ଇସ୍ଲାମାବାଦ,୧୦।୮: ଗତ ୩ଦିନ ହେବ ପାକିସ୍ତାନରେ ଲଗାଣ ବର୍ଷା ଲାଗି ରହିଛି। ମୌସୁମୀ ସକ୍ରିୟ ଥିବା ବେଳେ ଲଗାଣ ବର୍ଷାରେ ବେହାଲ ହେଲାଣି ପାକିସ୍ତାନ। ପ୍ରବଳ ବର୍ଷା ଯୋଗୁ ଏପର୍ଯ୍ୟନ୍ତ ୫୦ ଲୋକଙ୍କ ମୃତ୍ୟୁ ଘଟିଥିବା କୁହାଯାଉଛି। ପାକିସ୍ତାନର ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣର ସୂଚନା ଅନୁଯାୟୀ ବର୍ଷାରେ ବିଶେଷ ଭାବେ ଖେବର ପଖତୁନଓ୍ବାର ଉତ୍ତର-ପଶ୍ଚିମ ଅଞ୍ଚଳରେ କ୍ଷତି ହୋଇଛି। ଏଠାରେ ବର୍ଷା ଯୋଗୁ ୧୯ ଜଣଙ୍କ ମୃତ୍ୟୁ ହୋଇଛି। ସେହିପରି ସିନ୍ଧ ଅଞ୍ଚଳରେ ୧୨ ଓ ଉତ୍ତର ଗିଲଗିଟ ବାଲଟିସ୍ତାନରେ ୧୦ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି। ଏସବୁ ଅଞ୍ଚଳରେ ବର୍ଷା ଯୋଗୁ ବନ୍ୟା ସତର୍କତା ମଧ୍ୟ ଜାରି କରାଯାଇଛି। ସିନ୍ଧ ଅଞ୍ଚଳରେ ଆସିଥିବା ବନ୍ୟାରେ ପାଖାପାଖି ୧୦୦ ଘର କ୍ଷତିଗ୍ରସ୍ତ ହେବାସହ ମୁଖ୍ୟ ସହର ଜଳାର୍ଣ୍ଣବ ହୋଇଛି। ପ୍ରଶାସନ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଛି।
