ନୂଆଦିଲ୍ଲୀ,୧୭ା୭-ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ଭିଡିଓ କନ୍ଫରେନ୍ସ ଜରିଆରେ ଜାତିସଂଘ ଅର୍ଥନୈତିକ ଓ ସାମାଜିକ ପରିଷଦ (ଇସିଓଏସ୍ଓସି)କୁ ଉଦ୍ବୋଧନ ଦେବା ଅବସରରେ ଅନ୍ତର୍ଜାତୀୟ ସଂଗଠନରେ ସଂସ୍କାର ଆଣିବା ଉପରେ ଗୁରୁତ୍ୱାରୋପ କରିଛନ୍ତି। ବିଶ୍ୱ ସଦ୍ଭାବନା, ସାମାଜିକ-ଅର୍ଥନୈତିକ ସମାନତାରେ ଉନ୍ନତି, ପ୍ରାକୃତିକ ସନ୍ତୁଳନର ସୁରକ୍ଷା ପ୍ରତି ଆମେ ପ୍ରତିଶ୍ରୁତିବଦ୍ଧ। ଜାତିସଂଘ କାର୍ଯ୍ୟସୂଚୀକୁ ପୂର୍ଣ୍ଣ ସହାୟତା ଯୋଗାଇଦେବାରେ ଭାରତ ଏହାର ଭୂମିକା ନିଭାଇ ଆସିଛି। ବିଭିନ୍ନ ଦେଶର ନୀତି ମାଧ୍ୟମରେ ସ୍ଥାୟୀ ଶାନ୍ତି ଓ ସମୃଦ୍ଧି ହାସଲ ଉପରେ ଭାରତ ଦୃଢ଼ ବିଶ୍ୱାସ କରିଥାଏ। ଭାରତରେ କରୋନା ମୁକାବିଲା ଜନ ଆନ୍ଦୋଳନରେ ପରିଣତ ହୋଇଛି। ତୃଣମୂଳ ସ୍ତରର ସ୍ବାସ୍ଥ୍ୟସେବା ବ୍ୟବସ୍ଥା ବେଶ୍ ସହାୟକ ହୋଇପାରିଛି। ଫଳରେ ଭାରତରେ ଆରୋଗ୍ୟ ହାର ସାରା ବିଶ୍ୱରେ ସର୍ବାଧିକ ରହିଛି। କୋଭିଡ୍ ବିରୋଧୀ ମିଳିତ ଲଢ଼େଇରେ ଭାରତ ୧୫୦ରୁ ଅଧିକ ଦେଶକୁ ସହାୟତା ଯୋଗାଇଦେଇଛି ବୋଲି ପ୍ରଧାନମନ୍ତ୍ରୀ କହିଥିଲେ।
ସେହିପରି ଦେଶ ସ୍ବାଧୀନତାର ୭୫ ବର୍ଷ ପୂର୍ତ୍ତି ଅବସରରେ ୨୦୨୨ ସୁଦ୍ଧା ପ୍ରତି ଭାରତୀୟଙ୍କୁ ସୁରକ୍ଷିତ ପକ୍କାଘର ଯୋଗାଇ ଦିଆଯିବା ଲକ୍ଷ୍ୟରେ ‘ହାଉସିଂ ଫର୍ ଅଲ୍’ କାର୍ଯ୍ୟକ୍ରମ କାର୍ଯ୍ୟକାରୀ କରାଯାଇଛି। ସବ୍କା ସାଥ, ସବ୍କା ବିକାଶ, ସବ୍କା ବିଶ୍ୱାସ ଆମର ସିଦ୍ଧାନ୍ତ। ଗତବର୍ଷ ମହାତ୍ମା ଗାନ୍ଧୀଙ୍କ ୧୫୦ତମ ଜନ୍ମବାର୍ଷିକୀ ପାଳନ ଅବସରରେ ସାରା ଦେଶକୁ ସ୍ବଚ୍ଛ କରାଯିବା ଲକ୍ଷ୍ୟ ସଫଳ ହୋଇଥିବା ପ୍ରଧାନମନ୍ତ୍ରୀ କହିଛନ୍ତି।
