ନୂଆଦିଲ୍ଲୀ,୨୪।୨: ବିଭିନ୍ନ ଦେଶର ବାରଣ ସତ୍ତ୍ୱେ ଶେଷରେ ରୁଷିଆ ୟୁକ୍ରେନ ଉପରେ ଆକ୍ରମଣ କରିଛି। ଏନେଇ ୟୁକ୍ରେନ ରାଷ୍ଟ୍ରପତି ବିଭିନ୍ନ ଦେଶର ସହଯୋଗ ଲୋଡିଛନ୍ତି। ଇତିମଧ୍ୟରେ ଭାରତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ଙ୍କ ସହ ଫୋନ୍ରେ ଆଲୋଚନା କରିଛନ୍ତି। ଦୀର୍ଘ ୨୫ମିନିଟ୍ ଧରି ଏହି ବାର୍ତ୍ତାଳାପ ହୋଇଥିଲା। ଏହି ସମୟରେ ପୁଟିନ୍ ମୋଦିଙ୍କୁ ୟୁକ୍ରେନ ସଙ୍କଟର ବର୍ତ୍ତମାନ ସ୍ଥିତି ବିଷୟରେ ସୂଚନା ଦେଇଛନ୍ତି। ତେବେ ନିଷ୍ଠା ଓ ସକରାତ୍ମକ ଆଲୋଚନା ମାଧ୍ୟମରେ ସମାଧାନର ବାଟ ବାହାରିବ ବୋଲି ମୋଦି ପୁଟିନ୍ଙ୍କୁ କହିଛନ୍ତି। ହିଂସା ରାସ୍ତା ଛାଡିବାକୁ ବା ଯୁଦ୍ଧ ନ କରିବାକୁ ମୋଦି ତାଙ୍କୁ ଅପିଲ କରିଛନ୍ତି। ଏଥିସହ କୁଟନୈତିକ ରାସ୍ତା ଆପଣାଇବାକୁ ମୋଦି ପୁଟିନ୍ଙ୍କୁ ପରାମର୍ଶ ଦେଇଛନ୍ତି। ଏହି ସମୟରେ ମୋଦି ଭାରତୀୟ ନାଗରିକଙ୍କ ସୁରକ୍ଷା ପ୍ରସଙ୍ଗ ମଧ୍ୟ ଉଠାଇଛନ୍ତି। ୟୁକ୍ରେନରେ ଫସିଥିବା ଭାରତୀୟଙ୍କ ସୁରକ୍ଷାକୁ ନେଇ ସେ ଚିନ୍ତାବ୍ୟକ୍ତ କରିଛନ୍ତି। ତେବେ ଏହି ସଙ୍କଟ ସମୟରେ ଲଗାତାର ଭାରତ ରୁଷିଆ ସମ୍ପର୍କରେ ରହିବ ବୋଲି ମୋଦି କହିଛନ୍ତି।
