୁ ଦୈନିକ କୁଇଣ୍ଟାଲରୁ ଊର୍ଦ୍ଧ୍ୱ ପରିବା ପଚି ନଷ୍ଟ ହୋଇଯାଉଥିବା ପାଟଳୀପୁରା, ଶାଳଗାଁ, ନାଖରା, ଡେଁଫୌଦା, ଦେଓପଡ଼ା, ଦାରିହା, ପ୍ରତିମାଦେଇପୁର, ମାଣତ୍ରୀ, ଚନ୍ଦନପୁର, ମାନଗୋବିନ୍ଦପୁର ଆଦି ଅଞ୍ଚଳର ଚାଷୀମାନେ କହିଛନ୍ତି। ଶୀତଳଭଣ୍ଡାର ଥିଲେ ଉତ୍ପାଦିତ ଫସଲ ଦୀର୍ଘ ଦିନ ସଂରକ୍ଷିତ ରଖି କଟକ, ଭୁବନେଶ୍ବର ସମେତ ରାଜ୍ୟର ବିଭିନ୍ନ ଅଞ୍ଚଳକୁ ଯୋଗାଇ ହୋଇପାରନ୍ତା ବୋଲି କହିଛନ୍ତି।
ପ୍ରକାଶ ଯେ, ବୈଶିଙ୍ଗା, ମାଣତ୍ରୀ, ବେତନଟୀ ଆଦି ପରିବା ମାର୍କେଟରେ ଦର ମାତ୍ରାଧିକ ହ୍ରାସ ଘଟିଛି। ପରିବା ମୂଲ୍ୟର ଏପରି ଅବସ୍ଥାକୁ ନେଇ ଚାଷୀମାନେ ମୁଣ୍ଡରେ ହାତ ଦେଇଛନ୍ତି। ବୈଶିଙ୍ଗା ଉପକଣ୍ଠ ଡାହିବାଡ଼ି ସାପ୍ତାହିକ ହାଟ ସପ୍ତାହରେ ଦୁଇ ଥର ବସୁଛି। ଫଳରେ ଚାଷୀ ଅନେକ କ୍ଷତି ସହୁଛନ୍ତି। ବେତନଟୀ ନିୟନ୍ତ୍ରିତ ବଜାର କମିଟି ଓ ବୈଶିଙ୍ଗା ପଞ୍ଚାୟତ କାର୍ଯ୍ୟାଳୟ ପକ୍ଷରୁ ଏହି ହାଟରୁ ପ୍ରାୟ ୫ ହଜାରରୁ ଊର୍ଦ୍ଧ୍ୱ ଚାଷୀଙ୍କଠାରୁ ମାହାସୁଲ ଆଦାୟ କରାଯାଉଛି। ଉକ୍ତ ହାଟ ସମଗ୍ର ଅଞ୍ଚଳର ଚାଷୀଙ୍କ ଭାତହାଣ୍ଡି ସାଜିଥିବା ବେଳେ ଏଠାରେ ଏକ ଶୀତଳଭଣ୍ଡାର ନାହିଁ। ଫଳରେ ଫସଲ ନଷ୍ଟ ହେବା ଭୟରେ ଚାଷୀ ଶାଗମାଛ ଦରରେ ଦେଉଛନ୍ତି। ବ୍ୟସ୍ତବହୁଳ ଡାହିବାଡି ହାଟଠାରୁ ମାତ୍ର ୫୦୦ ମିଟର ଦୂରରେ ୧୮ ନଂ. ଜାତୀୟ ରାଜପଥ ପାଶର୍ବରେ ଥିବା ନିୟନ୍ତ୍ରିତ ବଜାର କମିଟିର ବିସ୍ତୀର୍ଣ୍ଣ ପରିସରରେ ଏକ ଶୀତଳଭଣ୍ଡାର ପ୍ରତିଷ୍ଠା କରିବାକୁ ଚାଷୀ ଦାବି କରିଛନ୍ତି। ଏ ନେଇ ସ୍ଥାନୀୟ ବଡ଼ସାହି ବିଧାୟକ ସନାତନ ବିଜୁଳି ବିଗତ ବିଧାନସଭା ପ୍ରଶ୍ନୋତ୍ତର କାଳରେ ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ। ଉତ୍ତରରେ କୃଷିମନ୍ତ୍ରୀ ସରକାରଙ୍କ ପକ୍ଷରୁ ଏବେ ଶୀତଳଭଣ୍ଡାର ପ୍ରତିଷ୍ଠା ଯୋଜନା ନାହିଁ। ମାତ୍ର ଘରୋଇ ଉଦ୍ୟମରେ ପ୍ରତିଷ୍ଠା କରାଗଲେ ସରକାରଙ୍କ ପକ୍ଷରୁ ସ୍ବତନ୍ତ୍ର ଅନୁଦାନ ଯୋଗାଇ ଦିଆଯିବ। ତେବେ ସୋଲାର ସିଷ୍ଟମ ମାଧ୍ୟମରେ ସ୍ବଳ୍ପ କ୍ଷମତା ବିଶିଷ୍ଟ ଶୀତଳଭଣ୍ଡାର ପ୍ରତିଷ୍ଠା ଦିଗରେ ପଦକ୍ଷେପ ନେବା ନିମନ୍ତେ ସରକାରୀ ସ୍ତରରେ ବିଚାର କରାଯାଉଛି ବୋଲି ପ୍ରକାଶ କରିଥିଲେ। ଏ ସଂକ୍ରାନ୍ତରେ ବେତନଟୀ ନିୟନ୍ତ୍ରିତ ବଜାର କମିଟି ସମ୍ପାଦକ ସଦାନନ୍ଦ ମାରାଣ୍ଡି କହିଛନ୍ତି, ପରିବାଚାଷୀଙ୍କ ଦୁଃଖ ଓ ସମସ୍ୟା ସମ୍ପର୍କରେ ଅବଗତ ଅଛନ୍ତି, ଖୁବ୍ଶୀଘ୍ର ଏ ବାବଦରେ ପଦକ୍ଷେପ ନେବାକୁ ସରକାରଙ୍କୁ ଏକ ପ୍ରସ୍ତାବ ଦେବେ ବୋଲି କହିଥିଲେ।
