ସୀତାପୁର: ଉତ୍ତରପ୍ରଦେଶର ସୀତାପୁର ଜିଲାର ଜଣେ ବୃଦ୍ଧ ଜାଗା ରେଜିଷ୍ଟ୍ରେଶନ କରିବାକୁ ବିକାଶ ଭବନ ରେଜିଷ୍ଟ୍ରି କାର୍ଯ୍ୟାଳୟ ଯାଇଥିଲେ। ପାଖରେ ତାଙ୍କର ୪ଲକ୍ଷ ଟଙ୍କା ଭର୍ତ୍ତି ବ୍ୟାଗ୍ଟିଏ ଥିଲା। ହେଲେ ଏକ ମାଙ୍କଡ଼ ବୃଦ୍ଧଙ୍କ ନୋଟ ଭର୍ତ୍ତି ବ୍ୟାଗ୍କୁ ନେଇ ଗଛ ଉପରେ ଚଢ଼ି ଯାଇଥିଲା। ସେଥିରୁ ୧୦ରୁ ୧୨ ହଜାର ଟଙ୍କାର ନୋଟ୍ ମାଙ୍କଡଟି ଚିରି ପକାଇଥିଲା। ଏହାଦେଖି ବୃଦ୍ଧଜଣଙ୍କ ଚିନ୍ତାରେ ପଡ଼ିଯାଇଥିଲେ।
ଘଟଣାଟି ମଙ୍ଗଳବାର ଅପରାହ୍ନର। ନୋଟ ଭର୍ତ୍ତି ବ୍ୟାଗ୍ ନେଇ ଗଛ ଉପରକୁ ଚଢ଼ିଯିବା ପରେ ବୃଦ୍ଧ ଭଗବାନ ଦୀନ ସେଠାରେ ପହଞ୍ଚିଥିଲେ। ହେଲେ ମାଙ୍କଡଟି ବ୍ୟାଗ୍ରୁ ନୋଟ ବାହାର କରି ଫିଙ୍ଗିବାକୁ ଲାଗିଥିଲା। ଏହା ଦେଖି ଭିଡ ଜମା ହୋଇଥିଲା। ଭଗବାନ ମାଙ୍କଡଟିକୁ କଦଳୀ ଯାଚି ଥିଲେ। ହେଲେ ସେ ତାହା ନେଇ ନ ଥିଲା। କିଛି ଲୋକ ସାହାଯ୍ୟ କରିବାକୁ ଯାଇ ଗଛ ଉପରେ ଚଢ଼ି ବ୍ୟାଗ୍ଟିକୁ ଛଡ଼ାଇ ଆଣିବାକୁ ଚେଷ୍ଟା କରିଥିଲେ। ହେଲେ ବିଫଳ ହୋଇଥିଲେ। ଶେଷରେ ଦୀର୍ଘ ୧ ଘଣ୍ଟା ପରେ ମାଙ୍କଡଟି ବ୍ୟାଗ୍କୁ ଫିଙ୍ଗି ଦେଇଥିଲା। ପରେ ଲୋକମାନେ ପଇସା ଗୋଟାଇ ବୃଦ୍ଧଜଣଙ୍କୁ ଦେଇଥିଲେ। ହେଲେ ସେତେବେଳକୁ ୧୨ହଜାର ଟଙ୍କା ନଷ୍ଟ ହୋଇଯାଇଥିଲା। ଏହି ଘଟଣା ଏବେ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
