କଳିଙ୍ଗନଗର,୧୮ା୧୦(ଡି.ଏନ.ଏ.): ଯାଜପୁର ଜିଲା ଦାନଗଦି ତହସିଲ ମାନତୀରା ରାଜସ୍ବ ସର୍କଲ ଅଞ୍ଚଳର ଏକ କାଜୁ ଜଙ୍ଗଲରୁ ଗତ ଏକ ସପ୍ତାହ ଧରି ମୋରମ ଚାଲାଣ ଜାରି ରହିଛି। ଏକ ଗୋଷ୍ଠି ପ୍ରଶାସନକୁ କରାୟତ କରି ଲୁଟ ଚଳାଇ ଥିବା ବେଳେ ସ୍ଥାନୀୟ ପୋଲିସ ମଧ୍ୟ ସେମାନଙ୍କ ରକ୍ଷାକବଚ ସାଜିଥିବା ଅଭିଯୋଗ ହେଉଛି। ପଙ୍କପାଳ ପଞ୍ଚାୟତ ଜଟରାପାଳ ନିକଟ କାଜୁ ଜଙ୍ଗଲକୁ ଜେସିବି ମେଶିନରେ ଖୋଳି ସ୍ଥାନୀୟ କେତେଜଣ ବ୍ୟକ୍ତି ରାତିରେ ମୋରମ ଚାଲାଣ କରୁଛନ୍ତି। ବିଳମ୍ବିତ ରାତିରେ ୩୦ରୁ ଅଧିକ ହାଇୱା ଗାଡ଼ିରେ ରାଜପଥ କାମ କରୁଥିବା ଏକ ଠିକାସଂସ୍ଥା ଓ ଧାମରା ଅଞ୍ଚଳକୁ ଏହି ମୋରମ ଚାଲାଣ ହେଉଛି। ଗତ ସପ୍ତାହକ ମଧ୍ୟରେ ୫୦୦ରୁ ଅଧିକ ଟ୍ରିପ ମୋରମ ଚାଲାଣ ହୋଇଛି। ଛୁଟି ଦିନ ଆଳରେ ଏହି ବେଆଇନ କାମକୁ ପ୍ରଶାସନ ପକ୍ଷରୁ ପ୍ରଶୟ ଦିଆଯାଇଛି। ସ୍ଥାନୀୟ ଯଖପୁରା ପୋଲିସକୁ ଏହି ବେଆଇନ କାରବାର ସମ୍ପର୍କରେ ସୂଚନା ଦିଆଯାଇଥିଲେ ହେଁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ ବୋଲି ଅଭିଯୋଗ ହୋଇଛି। ମୋରମ ଲୁଟ ଫଳରେ ସରକାରଙ୍କ ଲକ୍ଷାଧିକ ଟଙ୍କାର ରାଜସ୍ବ କ୍ଷତି ହୋଇଛି। ଅନ୍ୟପକ୍ଷେ ଯୋଜନାବଦ୍ଧ ଭାବେ ଚାଲିଥିବା ଏହି ବେଆଇନ କାରବାର ପଛରେ ଏକ ରାଜନୈତିକ ଦଳର କର୍ମୀମାନେ ସମ୍ପୃକ୍ତ ଥିବା ଜଣାପଡ଼ିଛି। ରାଜସ୍ବ ବିଭାଗର କେତେଜଣ ଅସାଧୁ କର୍ମଚାରୀଙ୍କୁ ତୁଷ୍ଟିକରଣ ମାଧ୍ୟମରେ ଏହି କାରବାର ଚାଲିଛି। ଜିଲା ପ୍ରଶାସନ ଏହା ଉପରେ ଅଙ୍କୁଶ ଲଗାଇବା ସହିତ ମାଫିଆଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହେଉଛି।
