କେନ୍ଦ୍ରାପଡା ଅଫିସ, ୨୧ା୧୦:ଆନ୍ତର୍ଜାତିକ ମୁଦ୍ରା ବିନିମୟ କ୍ଷେତ୍ରରେ ଟଙ୍କାର ଅବମୂଲ୍ୟାୟନ ବଢ଼ି ଚାଲିଛି। ଏହା ଭାରତୀୟ ଅର୍ଥନୀତି ଉପରେ ପ୍ରଭାବ ପକାଉଛି ବୋଲି ଅର୍ଥନୀତିଜ୍ଞମାନେ ଆଶଙ୍କା ବ୍ୟକ୍ତ କରିଛନ୍ତି। ଅପରପକ୍ଷରେ ଟଙ୍କାର ଏହି ଅବମୂଲ୍ୟାୟନ କେନ୍ଦ୍ରାପଡ଼ା ଜିଲାର ପ୍ରବାସୀ ଶ୍ରମିକଙ୍କ ପାଇଁ ଖୁସି ଆଣି ଦେଇଛି। ଏକ ବେସରକାରୀ ଆକଳନ ଅନୁଯାୟୀ, ଜିଲାର ୭୦ ହଜାରରୁ ଅଧିକ ଲୋକ ବିଦେଶରେ କାର୍ଯ୍ୟରତ ଅଛନ୍ତି। ବିଶେଷକରି ସାଉଦିଆରବ, ୟୁଏଇ, ଇରାନ, ଇରାକ, କୁଏତ, ବାହାରିନ, ଆମେରିକା ଆଦି ଦେଶରେ କେନ୍ଦ୍ରାପଡ଼ା ଜିଲାର ବହୁ ଲୋକ ଶ୍ରମିକ ଭାବେ କାମ କରୁଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ପାଣି ପାଇପ୍ ମିସ୍ତ୍ରି ଭାବେ କାର୍ଯ୍ୟ କରୁଛନ୍ତି। ଡଲାର, ଦିରହାମ, ଦିନାର, ରିଅଲ ଆଦି ବୈଦେଶିକ ମୁଦ୍ରା ତୁଳନାରେ ଟଙ୍କା ମୂଲ୍ୟ କମିଥିବାରୁ ସେଠାରୁ ଆସୁଥିବା ଅର୍ଥ ଭାରତୀୟ ମୁଦ୍ରାରେ ଅଧିକ ମିଳୁଛି। ଫଳରେ ପରିବାର ଲୋକ ଖୁସି ବ୍ୟକ୍ତି କରିଛନ୍ତି। ଏ ସମ୍ପର୍କରେ ପଟ୍ଟାମୁଣ୍ଡାଇର ହାଡ଼ିବନ୍ଧୁ ନାୟକ କୁହନ୍ତି, ପୁଅ ବିଜୟ ଦୁବାଇରେ ପାଣି ମିସ୍ତ୍ରି ଭାବେ କାର୍ଯ୍ୟ କରେ। ଏବେ ଭାରତୀୟ ମୁଦ୍ରାର ଅବମୂଲ୍ୟାୟନ ଯୋଗୁ ପୁଅ ଘରକୁ ପଠାଉଥିବା ଟଙ୍କା ପୂର୍ବ ଅପେକ୍ଷା ଅଧିକ ମିଳୁଛି। ସେହିପରି ୟୁଏଇରେ ପାଣି ପାଇପ୍ କାର୍ଯ୍ୟ କରୁଥିବା ଆଳିର ବସନ୍ତ ପ୍ରଧାନ କୁହନ୍ତି, ଗତବର୍ଷ ୟୁଏଇର ଗୋଟିଏ ମୁଦ୍ରା (ଦିରହାମ) ତୁଳନାରେ ଭାରତୀୟ ମୁଦ୍ରାର ମୂଲ୍ୟ ୨୦.୧୪ ଟଙ୍କା ଥିଲା। ଏବେ ଏହା ୨୨.୫୪ ପଇସାରେ ପହଞ୍ଚତ୍ଛି। କେବଳ ଦିନାର ନୁହେଁ, ଗତବର୍ଷ ୧ ଡଲାରର ବିନିମୟ ମୂଲ୍ୟ ୭୫.୩୧ ଟଙ୍କା ଥିବାବେଳେ ଏବେ ୮୩ ଟଙ୍କା ଛୁଇଁଛି। ସେହିପରି ଗୋଟିଏ ବର୍ଷ ମଧ୍ୟରେ କୁଏତ୍ର ୧ ଦିନାରର ମୂଲ୍ୟ ୨୪୬ରୁ ୨୫୪ ଟଙ୍କା, ସାଉଦି ଆରବର ୧ ରିଏଲର ମୂଲ୍ୟ ଭାରତୀୟ ମୁଦ୍ରାରେ ୧୯.୭୧ ଟଙ୍କାରୁ ୨୨ ଟଙ୍କା ହୋଇଛି। ଏହାଦ୍ୱାରା ଘରର ଆବଶ୍ୟକତାକୁ ସହଜରେ ପୂରଣ କରିହେଉଛି ବୋଲି ସେ ମତବ୍ୟକ୍ତ କରିଛନ୍ତି। ବୁଦ୍ଧିଜୀବୀ ଗଣେଶ ଚନ୍ଦ୍ର ସାମଲ କହିଛନ୍ତି, କେନ୍ଦ୍ରାପଡ଼ା ଜିଲାର ଅର୍ଥନୀତିରେ ଅଦ୍ୟାବଧି ଶିଳ୍ପ ଯୋଡି ହୋଇନି। ଏଠାରେ ଖଣି ମଧ୍ୟ ନାହିଁ। ପର୍ଯ୍ୟଟନ ଶିଳ୍ପର ପ୍ରଚାର ପ୍ରସାର ସହ ଭିତ୍ତିଭୂମି ନ ଥିବାରୁ ପର୍ଯ୍ୟଟକ ଆସୁନାହାନ୍ତି। କୃଷି ପାଇଁ ପ୍ରାକୃତିକ ବିପର୍ଯ୍ୟୟ ଓ ଜଳ ପରିଚାଳନା (ସେଚନ ଓ ନିଷ୍କାସନ) ବିପଦ ହୋଇଥିବାରୁ ଯୁବବର୍ଗ କର୍ମ ଅନ୍ବେଷଣରେ ପ୍ରବାସକୁ ଯିବାକୁ ବାଧ୍ୟ ହେଉଛନ୍ତି। ପାଣି ପାଇପ୍ ମିସ୍ତ୍ରି (ପ୍ଲମ୍ବିଂ) କ୍ଷେତ୍ରରେ କେନ୍ଦ୍ରାପଡ଼ା ଜିଲା ଆଗୁଆ ଥିବାରୁ ଏଠାରେ ବହୁ କୁଶଳୀ ଯୁବବର୍ଗ ଦେଶ ବିଦେଶରେ କାର୍ଯ୍ୟରତ ଅଛନ୍ତି। ଅପରପକ୍ଷରେ ଟଙ୍କାର ଅବମୂଲ୍ୟାୟନ ଦେଶର ଅର୍ଥନୀତି ଉପରେ କୁପ୍ରଭାବ ପକାଉଛି ବୋଲି ସେ ଚିନ୍ତାବ୍ୟକ୍ତ କରିଛନ୍ତି।
