ଭୁବନେଶ୍ବର, ୨୨ା୭(ସୁନିତ୍ ମିଶ୍ର): ମହମ୍ମଦ ମୋକିମ୍ ଏବଂ ଚିରଞ୍ଜୀବ ବିଶ୍ୱାଳଙ୍କୁ କଂଗ୍ରେସରୁ ନିଲମ୍ବିତ କରିବା ପରେ ଦଳ ଭିତରେ ରାଜନୀତି ଜୋର୍ ଧରିବାରେ ଲାଗିଛି। ୨ ନେତାଙ୍କ ସମର୍ଥକମାନେ ରାସ୍ତାକୁ ଓହ୍ଲାଇବା ସହ ଖବରଦାତା ସମ୍ମିଳନୀ କରି ନିଲମ୍ବନ ଆଦେଶ ପ୍ରତ୍ୟାହାର କରିବାକୁ ଦାବି କରିଥିଲେ। ଏପରିକି ପ୍ରଦେଶ କଂଗ୍ରେସ କମିଟି(ପିସିସି) ସଭାପତିଙ୍କ କୁଶପୁତ୍ତଳିକା ମଧ୍ୟ ଦାହ କରିଥିଲେ। ତେବେ ସେହିପରି ଶୁକ୍ରବାର ଉଭୟ ନେତାଙ୍କ ସମର୍ଥକମାନେ ମୋକିମ୍ ଏବଂ ଚିରଞ୍ଜୀବ ଜିନ୍ଦାବାଦ୍ ପକାଇବା ସହିତ ଶରତ ପଟ୍ଟନାୟକଙ୍କ ବିରୋଧରେ ସ୍ଲୋଗାନ ଦେଇ କଂଗ୍ରେସ ଭବନରେ ଧସେଇ ପଶିଥିଲେ। ସେଠାରେ କର୍ମୀମାନେ ପ୍ରତିବାଦ ଜଣାଇଛନ୍ତି। ଅନ୍ୟପଟେ କଂଗ୍ରେସ ଭବନରେ ବସିବାକୁ ଥିବା ଶୃଙ୍ଖଳା କମିଟି ବୈଠକ ବିଧାୟକ ସନ୍ତୋଷ ସିଂ ସାଲୁଜାଙ୍କ ସରକାରୀ ବାସଭବନରେ ବସିଛି। ସେହିପରି ଦଳର ରାଜ୍ୟ କାର୍ଯ୍ୟକାରିଣୀ ବୈଠକ ଶନିବାର କଂଗ୍ରେସ ଭବନରେ ନ ହୋଇ ସ୍ଥାନୀୟ ଏକ ହୋଟେଲରେ ହେବ ବୋଲି ଜଣାପଡ଼ିଛି।
ପ୍ରଥମେ ନିଲମ୍ବିତ ୨ ନେତାଙ୍କ ସମର୍ଥକମାନେ ବିଶାଳ ରାଲିକରି ଶକ୍ତି ପ୍ରଦର୍ଶନ କରିଛନ୍ତି। ସେମାନେ କଂଗ୍ରେସ ଭବନରେ ପଶିବା ପରେ ବାହାରେ ବସି ୨ନେତାଙ୍କ ନିଲମ୍ବନ ଆଦେଶ ପ୍ରତ୍ୟାହାର ଦାବି କରିଥିଲେ। ତେବେ ସାଲୁଜା କହିଛନ୍ତି, କଂଗ୍ରେସ ଭବନରେ ମୋକିମ୍ ଏବଂ ଚିରଞ୍ଜୀବଙ୍କ ସମର୍ଥକମାନଙ୍କ ହୋହଲ୍ଲା ବିଷୟରେ ସେ ଅବଗତ ନାହାନ୍ତି। ତର୍ଜମା ପରେ ଯଦି ସେମାନଙ୍କ ସମର୍ଥକଙ୍କ ଦାବି ଠିକ୍ ଥିବ ତେବେ ଏନେଇ ଏଆଇସିସିକୁ ଜଣାଇ ଦିଆଯିବ। ହେଲେ କୌଣସି ବ୍ୟକ୍ତି ଯଦି ପିସିସି ବିରୋଧରେ ମନ୍ତବ୍ୟ ଦେବେ ତେବେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ହେବ। କଂଗ୍ରେସର ଅନ୍ୟ ଜଣେ ଯୁବନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ଶୃଙ୍ଖଳା କମିଟିରେ ନିଷ୍ପତ୍ତି ହୋଇଥିବା ଜଣାପଡିଛି। ୨ ନେତାଙ୍କ ନିଲମ୍ବନ ଆଦେଶ ପ୍ରତ୍ୟାହାର ନିଷ୍ପତ୍ତି ଏଆଇସିସି ହାତରେ ଅଛି ବୋଲି ସାଲୁଜା କହିଛନ୍ତି। ଅପରପକ୍ଷେ ପ୍ରତିବାଦ କରୁଥିବା ନେତ୍ରୀ ଗିରିବାଳା ବେହେରା କହିଛନ୍ତି, ୨ ନେତାଙ୍କୁ ନିଲମ୍ବନ କରିବା ପରେ କର୍ମୀମାନଙ୍କୁ ଦୁଃଖ ଦେଇଛି। ଯେଉଁଭଳି ଭାବେ ବିନା କାରଣରେ ନିଲମ୍ବିତ କରାଯାଇଛି ସେକଥାକୁ କର୍ମୀମାନେ ବିଶ୍ୱାସ କରିପାରୁନାହାନ୍ତି। ତେଣୁ କର୍ମୀମାନେ ଶୃଙ୍ଖଳାର ସହ ରାଜରାସ୍ତାକୁ ଓହ୍ଲାଇ ପ୍ରତିବାଦ କରୁଛନ୍ତି। ତୁରନ୍ତ ୨ନେତାଙ୍କ ନିଲମ୍ବନ ଆଦେଶ ପ୍ରତ୍ୟାହର କରାଯାଉ। ପିସିସି ବୈଠକ ଯାହା ଶନିବାର ହେବାର ଅଛି ସେଥିରେ ବିଚାରବିମର୍ଶ କରି ଏଆଇସିସି ନିକଟକୁ ପଠାଯାଉ। ଯଦି ନିଲମ୍ବନ ଆଦେଶ ପ୍ରତ୍ୟାହାର ନ ହୁଏ ତେବେ ଦରକାର ପଡିଲେ କଂଗ୍ରେସ ଭବନରେ ପଶିବା ସହ ଦିଲ୍ଲୀ ଯିବେ ବୋଲି ସେ କହିଛନ୍ତି।
ଅନ୍ୟପଟେ କଂଗ୍ରେସର ଦୁଇ ନେତାଙ୍କୁ ନିଲମ୍ବନ ପରେ ଗଣମାଧ୍ୟମରେ ପିସିସି ସଭାପତିଙ୍କ ବିରୋଧରେ ବାରମ୍ବାର କଟୁ ମନ୍ତବ୍ୟ ପ୍ରଦାନ କରିବାରୁ ଦଳ ବିରୋଧୀ କାର୍ଯ୍ୟ କରିବା ଅଭିଯୋଗରେ ପିସିସି ସାଧାରଣ ସମ୍ପାଦକ ନାରାୟଣ ଜେନାଙ୍କୁ ଦଳର ପ୍ରାଥମିକ ସଦସ୍ୟ ପଦରୁ ବହିଷ୍କାର କରାଯାଇଛି।
