ଫୁଲବାଣୀ ଅଫିସ,୨୨ା୮: ଲଗାଣ ବର୍ଷାର ପ୍ରଭାବ କନ୍ଧମାଳ ଜିଲାରେ ପଡିଛି। ରବିବାର ବର୍ଷା ପୂର୍ବ ଅପେକ୍ଷା କମିଛି। ଗତ ୧୫ ତାରିଖରୁ ଦୁଇ ଦଫାରେ ହୋଇଥିବା ଲଗାଣ ବର୍ଷାରେ ଜିଲାରେ ଅନେକ କ୍ଷୟକ୍ଷତି ଘଟିଛି। ପାଖାପାଖି ୫୦୦ରୁ ଉଦ୍ଧର୍ବ ଘର ଭାଙ୍ଗିଥିବା ବେଳେ ଅନେକ ସ୍ଥାନରେ ଯୋଗାଯୋଗ ବିଚ୍ଛିନ୍ନ ହୋଇଛି। ବଡ ବଡ ଗଛ ଉପୁଡି ପଡିଥିବାରୁ ଦୁର୍ଗମ ଅଞ୍ଚଳଗୁଡିକରେ ବିଦ୍ୟୁତ ସରବରାହ ବିଚ୍ଛିନ୍ନ ହୋଇଛି । ଅନେକ ସ୍ଥାନରେ ବର୍ତମାନ ସୁଦ୍ଧା ବର୍ଷା ଜଳ ଜମି ରହିଛି। ଫଳରେ କିଛି ଗ୍ରାମ ବାହ୍ୟ ଜଗତରୁ ବିଚ୍ଛିନ୍ନ ହୋଇ ରହିଛି । ପାହାଡରୁ ମାଟି ଅତଡା ଧସି ଯାତାୟତରେ ବାଧା ସୃଷ୍ଟି ହୋଇଛି। ଫୁଲବାଣୀ ସହର ଦେଇ ପ୍ରବାହିତ ହେଉଥିବା ପିଲାସାଲୁଙ୍କି ନଦୀର ଡାକପାଲା ପୋଲ ଉପରେ ରବିବାର ମଧ୍ୟ ବର୍ଷା ଜଳ ଚାଲିଛି । ଫଳରେ ୨ ନଂ ୱାର୍ଡର ଡାମିଗାଁ, ଡାକପାଲା ଅଞ୍ଚଳ ଲୋକେ ସହରକୁ ଆସିବାରେ ସମସ୍ୟା ସୃଷ୍ଟି ହୋଇଛି। ଲଗାଣ ବର୍ଷା ଯୋଗୁଁ ଜିଲାର ଦାରିଙ୍ଗବାଡି, ଫିରିଙ୍ଗିଆ, ରାଇକିଆ, ତୁମୁଡିବନ୍ଧ ବ୍ଲକ ସର୍ବାଧିକ କ୍ଷତିଗ୍ରସ୍ତ ହୋଇଥିବା ଜିଲା ପ୍ରଶାସନ ପକ୍ଷରୁ କୁହାଯାଇଛି। ବର୍ଷା କମିବା ପରେ ଏବେ ପ୍ରଶାସନ ପକ୍ଷରୁ ସଂପୂର୍ଣ୍ଣ କ୍ଷୟକ୍ଷତି ଆକଳନ ଆରମ୍ଭ କରାଯାଇଛି । ଫୁଲବାଣୀ ଓ ଫିରିଙ୍ଗିଆ ଠାରେ ଖୋଲା ଯାଇଥିବା ଅସ୍ଥାୟୀ ଶିବିର ରବିବାରଠାରୁ ବନ୍ଦ ରହିଥିବା ଜିଲା ଆପଦକାଳୀନ ଅଧିକାରୀ ପ୍ରଦ୍ୟୁମ୍ନ ମଣ୍ଡଳ ସୂଚନା ଦେଇଛନ୍ତି। ସବିଶେଷ ତଥ୍ୟ ଅନୁଯାୟୀ ଜିଲାରେ ପ୍ରାୟ ୫୪୦ ଘର ବର୍ଷା କାରଣରୁ କ୍ଷତିଗ୍ରସ୍ତ ଘର ହୋଇଥିବା ମଣ୍ଡଳ ପ୍ରକାଶ କରିଛନ୍ତି।
