ବାଲିକୁଦା,୧୬ା୧(ସ୍ବ.ପ୍ର.):ଜଗତ୍ସିଂହପୁର ଜିଲା ବାଲିକୁଦା ବ୍ଲକସ୍ଥିତ ଆକାଶିଆ ସମୁଦ୍ର କୂଳର ବିଭିନ୍ନ ସ୍ଥାନରେ ୨୦ରୁ ଊର୍ଦ୍ଧ୍ୱ କଇଁଛ ମୃତଦେହ ପଡ଼ିଛି। ଏସବୁ ମୃତଦେହ ପଚିଶଢ଼ି ଯିବାରୁ ଦୁର୍ଗନ୍ଧମୟ ପରିବେଶ ସୃଷ୍ଟି ହୋଇଥିବାବେଳେ ବନ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉନାହିଁ। ହାୱାଖାନା ବନପାଳଙ୍କ ଅଧୀନରେ ଏହି ଅଞ୍ଚଳ ଆସୁଥିବାବେଳେ କାର୍ଯ୍ୟାଳୟଠାରୁ ମାତ୍ର ୧୦୦ ମିଟର ଦୂରରେ କଇଁଛଙ୍କ ମୃତଦେହ ପଡ଼ିଛି। ମାତ୍ର ବିଭାଗୀୟ ଅଧିକାରୀ ଘଟଣା ସମ୍ପର୍କରେ ଅବଗତ ନ ଥିବା କହୁଛନ୍ତି। ଆଉ କିଛି ଦିନପରେ ଅଲିଭ୍ରିଡ୍ଲେ କଇଁଛ ଗଭୀର ସମୁଦ୍ରରୁ କୂଳକୁ ଆସି ଅଣ୍ଡାଦାନ କରିବେ। ସେମାନେ ଆସୁଥିବା ବାଟରେ ମାଛ ଧରା ଟ୍ରଲର ସହ ଧକ୍କା ହୋଇଥିଲେ କଇଁଛଙ୍କ ମୃତ୍ୟୁ ଘଟିଥିବା ଆଶଙ୍କା କରାଯାଉଛି। ପରେ ସମୁଦ୍ର ଲହରୀରେ ଭାସିଆସି କୂଳରେ ପଡ଼ିଥିବା ନେଇ ପରିବେଶବିତ୍ମାନେ ସନ୍ଦେହ ପ୍ରକାଶ କରୁଛନ୍ତି। ଅଲିଭ୍ରିଡ୍ଲେଙ୍କ ସୁରକ୍ଷାକୁ ଦୃଷ୍ଟିରେ ରଖି ସରକାରଙ୍କ ନିର୍ଦ୍ଦେଶାନୁସାରେ ବନ ବିଭାଗ ପକ୍ଷରୁ ବ୍ୟାପକ ପଦକ୍ଷେପ ନିଆଯାଉଥିବା କୁହାଯାଉଛି। ମାଛଧରା ଟ୍ରଲର ଯାତାୟାତ ଉପରେ କଟକଣା ଲଗାଯାଇଛି। ବିଭାଗ ପକ୍ଷରୁ ସମୁଦ୍ରକୂଳରେ ୨୪ ଘଣ୍ଟିଆ ପଇଁତରା ମାରିବା ପାଇଁ କର୍ମଚାରୀ ନିଯୁକ୍ତି ପାଇଛନ୍ତି। ହେଲେ ଏତେ ସଂଖ୍ୟକ କଇଁଛଙ୍କ ମୃତ୍ୟୁକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ଏ ସମ୍ପର୍କରେ ହାୱାଖାନା ବନପାଳ ସଞ୍ଜୀବ କୁମାର ଦାସଙ୍କୁ ପଚାରିବାରୁ ସେ ମୃତ କଇଁଛ ସମ୍ପର୍କରେ କିଛି ଜାଣି ନ ଥିବା କହିଛନ୍ତି। ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ସ୍ଥାନୀୟ ଅଞ୍ଚଳର ସୁବୋଧ ବିଶ୍ୱାଳ, ସୁରେଶ ଚନ୍ଦ୍ର ସ୍ବାଇଁ, ଜୟନ୍ତ ହାତୀ, ବିପିନ ହାତୀ ପ୍ରମୁଖ ଦାବି କରିଛନ୍ତି।
